ဩဂုတ် ၂၀၊ ၂၀၂၆ | New Day Myanmar
ထိုင်းနိုင်ငံ ပတ္တယားမြို့မှာ ခရီးဆောင်အိတ်တစ်လုံးထဲ ထည့်ပြီး ရထားလမ်းဘေး စွန့်ပစ်ထားတာ တွေ့ရှိခဲ့တဲ့ အသက် ၁၇ နှစ်အရွယ် ထိုင်းမိန်းကလေးဟာ အသက်ရှူကျပ်မှုကြောင့် သေဆုံးခဲ့တာဖြစ်တယ်လို့ ထိုင်းရဲတပ်ဖွဲ့က ရင်ခွဲစစ်ဆေးချက်ကို ကိုးကားပြီး အတည်ပြုပါတယ်။
သေဆုံးသူဟာ သန်ချနော့ ဒွန်ဟုမ်လာ (Thanchanok Donhomla) ဖြစ်ပြီး “Cake” လို့လည်း လူသိများပါတယ်။ သူ့ရုပ်အလောင်းကို ပြီးခဲ့တဲ့ ဇွန်လအတွင်း ပတ္တယားရထားလမ်းဘေးမှာ ခရီးဆောင်အိတ်အတွင်း ထည့်ထားတာ တွေ့ရှိခဲ့တာ ဖြစ်ပါတယ်။
ရဲတပ်ဖွဲ့ရဲ့ နောက်ဆုံးထုတ်ပြန်ချက်အရ ရင်ခွဲစစ်ဆေးမှုမှာ ဦးနှောက်ဒဏ်ရာတစ်ခု ရှိခဲ့ပြီး အသက်ရှူကျပ်မှုကြောင့် သေဆုံးခဲ့တာ တွေ့ရှိခဲ့ပါတယ်။ တခြားပြင်းထန်တဲ့ ဒဏ်ရာတွေတော့ မတွေ့ရဘူးလို့ ပတ္တယားမြို့ရဲစခန်းမှူးက ပြောထားပါတယ်။
ဒီအမှုနဲ့ ပတ်သက်ပြီး အသက် ၄၅ နှစ်အရွယ် သြစတြေးလျနိုင်ငံသား ဆိုင်မွန် ပီတာ ကာမန် (Simon Peter Carman) ကို လူသတ်မှုအပါအဝင် စွဲချက်တွေနဲ့ ဖမ်းဆီးထားပါတယ်။ ရဲအဆိုအရ သူဟာ မိန်းကလေးနဲ့ ပတ္တယားကမ်းခြေအနီးမှာ တွေ့ဆုံခဲ့ပြီးနောက် သူနေထိုင်တဲ့ ကွန်ဒိုဆီ ခေါ်ဆောင်သွားခဲ့တာ ဖြစ်ပါတယ်။
CCTV မှတ်တမ်းတွေအရ မိန်းကလေးဟာ ဇွန် ၂၅ ရက် မနက်အစောပိုင်းမှာ ကာမန်နဲ့အတူ ကွန်ဒိုထဲ ဝင်သွားခဲ့ပြီး နောက်ပိုင်းမှာ ကာမန်တစ်ဦးတည်း ခရီးဆောင်အိတ်နဲ့ ထွက်လာတာ တွေ့ရတယ်လို့ စုံစမ်းရေးဘက်က ဆိုပါတယ်။ မိန်းကလေးရဲ့ ရုပ်အလောင်းကိုတော့ ရထားလမ်းဘေးမှာ နောက်ပိုင်း တွေ့ရှိခဲ့ပါတယ်။
ရဲဘက်က DNA သက်သေအပါအဝင် အမှုဆိုင်ရာ သက်သေအထောက်အထားတွေကို စုဆောင်းထားပြီး စုံစမ်းစစ်ဆေးမှုကို ဩဂုတ် ၂၁ ရက်ဝန်းကျင်မှာ အပြီးသတ်ကာ အစိုးရရှေ့နေဆီ လွှဲပေးဖို့ မျှော်လင့်ထားပါတယ်။
ကာမန်ကတော့ စွဲချက်တွေကို ငြင်းဆိုထားပြီး ဖြစ်ရပ်ဟာ ကိုယ့်ကိုယ်ကိုယ်ကာကွယ်ရာက ဖြစ်ခဲ့တာလို့ ပြောထားပါတယ်။ ဒီအတွက် ရဲဘက်စွပ်စွဲချက်တွေကို တရားရုံးက အပြီးသတ်ဆုံးဖြတ်ရဦးမှာ ဖြစ်ပါတယ်။