ဩဂုတ် ၂၆၊ ၂၀၂၆ | New Day Myanmar
ဘန်ကောက်မြို့မှာ အသက် ၇၉ နှစ်အရွယ် ကုန်စုံဆိုင်ရှင်တစ်ဦးကို ကျည်ပွေ့နဲ့ ရိုက်နှက်သတ်ဖြတ်ပြီး ရွှေဆွဲကြိုးနဲ့ မိုဘိုင်းဖုန်း လုယူထွက်ပြေးတယ်ဆိုတဲ့ စွပ်စွဲချက်နဲ့ မြန်မာနိုင်ငံသား ခွန်ချစ်ဦး (MR. KHUN CHIT OO) ကို ထိုင်းရဲတပ်ဖွဲ့က စမွတ်ပရာကန်ခရိုင်မှာ ဖမ်းဆီးခဲ့ပါတယ်။
ခွန်ချစ်ဦးကို မင်းဘူရီရာဇဝတ်တရားရုံးက ဩဂုတ် ၂၅ ရက်မှာ ထုတ်ထားတဲ့ ဖမ်းဝရမ်းအရ ဖမ်းဆီးခဲ့တာဖြစ်ပြီး ရဲတပ်ဖွဲ့က သူ့ဆီကနေ သေဆုံးသူရဲ့ ရွှေဆွဲကြိုးနဲ့ မိုဘိုင်းဖုန်းကို သက်သေအဖြစ် သိမ်းဆည်းရမိတယ်လို့ ထိုင်းသတင်းတွေမှာ ဖော်ပြပါတယ်။
ဖြစ်စဉ်ဟာ ဘန်ကောက်မြို့၊ ဆဖန်ဆုန်ခရိုင်က Nak Keela Laem Thong 40/1 လမ်းရှိ ကုန်စုံဆိုင်ဖွင့်ထားတဲ့ နေအိမ်တစ်လုံးမှာ ဖြစ်ပွားခဲ့တာပါ။ ရဲဘက်က CCTV မှတ်တမ်းတွေကို စစ်ဆေးရာမှာ သံသယရှိသူဟာ အခင်းဖြစ်ည ည ၁၀ နာရီဝန်းကျင်ကတည်းက တစ်ဦးတည်း လာရောက်ခဲ့ပြီး နေအိမ်ထဲဝင်ကာ ပစ္စည်းတွေ ရှာဖွေခဲ့တယ်လို့ ဆိုပါတယ်။
အဲဒီနောက် မီးဖိုခန်းထဲမှာ ဆိုင်ပိုင်ရှင်နဲ့ ရုန်းရင်းဆန်ခတ် ဖြစ်ပွားခဲ့ပြီး သံသယရှိသူက ကျည်ပွေ့ကို အသုံးပြုပြီး ရိုက်နှက်ခဲ့တာကြောင့် သေဆုံးခဲ့တယ်လို့ ရဲတပ်ဖွဲ့က စွပ်စွဲထားပါတယ်။ အမှုဖြစ်ပြီးနောက် အဝတ်အစားပြောင်းကာ ထွက်ပြေးခဲ့တယ်လို့လည်း CCTV မှတ်တမ်းတွေအပေါ် အခြေခံပြီး ရဲဘက်က ဆိုပါတယ်။
ရဲစုံစမ်းချက်တွေအရ ခွန်ချစ်ဦးဟာ အရင်က သေဆုံးသူရဲ့ ကုန်စုံဆိုင်မှာ မကြာခဏ ဝယ်ယူဖူးသူဖြစ်ပြီး နေအိမ်နောက်ဘက်က အဆောင်မှာလည်း နေထိုင်ခဲ့ဖူးတာကြောင့် နေအိမ်ပတ်ဝန်းကျင်နဲ့ သေဆုံးသူရဲ့ နေ့စဉ်အလေ့အထကို သိရှိထားနိုင်တယ်လို့ ယူဆထားပါတယ်။
ထိုင်းသတင်းတချို့မှာ သေဆုံးသူအသက်ကို ၇၈ နှစ်လို့ ဖော်ပြထားပြီး Amarin TV ကတော့ ၇၉ နှစ်လို့ ဖော်ပြထားတာကြောင့် အသက်အရွယ်အချက်အလက်မှာ မီဒီယာအကြား ကွာဟမှုရှိနေပါတယ်။
ရဲတပ်ဖွဲ့က ခွန်ချစ်ဦးကို လုယက်မှုကြောင့် သေဆုံးစေမှု စွဲချက်နဲ့ အမှုဖွင့်ထားပြီး Prawet ရဲစခန်းမှာ ဆက်လက်စစ်ဆေးနေပါတယ်။ သူ့အပေါ် စွပ်စွဲထားတဲ့ အမှုတွေကို တရားရုံးက အပြီးသတ်ဆုံးဖြတ်ထားတာ မရှိသေးပါဘူး။