ဩဂုတ် ၇၊ ၂၀၂၆ | New Day Myanmar
ရန်ကုန်တိုင်း၊ လှိုင်သာယာမြို့နယ်၊ စက်မှုဇုန် (၄) မှာရှိတဲ့ Spring Moon Garment Manufacturing အထည်ချုပ်စက်ရုံက အလုပ်သမားတွေရဲ့ လုပ်ခလစာတိုးမြှင့်ရေးနဲ့ အလုပ်သမားအခွင့်အရေးဆိုင်ရာ တောင်းဆိုမှုဟာ ဒီနေ့ ဩဂုတ် ၇ ရက်မှာ ၃၁ ရက်မြောက်အထိ ရောက်ရှိလာပေမယ့် ပြေလည်မှုမရသေးဘူးလို့ သိရပါတယ်။
လက်ရှိ တောင်းဆိုမှုမှာ အလုပ်သမား ၁၃၅ ဦး ဆက်လက်ပါဝင်နေပြီး သူတို့ရဲ့ တောင်းဆိုချက်တွေ ပြေလည်မှုမရမချင်း ဆက်လက်တောင်းဆိုသွားမယ်လို့ အလုပ်သမားတွေက ပြောပါတယ်။
Spring Moon Garment အလုပ်သမားတွေဟာ ဇူလိုင် ၈ ရက်ကစပြီး လုပ်ခလစာတိုးမြှင့်ရေးနဲ့ လုပ်ငန်းခွင်အခွင့်အရေးတွေရရှိရေးအတွက် စုပေါင်းတောင်းဆိုခဲ့ကြတာဖြစ်ပြီး စတင်တောင်းဆိုချိန်မှာ အလုပ်သမား ၁၇၇ ဦးခန့် ပါဝင်ခဲ့ပါတယ်။ ဇူလိုင် ၂၂ ရက်အထိ ၁၅ ရက်ကြာ တောင်းဆိုခဲ့ပေမယ့် ပြေလည်မှု မရရှိသေးဘူးလို့ New Day Myanmar က အဲဒီအချိန်မှာ ဖော်ပြခဲ့ပါတယ်။
အလုပ်သမားတွေက စုစုပေါင်း တောင်းဆိုချက် ၉ ချက် တင်ပြထားပြီး အဓိကအားဖြင့် ယခင် တစ်ရက်လုပ်ခ ၁၀,၀၀၀ ကျပ်ကနေ ၁၃,၀၀၀ ကျပ် တိုးမြှင့်ပေးဖို့၊ ရက်မှန်ကြေး ၄၀,၀၀၀ ကျပ်ကနေ ၅၀,၀၀၀ ကျပ် တိုးမြှင့်ပေးဖို့နဲ့ အချိန်ပိုကြေး တစ်နာရီ ၂,၀၀၀ ကျပ်ကနေ ၂,၅၀၀ ကျပ်အထိ တိုးမြှင့်ပေးဖို့ တောင်းဆိုထားကြပါတယ်။
ဒါ့အပြင် ကျွမ်းကျင်ကြေးကို A အဆင့်အတွက် ၆၀,၀၀၀ ကျပ်၊ B အဆင့်အတွက် ၅၀,၀၀၀ ကျပ်နဲ့ C အဆင့်အတွက် ၄၀,၀၀၀ ကျပ် သတ်မှတ်ပေးဖို့အပါအဝင် လုပ်ငန်းခွင်ဆိုင်ရာ အခွင့်အရေးတွေကိုလည်း ထည့်သွင်းတောင်းဆိုထားပါတယ်။
ဇူလိုင် ၂၂ ရက်အထိ ပြုလုပ်ခဲ့တဲ့ ညှိနှိုင်းမှုတွေမှာ အလုပ်ရှင်ဘက်က နေ့တွက်ကြေးကို ၁၁,၀၀၀ ကျပ်နဲ့ အချိန်ပိုကြေးကို တစ်နာရီ ၂,၂၀၀ ကျပ်အထိ တိုးပေးဖို့ လိုက်လျောခဲ့ပေမယ့် အလုပ်သမားတွေ တောင်းဆိုထားတဲ့ အခြေခံအချက်တွေ ပြည့်မီခြင်းမရှိတာကြောင့် တောင်းဆိုမှုကို ဆက်လုပ်ဖို့ ဆုံးဖြတ်ခဲ့ကြတာ ဖြစ်ပါတယ်။ အဲဒီအချိန်မှာ တိုင်းအလုပ်သမားညွှန်ကြားရေးဦးစီးဌာနရုံးမှာ နှစ်ဖက် ထပ်မံညှိနှိုင်းဖို့ စီစဉ်ခဲ့ပြီး အလုပ်ရှင်နဲ့ အလုပ်သမားကြား တွေ့ဆုံညှိနှိုင်းမှု ၉ ကြိမ်အထိ ရှိလာခဲ့တယ်လို့ သိရပါတယ်။
Spring Moon Garment Manufacturing Co., Ltd. ဟာ အလုပ်သမား ၂၀၀ ကျော်နဲ့ CMP စနစ်အသုံးပြုပြီး အထည်ချုပ်လုပ်ငန်း လုပ်ကိုင်နေတဲ့ စက်ရုံတစ်ရုံဖြစ်ပါတယ်။ မြန်မာနိုင်ငံ ရင်းနှီးမြှုပ်နှံမှုနဲ့ ကုမ္ပဏီများညွှန်ကြားမှုဦးစီးဌာန (DICA) မှတ်တမ်းအရ ဒီစက်ရုံဟာ လှိုင်သာယာစက်မှုဇုန်မှာ မြန်မာနိုင်ငံရင်းနှီးမြှုပ်နှံမှုကော်မရှင် ခွင့်ပြုချက်နဲ့ လုပ်ကိုင်နေတဲ့ စက်ရုံတစ်ရုံလည်း ဖြစ်ပါတယ်။
တောင်းဆိုမှုစတင်ခဲ့တာ တစ်လကျော်လာပြီဖြစ်ပေမယ့် ဒီနေ့အထိ အလုပ်ရှင်နဲ့ အလုပ်သမားကြား အပြီးသတ်သဘောတူညီမှု မရရှိသေးဘဲ လက်ရှိ ပါဝင်တောင်းဆိုနေတဲ့ အလုပ်သမား ၁၃၅ ဦးကတော့ ပြေလည်မှုရရှိတဲ့အထိ ဆက်လက်တောင်းဆိုသွားမယ်လို့ ပြောထားပါတယ်။