၁ မေ ၂၀၂၆ | New Day Myanmar
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ မကြာခင် ရှေ့နေအဖွဲ့နဲ့ တွေ့ဆုံခွင့်ရမယ်လို့ သတင်းတွေထွက်ပေါ်လာပါတယ်။
၅ နှစ်ကျော်ကြာ စစ်ကော်မရှင်ရဲ့ ဖမ်းဆီးချုပ်နှောင်မှုကို ခံထားရတဲ့ ဒေါ်အောင်ဆန်းစုကြည်ကို နေအိမ်အကျယ်ချုပ်သို့ ပြောင်းရွှေ့မယ်လို့ ဧပြီ ၃၀ ရက်နေ့မှာ ကြေညာခဲ့ပြီးနောက်၊ ရှေ့နေအဖွဲ့ဝင်တစ်ဦးက သူမနဲ့ တွေ့ဆုံခွင့်ရမယ့်အကြောင်း ပြောကြားခဲ့တာဖြစ်ပါတယ်။
လက်ရှိအချိန်မှာတော့ ဒေါ်အောင်ဆန်းစုကြည်ဟာ နေပြည်တော်မှာပဲ ရှိနေသေးတယ်လို့ သတင်းရင်းမြစ်တွေက ပြောပါတယ်။ သူမဟာ ၂၀၂၁ ခုနှစ် ဖေဖော်ဝါရီလ စစ်အာဏာသိမ်းပြီးနောက်ကတည်းက မတရားဖမ်းဆီးမှု၊ စွဲချက်မျိုးစုံနဲ့ ထောင်ဒဏ်ချမှတ်မှုတွေကို ခံနေခဲ့ရတာပါ။
အသက် ၈၀ အရွယ်ရှိလာပြီဖြစ်တဲ့ ဒေါ်အောင်ဆန်းစုကြည်ရဲ့ ကျန်းမာရေးအခြေအနေ ယိုယွင်းနေတယ်ဆိုတဲ့ သတင်းတွေလည်း ထွက်ပေါ်နေပြီး၊ သူမကို ဘယ်နေရာမှာ ထိန်းသိမ်းထားတယ်ဆိုတာ မရှင်းလင်းသေးတာကြောင့် သက်ရှိထင်ရှားရှိနေဆဲလားဆိုတဲ့ စိုးရိမ်မှုတွေ မြင့်တက်လာခဲ့ပါတယ်။ ဒါကြောင့် သူမ အသက်ရှင်နေကြောင်း အတည်ပြုဖို့ တောင်းဆိုတဲ့ လှုပ်ရှားမှုတွေလည်း ဖြစ်ပေါ်ခဲ့ပါတယ်။
နေအိမ်အကျယ်ချုပ် ပြောင်းရွှေ့မယ်ဆိုတဲ့ သတင်းကိုလည်း ရှေ့နေအဖွဲ့က အတည်ပြုထားပြီး ဧပြီ ၃၀ ရက်နေ့မှာ စစ်ကော်မရှင်ဘက်က ထိန်းချုပ်ထားတဲ့ မီဒီယာတွေက ကြေညာခဲ့တာပါ။ နှစ်အတော်ကြာအတွင်း ဒေါ်အောင်ဆန်းစုကြည်ရဲ့ ပထမဆုံး ဓာတ်ပုံကိုလည်း ထုတ်ပြန်ခဲ့ပါတယ်။
ရှေ့နေတွေက မေလ ၃ ရက်နေ့ တွေ့ဆုံမှုမှာ ဒေါ်အောင်ဆန်းစုကြည်ရဲ့ သဘောထားတွေကို မေးမြန်းဆွေးနွေးသွားမှာဖြစ်ပြီး လိုအပ်တဲ့ ပစ္စည်းတချို့ကိုလည်း ယူဆောင်သွားမယ်လို့ သိရပါတယ်။ အဆိုပါတွေ့ဆုံမှုဟာ ပုံမှန် ထောင်ဝင်စာတွေ့ဆုံမှုမျိုးမဟုတ်ဘဲ၊ ဥပဒေရေးရာဆွေးနွေးမှုများ ပါဝင်လာနိုင်တယ်လို့ သတင်းရင်းမြစ်တွေက ဆိုပါတယ်။
စစ်အာဏာသိမ်းပြီးနောက် ဒေါ်အောင်ဆန်းစုကြည်ကို လုံခြုံရေးတင်းကျပ်ထားတဲ့ တရားခွင်တွေမှာ စစ်ဆေးပြီး အဂတိမှု၊ ရွေးကောက်ပွဲမသမာမှု စတဲ့ စွဲချက်များနဲ့ ထောင်ဒဏ် ၃၃ နှစ်ချမှတ်ခဲ့ပါတယ်။ နောက်ပိုင်းမှာ အချို့ပြစ်ဒဏ်တွေ လျှော့ပေါ့ပေးခဲ့ပြီး လက်ရှိတွင် ပြစ်ဒဏ်အချို့ ဆက်လက်ကျန်ရှိနေပါတယ်။
နှစ်ဆန်းတစ်ရက်နေ့မှာတော့ စစ်ကော်မရှင်က လက်ကျန်ပြစ်ဒဏ်တချို့ကို ထပ်မံလျှော့ပေါ့မယ်လို့ ကြေညာခဲ့ပြီး အဲဒီနေ့မှာပဲ သမ္မတဦးဝင်းမြင့် ကိုလည်း ပြန်လွှတ်ပေးခဲ့ပါတယ်။
လက်ရှိတွင် စစ်ကော်မရှင်ခေါင်းဆောင် မင်းအောင်လှိုင်အပေါ် နိုင်ငံတကာက ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို ခြွင်းချက်မရှိ ပြန်လွှတ်ပေးရန် ဖိအားပေးမှုတွေ ဆက်လက်ရှိနေပါတယ်။
