ဩဂုတ် ၁၈၊ ၂၀၂၆ | New Day Myanmar
ထိုင်းနိုင်ငံ ဘန်ကောက်မြို့ ဒင်ဒဲင်ဒေသမှာ နိုင်ငံခြားသားတွေကို အစိုးရမှတ်ပုံတင်စနစ်ထဲ မမှန်မကန် ထည့်သွင်းပြီး ပန်းရောင်ကတ် (Pink Card) ထုတ်ပေးခဲ့တယ်ဆိုတဲ့ စွပ်စွဲချက်နဲ့ ဒင်ဒဲင်ခရိုင်ရုံးက မှတ်ပုံတင်ဌာန အရာရှိ ၃ ဦးကို ဩဂုတ် ၁၈ ရက် မနက်အစောပိုင်းမှာ ဖမ်းဆီးခဲ့တယ်လို့ ထိုင်းသတင်းတွေမှာ ဖော်ပြပါတယ်။
ရဲ၊ အုပ်ချုပ်ရေးနဲ့ သက်ဆိုင်ရာဌာနတွေက အင်အား ၁၀၀ ကျော် အသုံးပြုပြီး မြို့လယ်အိမ်ရှင်းလင်းရေး စစ်ဆင်ရေး အဖြစ် ဒင်ဒဲင်တိုက်ခန်းဧရိယာက နေရာ ၇ ခုကို ဝင်ရောက်ရှာဖွေခဲ့တာ ဖြစ်ပါတယ်။
အာဏာပိုင်တွေက ဒင်ဒဲင်တိုက်ခန်း ၅,၇၀၀ ကျော်ကို စစ်ဆေးခဲ့ရာ သံသယရှိတဲ့ အခန်း ၄၄ ခန်း တွေ့ရှိခဲ့ပြီး အဲဒီလိပ်စာတွေကို အသုံးပြုပြီး နိုင်ငံခြားသား ၁,၃၀၀ ခန့်ကို နေထိုင်သူအဖြစ် မှတ်ပုံတင်ပြောင်းရွှေ့ထားတာ တွေ့ရှိခဲ့တယ်လို့ ဆိုပါတယ်။ ဒီမမှန်ကန်မှုတွေကနေ စုံစမ်းစစ်ဆေးမှုကို တိုးချဲ့ခဲ့တာ ဖြစ်ပါတယ်။
ဖမ်းဆီးခံရသူတွေက ဒင်ဒဲင်ခရိုင်ရုံး မှတ်ပုံတင်ဌာနက အမျိုးသား ၂ ဦးနဲ့ အမျိုးသမီး ၁ ဦး ဖြစ်ပြီး ရာဇဝတ်တရားရုံးရဲ့ ဖမ်းဝရမ်းနဲ့ ဖမ်းဆီးခဲ့တာလို့ ဆိုပါတယ်။ သူတို့ကို အရည်အချင်းမပြည့်မီတဲ့ နိုင်ငံခြားသားတွေကို မှတ်ပုံတင်စနစ်ထဲ ထည့်သွင်းပြီး ပန်းရောင်ကတ် မမှန်မကန်ထုတ်ပေးရာမှာ ပါဝင်ပတ်သက်ခဲ့တယ်လို့ စွပ်စွဲထားပါတယ်။
ပန်းရောင်ကတ် ဟာ ထိုင်းနိုင်ငံသား မှတ်ပုံတင်ကတ် မဟုတ်သလို ကတ်ကိုင်ဆောင်သူကို ထိုင်းနိုင်ငံသားအဖြစ် အလိုအလျောက် သတ်မှတ်ပေးတာလည်း မဟုတ်ပါဘူး။ ထိုင်းနိုင်ငံသားမဟုတ်တဲ့ သတ်မှတ်အုပ်စုတချို့အတွက် ထုတ်ပေးတဲ့ အထောက်အထားကတ်အမျိုးအစား ဖြစ်ပါတယ်။
ဒါကြောင့် စုံစမ်းစစ်ဆေးသူတွေက အဓိကအားဖြင့် အရည်အချင်းမပြည့်မီတဲ့ နိုင်ငံခြားသားတွေကို အစိုးရမှတ်ပုံတင်စနစ်ထဲ တရားမဝင်ထည့်သွင်းထားတာ ရှိ၊ မရှိနဲ့ နောက်ကွယ်မှာ ဘယ်သူတွေ ကူညီပေးခဲ့သလဲ ဆိုတာကို စစ်ဆေးနေပါတယ်။
လက်ရှိမှာ နိုင်ငံခြားသား ၁,၃၀၀ ခန့်ရဲ့ အချက်အလက်တွေကို တစ်ဦးချင်း ပြန်လည်စိစစ်နေပြီး ဘယ်သူတွေက ဥပဒေအရ မှတ်ပုံတင်ခွင့်ရှိသလဲ၊ ဘယ်သူတွေကို မမှန်မကန် ထည့်သွင်းခဲ့သလဲဆိုတာ စစ်ဆေးနေပါတယ်။ ပွဲစားတွေ၊ တခြားအစိုးရဝန်ထမ်းတွေ ဒါမှမဟုတ် အဖွဲ့အစည်းတစ်ခုခု ပါဝင်ပတ်သက်မှု ရှိ၊ မရှိကိုလည်း ဆက်လက်ဖော်ထုတ်နေတယ်လို့ ဆိုပါတယ်။