၂၁ ဧပြီ ၂၀၂၆ | New Day Myanmar
အမေရိကန်သမ္မတဒေါ်နယ် ထရမ့် အစိုးရအဖွဲ့ဝင်ဖြစ်တဲ့ အလုပ်သမားဝန်ကြီး လိုရီ ချာဗက်ဇ်-ဒီရီမားဟာ စုံစမ်းစစ်ဆေးမှုတွေနဲ့ အရှုပ်တော်ပုံတွေကြောင့် ဖိအားမြင့်တက်နေတဲ့အချိန်မှာ ဧပြီ ၂၁ ရက်နေ့မှာ ရာထူးကနေ နုတ်ထွက်သွားပါတယ်။
အိမ်ဖြူတော် ပြောရေးဆိုခွင့်ရှိသူ စတီဗင် ချောင်က သူမဟာ ပုဂ္ဂလိကကဏ္ဍမှာ တာဝန်အသစ်တစ်ခု လက်ခံဖို့ အစိုးရကနေ ထွက်ခွာတာဖြစ်တယ်လို့ ပြောပြီး လက်ရှိ ဒုဝန်ကြီး ကိတ် ဆွန်ဒါလင်းက ယာယီဝန်ကြီးအဖြစ် တာဝန်ယူမယ်လို့ ဆိုပါတယ်။
မကြာသေးခင်အပတ်တွေမှာ စုံစမ်းစစ်ဆေးရေးအဖွဲ့တွေ နဲ့ ကွန်ဂရက်စ်အဖွဲ့ဝင်တွေက သူမရဲ့ လုပ်ငန်းဆောင်ရွက်မှုတွေအပေါ် စူးစမ်းစစ်ဆေးမှုတွေ ပြုလုပ်လာတာကြောင့် ဖိအားတွေ တိုးလာခဲ့ပါတယ်။ အလုပ်သမားဌာနရဲ့ အင်စပက်တာ ဂျင်နရယ်ရုံးမှာလည်း whistleblower တိုင်ကြားချက်အရ သူမနဲ့ နီးစပ်သူတွေ ရဲ့ ကျင့်ဝတ်ဆိုင်ရာပိုင်း လုပ်ရပ်တွေကို စုံစမ်းစစ်ဆေးနေပြီး နောက်ဆုံးအဆင့်ကို ရောက်ရှိနေတယ်လို့ သိရပါတယ်။
စုံစမ်းစစ်ဆေးမှုအတွင်း သူမနဲ့ ဝန်ထမ်းတွေက ပုဂ္ဂလိကခရီးစဉ်တွေမှာ အစိုးရရင်းမြစ်တွေကို မလျော်ကန်အသုံးပြုခဲ့တာ၊ အဆင့်မြင့်ဟိုတယ်တွေ၊ SUV ကားငှားရမ်းမှုတွေ နဲ့ စားသောက်စရိတ်တွေကို သုံးစွဲခဲ့တာတွေ တွေ့ရှိခဲ့တယ်လို့ သတင်းရင်းမြစ်တွေက ဆိုပါတယ်။ ဒီကိစ္စနဲ့ ဆက်စပ်ပြီး ဝန်ထမ်း ၄ ဦး အလုပ်မှ ထွက်ခွာခဲ့ရပါတယ်။
ဒါ့အပြင် သူမနဲ့ မိသားစုဝင်တွေက ဝန်ထမ်းငယ်တွေထံ ပို့ခဲ့တဲ့ စာတိုတွေထဲမှာ အလုပ်ချိန်အတွင်း အရက်သောက်မှုနဲ့ ပရော်ဖက်ရှင်နယ်မဆန်တဲ့ အပြုအမူတွေကို ပြသနေတယ်ဆိုတဲ့ သံသယတွေကိုလည်း စုံစမ်းစစ်ဆေးနေပါတယ်။
သူမရဲ့ ဥပဒေရေးရာရှေ့နေ နစ် အိုဘာဟိုင်ဒင်ကတော့ သူမဟာ ဥပဒေချိုးဖောက်မှုကြောင့် မဟုတ်ဘဲ နုတ်ထွက်တာဖြစ်တယ်လို့ ပြောထားပါတယ်။
ကွန်ဂရက်စ်ဘက်မှာလည်း စုံစမ်းစစ်ဆေးမှုတွေ ဆက်လက်လုပ်ဆောင်နေပြီး အထက်လွှတ်တော်အမတ် ချားလ်စ် ဂရက်စ်လီက အတွင်းရေးရာ စာရွက်စာတမ်းတွေကို တောင်းခံထားပါတယ်။
သူမရဲ့ ခင်ပွန်း ရှောင် ဒီရီမားကလည်း အမျိုးသမီးဝန်ထမ်းတွေထံ မလိုလားတဲ့ ချဉ်းကပ်မှုတွေ ပြုလုပ်ခဲ့တယ်ဆိုတဲ့ စွပ်စွဲချက်တွေကြောင့် ဌာနအဆောက်အအုံကို ဝင်ခွင့်ပိတ်ခံထားရတယ်လို့ သိရပါတယ်။
လိုရီ ချာဗက်ဇ်-ဒီရီမားဟာ အမေရိကန်နိုင်ငံ အော်ရီဂွန် ပြည်နယ်က ရီပဘလစ်ကန် ကွန်ဂရက်စ်အမတ်ဟောင်းတစ်ဦးဖြစ်ပြီး အလုပ်သမားဝန်ကြီးအဖြစ် တာဝန်ထမ်းဆောင်ချိန်မှာ Teamsters အလုပ်သမားသမဂ္ဂရဲ့ ထောက်ခံမှုကို ရရှိခဲ့သူဖြစ်ပါတယ်။
အမေရိကန် အထက်လွှတ်တော်အမတ် ဂျွန် ကင်နဒီက သူမရဲ့ နုတ်ထွက်မှုကို ဉာဏ်ကောင်းတဲ့ ဆုံးဖြတ်ချက် လို့ ပြောခဲ့ပြီး သောမ် တီလစ်ကလည်း အစိုးရအဖွဲ့ဝင်ရွေးချယ်မှုတွေမှာ ပိုမိုတင်းကျပ်သင့်တယ်လို့ ပြောပါတယ်။
