၁၁ စက်တင်ဘာ၊ ၂၀၂၄
ထိုင်းနိုင်ငံမှာ အဖမ်းခံရပြီး စစ်ကောင်စီ လက်ထဲ အပ်ခံရတဲ့ လူငယ် ၂၉ ယောက်ကို စစ်မှုထမ်းဖို့အတွက် ခေါ်သွားရာ လမ်းမှာ ပြန်ပြီး ထွက်ပြေးလွတ်မြောက်လာတယ်လို့ Kwekalu News က ဖော်ပြထားပါတယ်။
ထိုင်းအာဏာပိုင်တွေက ဖမ်းဆီးပြီး စစ်ကောင်စီကို ပြန်အပ်ခဲ့ကြောင်း ၊ ပြန်အပ်ပြီးနောက်မှာ လူငယ် ၂၉ ဦးကို စစ်မှုထမ်းဖို့ လှေတစ်စီးနဲ့ တိုင်း ဗဟို ၁၂ ကို ခေါ်ဆောင်လာတုန်း လှေပေါ်က အစောင့် စစ်သား ၂ ဦးဆီက သေနတ်လုပြီး ပစ်သတ်ခဲ့တယ်လို့ သိရပါတယ်။
လှေပေါ်ပါလာသူ ၂၉ ဦးထဲက ၂ ဦး ပျောက်ဆုံးနေပြီး ၂၇ ဦးမှာ MA သေနတ် ၂ လက်ကို ယူဆောင်ကာ ကရင်အမျိုးသားအစည်းအရုံး (KNU) တပ်မဟာ ၄ မြိတ်-ထားဝယ်ခရိုင်ကို ရောက်လာတာဖြစ်တယ်လို့ သိရပါတယ်။
စက်တင်ဘာလ ၈ ရက်မှာ ပုလောမြို့နယ် ခန္တီရွာအနီးက ပင်လယ်ပြင်မှာ လှေအစောင့် စစ်သား နှစ်ယောက်ကို တိုက်ခိုက်ပြီး ထွက်ပြေးလာတာဖြစ်ပြီး KNU တပ်မဟာ ၄ တပ်ရင်း ၇ တပ်ခွဲ၅ ကို စက်တင်ဘာ ၉ ရက်က ရောက်ရှိလာတာ ဖြစ်ပါတယ်။
လာရောက်ပူးပေါင်းတဲ့ လူငယ် ၂၇ ဦးထဲက ၅ ဦးမှာ အိမ်ကို ပြန်ဖို့ ဆန္ဒရှိနေပြီး ၂၂ ဦးမှာ ပူးပေါင်းတိုက်ပွဲဝင် လိုကြတယ်လို့ KNU ဘက်က ထုတ်ပြန်ချက်အရ သိရပါတယ်။
ထိုင်းနိုင်ငံဘက်က အကြောင်းအမျိုးမျိုးနဲ့ အဖမ်းခံရသူတွေဟာ မြန်မာပြည်ကို ပြန်လွှဲခံရပြီး စစ်ကောင်စီက ဖမ်းဆီးခေါ်ဆောင်ပြီး အတင်း အဓမ္မစစ်မှုထမ်းခိုင်းနေကြတယ်လို့ ကော့သောင်းဘက်က လူမှုအဖွဲ့အစည်းတွေနဲ့ ဒေသခံတွေပြောဆိုမှုအရ သိရပါတယ်။
ပုံစာ – စစ်ကောင်စီလက်က ထွက်ပြေးလွတ်မြောက်လာတဲ့ လူငယ်များ
Photo – Kwekalu News
