ဩဂုတ် ၁၀၊ ၂၀၂၆ | New Day Myanmar
ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းမှာ အနောက်တောင်မုတ်သုံလေ အားကောင်းနေပြီး မိုးတိမ်တောင်တွေ အားကောင်းစွာဖြစ်ထွန်းနေတာကြောင့် မြန်မာနိုင်ငံတစ်ဝန်း ဒီနေ့ ဩဂုတ် ၁၀ ရက်ကနေ ဩဂုတ် ၁၂ ရက်အထိ မိုးထစ်ချုန်းရွာပြီး နေရာကွက်၍ မိုးကြီးနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနကသတိပေးချက် ထုတ်ပြန်ပါတယ်။
နေပြည်တော်၊ ရန်ကုန်၊ မန္တလေး၊ ပဲခူး၊ မကွေး၊ စစ်ကိုင်း၊ ဧရာဝတီနဲ့ တနင်္သာရီတိုင်းတွေအပြင် ကချင်၊ ကယား၊ ကရင်၊ ချင်း၊ မွန်၊ ရခိုင်နဲ့ ရှမ်းပြည်နယ်တို့မှာ မိုးအတော်အသင့်ကနေ နေရာအနှံ့အပြားအထိ ရွာသွန်းနိုင်ပြီး နေရာကွက်၍ မိုးသည်းထန်နိုင်တယ်လို့ မိုးလေဝသဌာနရဲ့ မိုးကြီးသတိပေးချက် မှာ ဖော်ပြထားပါတယ်။
မနေ့ ဩဂုတ် ၉ ရက် ည ၇ နာရီထုတ်ပြန်ချက်မှာလည်း ဒီနေ့ မွန်းတည့်ချိန်အထိ နေပြည်တော်၊ ရန်ကုန်၊ မန္တလေး၊ ပဲခူး၊ စစ်ကိုင်း၊ ဧရာဝတီနဲ့ တနင်္သာရီတိုင်း၊ ကရင်၊ ချင်း၊ မွန်နဲ့ ရခိုင်ပြည်နယ်တို့မှာ နေရာကွက်၍ မိုးကြီးနိုင်တယ်လို့ ခန့်မှန်းထားပါတယ်။ နောက်နှစ်ရက်အတွင်း ပဲခူး၊ ဧရာဝတီ၊ တနင်္သာရီတိုင်းနဲ့ ကချင်၊ ကရင်၊ မွန်၊ ရခိုင်နဲ့ ရှမ်းပြည်နယ်အရှေ့ပိုင်းတို့မှာလည်း နေရာကွက်၍ မိုးကြီးနိုင်တယ်လို့ ဖော်ပြထားပါတယ်။
ရန်ကုန်မှာ ဒီနေ့ မနက် ၁၀ နာရီခွဲအချိန်အထိ မိုးဖွဲရွာပြီး တိမ်ထူနေကာ စိုထိုင်းဆ ၁၀၀ ရာခိုင်နှုန်းအထိ ရှိနေပါတယ်။ နိုင်ငံတကာမြို့အလိုက် ခန့်မှန်းချက်မှာလည်း ရန်ကုန်မှာ ဒီနေ့ နေ့လယ်ပိုင်း မိုးထစ်ချုန်းရွာနိုင်ပြီး ညပိုင်းအထိ မိုးဆက်ရွာနိုင်တဲ့ အခြေအနေရှိတယ်လို့ ဖော်ပြထားပါတယ်။
