၂၁ ဇူလိုင် ၂၀၂၆ | New Day Myanmar
အာဆီယံနိုင်ငံခြားရေးဝန်ကြီးတွေရဲ့ အစည်းအဝေးတွေကို ဖိလစ်ပိုင်နိုင်ငံ မနီလာမြို့မှာ ကျင်းပနေပြီး မြန်မာနိုင်ငံရဲ့ အနာဂတ်နိုင်ငံရေးအခြေအနေနဲ့ အမေရိကန်-အီရန် စစ်ရေးပဋိပက္ခက အစည်းအဝေးအပေါ် အဓိကလွှမ်းမိုးနေပါတယ်။
အရှေ့အလယ်ပိုင်းတိုက်ပွဲတွေကြောင့် ဟော်မုဇ်ရေလက်ကြားကနေ ရေနံနဲ့ သဘာဝဓာတ်ငွေ့ တင်ပို့မှုထိခိုက်နိုင်တဲ့အပြင် စွမ်းအင်ဈေးနှုန်း၊ ငွေကြေးဖောင်းပွမှုနဲ့ ဒေသတွင်းစီးပွားရေးတိုးတက်မှုတွေအပေါ်ပါ သက်ရောက်လာမှာကို အာဆီယံနိုင်ငံတွေ စိုးရိမ်နေကြတာပါ။
ဟော်မုဇ်ရေလက်ကြားကို ကုန်သွယ်ရေကြောင်းတွေအတွက် အပြည့်အဝပြန်လည်ဖွင့်လှစ်ပေးဖို့ အာဆီယံနိုင်ငံခြားရေးဝန်ကြီးတွေ တောင်းဆိုနိုင်ကြောင်း သတင်းတွေက ဖော်ပြပါတယ်။ ဖိလစ်ပိုင်နိုင်ငံကလည်း စစ်ပွဲကြောင့် ဖြစ်ပေါ်လာတဲ့ စွမ်းအင်အကျပ်အတည်းကို တုံ့ပြန်ဖို့ စွမ်းအင်အရေးပေါ်အခြေအနေ ကြေညာထားပါတယ်။
မြန်မာ့အရေးမှာတော့ အာဆီယံက စစ်အုပ်စုနဲ့ တိုက်ရိုက်ပြန်လည်ဆက်ဆံသင့်၊ မသင့်ဆိုတဲ့ သဘောထားကွဲလွဲမှုတွေ ရှိနေပါတယ်။ စစ်အုပ်စုနဲ့ ထိတွေ့ဆွေးနွေးမှုတွေက စစ်တပ်ဦးဆောင်တဲ့ အုပ်ချုပ်ရေးကို တရားဝင်မှုရရှိစေနိုင်တယ်လို့ ဝေဖန်သူတွေက စိုးရိမ်နေကြပါတယ်။
အာဆီယံအလှည့်ကျဥက္ကဋ္ဌ ဖိလစ်ပိုင်ကတော့ မြန်မာ့နိုင်ငံရေးအကျပ်အတည်း ဖြေရှင်းနိုင်ရေးအတွက် စစ်အုပ်စု၊ တိုင်းရင်းသားလက်နက်ကိုင်အဖွဲ့တွေနဲ့ အမျိုးသားညီညွတ်ရေးအစိုးရအပါအဝင် သက်ဆိုင်သူအားလုံးနဲ့ ဆက်သွယ်ဆွေးနွေးဖို့လိုတယ်လို့ ဆိုထားပါတယ်။
အာဆီယံနိုင်ငံခြားရေးဝန်ကြီးတွေဟာ ဇူလိုင် ၂၂ ရက်မှာ မြန်မာ့အရေးနဲ့ပတ်သက်တဲ့ အလွတ်သဘောဆွေးနွေးပွဲတစ်ခု ပြုလုပ်ဖို့ရှိပါတယ်။
အာဆီယံနိုင်ငံခြားရေးဝန်ကြီးတွေက ဇူလိုင် ၁၂ ရက်မှာ ဘန်ကောက်မြို့၌ စစ်အုပ်စုဘက်က ကိုယ်စားလှယ် ဦးတင်မောင်ဆွေနဲ့ အလွတ်သဘောတွေ့ဆုံခဲ့ပါတယ်။ ဒါဟာ ၂၀၂၁ ခုနှစ် စစ်တပ်အာဏာသိမ်းပြီးနောက် စစ်အုပ်စုကို အာဆီယံအဆင့်မြင့်အစည်းအဝေးတွေက ဖယ်ရှားထားချိန်အတွင်း ပြုလုပ်ခဲ့တဲ့ ရှားပါးတိုက်ရိုက်တွေ့ဆုံမှုတစ်ခု ဖြစ်ပါတယ်။
၂၀၂၁ ခုနှစ်က သဘောတူထားတဲ့ အာဆီယံဘုံသဘောတူညီချက် ငါးရပ်မှာ အကြမ်းဖက်မှုတွေ ချက်ချင်းရပ်တန့်ရေးနဲ့ သက်ဆိုင်သူအားလုံး ပါဝင်တဲ့ တွေ့ဆုံဆွေးနွေးမှု စတင်ရေးတို့ ပါဝင်ပေမယ့် ငါးနှစ်ကျော်ကြာလာတဲ့အထိ ထင်ရှားတဲ့တိုးတက်မှု မရှိသေးပါဘူး။
မနီလာအစည်းအဝေးမှာ တောင်တရုတ်ပင်လယ်အတွင်း တင်းမာမှုတွေနဲ့ တရုတ်နိုင်ငံနဲ့ ရေးဆွဲနေတဲ့ ကျင့်ဝတ်စည်းမျဉ်း အပြီးသတ်နိုင်ရေးကိုလည်း ဆွေးနွေးကြမှာပါ။ အမေရိကန်၊ တရုတ်၊ ရုရှား၊ ဂျပန်နဲ့ တခြားဆွေးနွေးဖက်နိုင်ငံတွေက နိုင်ငံခြားရေးဝန်ကြီးတွေနဲ့ ကိုယ်စားလှယ်တွေလည်း ဆက်စပ်အစည်းအဝေးတွေကို တက်ရောက်နေကြပါတယ်။
