ဩဂုတ် ၄၊ ၂၀၂၆ | New Day Myanmar
ဒေါ်အောင်ဆန်းစုကြည်နဲ့ အပြည်ပြည်ဆိုင်ရာ ကြက်ခြေနီကော်မတတီ (ICRC) ကိုယ်စားလှယ်တို့ တွေ့ဆုံမှုဟာ ကာလရှည်ကြာ ပျောက်ဆုံးနေခဲ့တဲ့ အသက်ရှင်လျက်ရှိကြောင်း အထောက်အထားကို ရရှိစေခဲ့ပေမယ့် ဒီတိုးတက်မှုတစ်ခုတည်းနဲ့ မလုံလောက်ဘူးလို့ ယူကေအစိုးရက ပြောပါတယ်။
ဒေါ်အောင်ဆန်းစုကြည်ရဲ့ အခြေအနေနဲ့ ပတ်သက်ပြီး အချိန်ကြာမြင့်စွာ မသေချာမှုတွေနဲ့ စိုးရိမ်ပူပန်မှုတွေ ရှိနေခဲ့ပြီးနောက် ICRC ရဲ့ တွေ့ဆုံမှုက သူမရဲ့ မိသားစုဝင်တွေနဲ့ ထောက်ခံအားပေးသူတွေအတွက် အသက်ရှင်လျက်ရှိကြောင်း အတည်ပြုနိုင်တဲ့ အထောက်အထားကို ယူဆောင်လာခဲ့တယ်လို့ ယူကေနိုင်ငံ အင်ဒို-ပစိဖိတ်ရေးရာဝန်ကြီး Baroness Winterton က ပြောပါတယ်။
“ဒါပေမဲ့ ဒီအချက်တစ်ခုတည်းနဲ့ မလုံလောက်ပါဘူး” လို့ သူက ဆိုပါတယ်။
ယူကေအစိုးရအနေနဲ့ ဒေါ်အောင်ဆန်းစုကြည်ကို ဆက်လက်ဖမ်းဆီးထိန်းသိမ်းထားတာနဲ့ ပတ်သက်ပြီး အလွန်အမင်း စိုးရိမ်ပူပန်နေဆဲဖြစ်သလို သူမနဲ့ မြန်မာနိုင်ငံမှာ မတရားဖမ်းဆီးထိန်းသိမ်းခံထားရသူအားလုံးကို ချက်ချင်းပြန်လွှတ်ပေးဖို့ ထပ်မံတောင်းဆိုထားပါတယ်။
ICRC ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် Arnaud de Baecque ဟာ ဩဂုတ် ၃ ရက်မှာ ဒေါ်အောင်ဆန်းစုကြည်ကို သွားရောက်တွေ့ဆုံခဲ့ပြီး တခြားသူမပါဘဲ သီးသန့်စကားပြောခွင့် ရရှိခဲ့တယ်လို့ ICRC က အတည်ပြုထားပါတယ်။
ဒါပေမဲ့ တွေ့ဆုံမှုအတွင်း ဒေါ်အောင်ဆန်းစုကြည်ရဲ့ ကျန်းမာရေးနဲ့ ထိန်းသိမ်းခံထားရတဲ့ အခြေအနေတွေကို ICRC က အများပြည်သူဆီ အသေးစိတ်ထုတ်ဖော်ပြောကြားထားခြင်း မရှိပါဘူး။
