စစ်ကော်မရှင် ပြုလုပ်မယ့် ရွေးကောက်ပွဲကို နိုင်ငံရေး၊ စစ်ရေး၊ လူထုလှုပ်ရှားမှု နည်းသဏ္ဍာန် ပေါင်းစုံနဲ့ ဆန့်ကျင်တိုက်ပွဲဝင်သွားကြဖို့ ကယန်းအမျိုးသားတပ်မတော်ဗဟိုဦးစီးကော်မတီက ဒီနေ့ ဩဂုတ် ၂၀ ရက်မှာ သဘောထားထုတ်ပြန်တိုက်တွန်းထားပါတယ်။
ဒီမိုကရေစီစံနှုန်းအရ ပြည်သူလူထုက ရွေးကောက်ထားတဲ့လူထုကိုယ်စားလှယ်တွေနဲ့ဖွဲ့စည်းထားတဲ့ လူထုအစိုးရကသာ လျှင် ရွေးကောက်ပွဲကျင်းပပိုင်ခွင့် အာဏာရှိတယ်လို့ ထုတ်ပြန်ထားပြီး၊ ဒီမိုကရေစီမရှိဘဲ ရွေးကောက်ပွဲမရှိဟု မိမိတို့ ကယန်းအမျိုးသားတပ်မတော်ကခံယူတယ်လို့ဖော်ပြထားပါတယ်။
ဒါကြောင့် ပြည်သူလူထုသဘောဆန္ဒမပါရှိဘဲ ပြုလုပ်နေတဲ့ စစ်ကော်မရှင်ရဲ့ရွေးကောက်ပွဲကို အတွေး အခေါ်အရဖြစ်စေ လုပ်ဟန်အရဖြစ်စေပြတ်ပြတ်သားသားဆန့်ကျင်တယ်လို့ ဆိုပါတယ်။
ဒါဟာစစ်ကော်မရှင်ကျင်းပမဲ့ ရွေးကောက်ပွဲနဲ့ပတ်သက်ပြီး ကယန်းအမျိုးသားတပ်မတော်ရဲ့ ရပ်တည်ချက် သဘောထားမှန်ဖြစ်တယ်လို့လည်း ဆိုထားပါတယ်။
ဓာတ်ပုံ- Kayan National Army-KNA