ပင်လယ်ပြင်မှာ မုတ္တမကွေ့၊ မွန်နဲ့ တနင်္သာရီကမ်းရိုးတန်းတစ်လျှောက် တစ်ခါတစ်ရံ မိုးသက်လေပြင်းကျပြီး လှိုင်းကြီးနိုင်ပါတယ်။ မိုးသက်လေပြင်းကျချိန် လေတိုက်နှုန်း တစ်နာရီ ၃၅ မိုင်အထိရှိနိုင်ပြီး လှိုင်းအမြင့် ၉ ပေကနေ ၁၁ ပေအထိ မြင့်နိုင်ပါတယ်။ မြစ်ဝကျွန်းပေါ်နဲ့ ရခိုင်ကမ်းရိုးတန်းမှာတော့ လေတိုက်နှုန်း တစ်နာရီ ၂၅ မိုင်ကနေ ၃၀ မိုင်အထိရှိနိုင်ပြီး လှိုင်းအမြင့် ၇ ပေကနေ ၉ ပေအထိ ရှိနိုင်ပါတယ်။
ဒေသတွင်းအခြေအနေအနေနဲ့ အိန္ဒိယမိုးလေဝသဌာန (IMD) ရဲ့ နောက်ဆုံး ပင်လယ်ပြင်ခန့်မှန်းချက်မှာ လက်ရှိ ဘင်္ဂလားပင်လယ်အော်အတွက် မုန်တိုင်းသတိပေးချက် မရှိသေးဘူးလို့ ဖော်ပြထားပါတယ်။ ဒါပေမယ့် ဩဂုတ် ၁၁ ရက်ဝန်းကျင်မှာ ဘင်္ဂလားပင်လယ်အော်မြောက်ပိုင်းနဲ့ ဘင်္ဂလားဒေ့ရှ်-အနောက်ဘင်္ဂလားကမ်းရိုးတန်းအနီး လေဝဲလည်ပတ်မှုတစ်ခု ဖြစ်ပေါ်နိုင်ပြီး အဲဒီစနစ်ရဲ့ အရှိန်ကြောင့် ဩဂုတ် ၁၃ ရက်ဝန်းကျင်မှာ အဲဒီဒေသမှာ လေဖိအားနည်းရပ်ဝန်းတစ်ခု ဖြစ်ပေါ်နိုင်တယ်လို့ ခန့်မှန်းထားပါတယ်။
ဒီအခြေအနေဟာ လက်ရှိမှာ မုန်တိုင်းဖြစ်ပေါ်နေပြီလို့ ဆိုလိုတာမဟုတ်ဘဲ နောက်ရက်ပိုင်းအတွင်း ဖြစ်လာနိုင်တဲ့ မိုးလေဝသစနစ်ကို ကြိုတင်ခန့်မှန်းထားတာဖြစ်ပါတယ်။ အိန္ဒိယမိုးလေဝသဌာနရဲ့ ဩရိဿကမ်းရိုးတန်းခန့်မှန်းချက်မှာလည်း အဲဒီ လေဝဲလည်ပတ်မှုနဲ့ လေဖိအားနည်းရပ်ဝန်း ဖြစ်ပေါ်နိုင်ခြေကို ထပ်မံဖော်ပြထားပါတယ်။
မိုးလေဝသဌာနကတော့ မိုးသည်းထန်မှုနဲ့ လေပြင်းတိုက်ခတ်မှုတွေကြောင့် တောင်တန်းနဲ့ တောင်စောင်းဒေသတွေမှာ မြေပြိုမှု၊ မြစ်ချောင်းငယ်တွေအနီးနဲ့ မြေနိမ့်ပိုင်းဒေသတွေမှာ ရုတ်တရက်ရေကြီးမှု ဖြစ်ပေါ်နိုင်တာကြောင့် သတိထားဖို့ တိုက်တွန်းထားပါတယ်။ ပြည်တွင်းရေကြောင်းသွားလာရေး၊ ပြည်တွင်းလေကြောင်းခရီးစဉ်တွေနဲ့ ကမ်းနီး၊ ကမ်းဝေးငါးဖမ်းရေယာဉ်တွေအနေနဲ့လည်း မိုးသက်လေပြင်းနဲ့ ပင်လယ်လှိုင်းအခြေအနေကို အထူးဂရုပြုဖို့ လိုအပ်ပါတယ်။