ဩဂုတ် ၂၈၊ ၂၀၂၆ | New Day Myanmar
တောင်ကိုရီးယား၊ ဂျပန်နဲ့ အမေရိကန်တို့ဟာ မြောက်ကိုရီးယားရဲ့ နျူကလီးယားနဲ့ ဒုံးကျည်ခြိမ်းခြောက်မှုတွေကို တုံ့ပြန်နိုင်ရေး စမ်းသပ်ဖို့ သုံးနိုင်ငံ ပူးတွဲစစ်ရေးလေ့ကျင့်မှုကို လာမယ့် စက်တင်ဘာ ၉ ရက်ကနေ ၁၁ ရက်အထိ ပြုလုပ်မယ်လို့ တောင်ကိုရီးယားစစ်တပ်က ဩဂုတ် ၂၈ ရက်မှာ ထုတ်ပြန်ပါတယ်။
နှစ်စဉ်ပြုလုပ်တဲ့ Freedom Edge အမည်ရှိ ပူးတွဲစစ်ရေးလေ့ကျင့်မှုကို တောင်ကိုရီးယားနိုင်ငံတောင်ပိုင်း ဂျေဂျူကျွန်းရဲ့ တောင်ဘက်နဲ့ အရှေ့ဘက် နိုင်ငံတကာရေပိုင်နက်မှာ ပြုလုပ်မှာဖြစ်ပြီး ကာကွယ်ရေးရည်ရွယ်ချက်နဲ့ ပြုလုပ်တာဖြစ်တယ်လို့ တောင်ကိုရီးယား ပူးတွဲစစ်ဦးစီးချုပ်များအဖွဲ့က ပြောပါတယ်။
ဒီလေ့ကျင့်မှုက မြောက်ကိုရီးယားရဲ့ ဒုံးကျည်နဲ့ နျူကလီးယားလက်နက်ဆိုင်ရာ ခြိမ်းခြောက်မှုတွေ ဖြစ်လာတဲ့အခါ သုံးနိုင်ငံတပ်ဖွဲ့တွေရဲ့ ပူးပေါင်းတုံ့ပြန်နိုင်စွမ်းကို စမ်းသပ်ဖို့ ရည်ရွယ်တာ ဖြစ်ပါတယ်။
သုံးနိုင်ငံ ပူးတွဲလေ့ကျင့်မှုဟာ အမေရိကန်သမ္မတ ဒေါ်နယ်ထရမ့်က မကြာသေးခင်က တောင်ကိုရီးယားနဲ့ အမေရိကန်တို့ရဲ့ အဓိကပူးတွဲစစ်ရေးလေ့ကျင့်မှုတခုကို လျှော့ချခဲ့ပြီးနောက် ထွက်ပေါ်လာတာ ဖြစ်ပါတယ်။ အမေရိကန်က လာမယ့်လ ပြုလုပ်ဖို့ စီစဉ်ထားတဲ့ မရိန်းတပ်ဖွဲ့ ပူးတွဲလေ့ကျင့်မှုတခုကိုလည်း ဖျက်သိမ်းခဲ့ပါတယ်။
ထရမ့်က တောင်ကိုရီးယားဘက်က အီရန်စစ်ပွဲမှာ အမေရိကန်ကို ကူညီဖို့ ငြင်းဆိုခဲ့တာနဲ့ အခုလအတွင်း ပြုလုပ်ခဲ့တဲ့ Ulchi Freedom Shield လေ့ကျင့်မှုဟာ မြောက်ကိုရီးယားကို မှားယွင်းတဲ့ အချက်ပြမှု ပေးနိုင်တယ်ဆိုတာတွေကို အကြောင်းပြပြီး လေ့ကျင့်မှုကို လျှော့ချခဲ့တာ ဖြစ်ပါတယ်။
ထရမ့်ဟာ မြောက်ကိုရီးယားခေါင်းဆောင် ကင်ဂျုံအွန်နဲ့ ထပ်မံထိပ်သီးတွေ့ဆုံနိုင်ဖို့ ကြိုးပမ်းနေပြီး သူတို့နှစ်ဦးဟာ ၂၀၁၈ နဲ့ ၂၀၁၉ ခုနှစ်တွေမှာ တွေ့ဆုံခဲ့ဖူးပါတယ်။
ဒါကြောင့် စက်တင်ဘာလ Freedom Edge လေ့ကျင့်မှုဟာ တဖက်မှာ မြောက်ကိုရီးယားရဲ့ နျူကလီးယားနဲ့ ဒုံးကျည်ခြိမ်းခြောက်မှုကို တုံ့ပြန်ဖို့ သုံးနိုင်ငံလုံခြုံရေးပူးပေါင်းမှု ဆက်ရှိနေကြောင်း ပြသနေပြီး တဖက်မှာတော့ ထရမ့်အစိုးရက မြောက်ကိုရီးယားနဲ့ သံတမန်ရေး ပြန်လည်စတင်ဖို့ ကြိုးပမ်းနေတဲ့အချိန်နဲ့ တိုက်ဆိုင်နေပါတယ်။