၁၀ ဇွန် ၂၀၂၆ | New Day Myanmar
ရန်ကုန်မြို့မှာ အမေရိကန်သံရုံးက သံတမန်ဝန်ထမ်းတစ်ဦး သေဆုံးခဲ့ပြီးအဆိုပါဖြစ်စဉ်နဲ့ ပတ်သက်လို့ ထိုင်းအမျိုးသမီးတစ်ဦးကို မြန်မာရဲတပ်ဖွဲ့က ထိန်းသိမ်းစစ်ဆေးနေတယ်လို့ သံတမန်အသိုင်းအဝိုင်း သတင်းရင်းမြစ်တွေကို ကိုးကားပြီး နိုင်ငံတကာမီဒီယာတွေက ဖော်ပြထားပါတယ်။
အမေရိကန် နိုင်ငံခြားရေးဝန်ကြီးဌာနကတော့ ရန်ကုန်မြို့ရှိ အမေရိကန်သံရုံးမှာ တာဝန်ထမ်းဆောင်နေတဲ့ “အမေရိကန်အစိုးရဝန်ထမ်းတစ်ဦး သေဆုံးခဲ့တယ်” ဆိုတာကို အတည်ပြုခဲ့ပေမယ့် အမှုနဲ့ပတ်သက်တဲ့ အသေးစိတ်အချက်အလက်တွေကိုတော့ ထုတ်ဖော်ပြောကြားခြင်း မရှိသေးပါဘူး။
“မိသားစုဝင်တွေနဲ့ နီးစပ်သူတွေရဲ့ ကိုယ်ရေးကိုယ်တာအခွင့်အရေးကို လေးစားတဲ့အနေနဲ့ လက်ရှိအချိန်မှာ နောက်ထပ် သတင်းအချက်အလက်တွေ မပေးနိုင်သေးပါဘူး” လို့ အမေရိကန် နိုင်ငံခြားရေးဝန်ကြီးဌာနက ဖြေကြားထားပါတယ်။
မြန်မာနိုင်ငံရှိ သံတမန်အသိုင်းအဝိုင်းမှ အမည်မဖော်လိုတဲ့ သတင်းရင်းမြစ် သုံးဦးရဲ့ အဆိုအရ အဆိုပါ အမေရိကန်နိုင်ငံသားကို လွန်ခဲ့တဲ့ နှစ်ပတ်ခန့်က ရန်ကုန်မြို့ရှိ Sakura Residence & Hotel မှာ သေဆုံးနေတဲ့အခြေအနေနဲ့ တွေ့ရှိခဲ့တာ ဖြစ်တယ်လို့ သိရပါတယ်။
Sakura Residence & Hotel ဟာ သံတမန်တွေ၊ စီးပွားရေးလုပ်ငန်းရှင်တွေနဲ့ နိုင်ငံတကာဧည့်သည်တွေ အများအပြား တည်းခိုလေ့ရှိတဲ့ နေရာတစ်ခုဖြစ်ပြီး ရန်ကုန်မြို့ရှိ အမေရိကန်သံရုံးနဲ့ အနီးအနားမှာ တည်ရှိနေပါတယ်။
သံတမန်အသိုင်းအဝိုင်း သတင်းရင်းမြစ်တွေကတော့ မြန်မာရဲတပ်ဖွဲ့ဟာ အမှုကို လူသတ်မှုဖြစ်နိုင်ခြေရှိတဲ့ အမှုအဖြစ် စုံစမ်းစစ်ဆေးနေပြီး ထိုင်းနိုင်ငံသူတစ်ဦးကို ဖမ်းဆီးထိန်းသိမ်းထားတယ်လို့ ပြောဆိုထားပါတယ်။
လက်ရှိအချိန်အထိ မြန်မာအာဏာပိုင်တွေဘက်ကတော့ အမှုနဲ့ပတ်သက်ပြီး တရားဝင် သတင်းထုတ်ပြန်ထားခြင်း မရှိသေးပါဘူး။ Sakura Residence & Hotel တာဝန်ရှိသူတွေနဲ့ အဆိုပါနယ်မြေကို တာဝန်ယူထားတဲ့ ရဲစခန်းဘက်ကလည်း သတင်းမီဒီယာတွေရဲ့ မေးမြန်းမှုအပေါ် မှတ်ချက်ပေးဖို့ ငြင်းဆိုထားပါတယ်။
ဒါ့အပြင် ရန်ကုန်မြို့ရှိ ထိုင်းသံရုံးနဲ့ ထိုင်းနိုင်ငံ နိုင်ငံခြားရေးဝန်ကြီးဌာနတို့ကလည်း ဖမ်းဆီးထိန်းသိမ်းခံထားရတဲ့ ထိုင်းနိုင်ငံသူအတွက် ကောင်စစ်ဝန်ဆိုင်ရာ အကူအညီပေးထားခြင်း ရှိ၊ မရှိကို ထုတ်ဖော်ပြောဆိုခြင်း မရှိသေးဘူးလို့ သိရပါတယ်။
