၆ ဇူလိုင် ၂၀၂၆ | New Day Myanmar
ဗင်နီဇွဲလားနိုင်ငံမြောက်ပိုင်းမှာ ပြီးခဲ့တဲ့ ဇွန်လ ၂၄ ရက်က နှစ်ကြိမ်ဆက် လှုပ်ခတ်ခဲ့တဲ့ အင်အားပြင်းငလျင်တွေကြောင့် သေဆုံးသူ ၃,၃၄၂ ဦးအထိ မြင့်တက်လာတယ်လို့ ဗင်နီဇွဲလား ပြန်ကြားရေးဝန်ကြီးဌာနက ဇူလိုင် ၅ ရက်မှာ ထုတ်ပြန်ပါတယ်။
နောက်ဆုံးရစာရင်းအရ ထိခိုက်ဒဏ်ရာရသူ ၁၆,၄၇၀ ဦးရှိပြီး လူပေါင်း ၁၇,၃၄၅ ဦး အိုးမဲ့အိမ်မဲ့ဖြစ်ခဲ့ရပါတယ်။ အပျက်အစီးတွေအောက်မှာ ပိတ်မိနေသူတွေနဲ့ ပျောက်ဆုံးနေသူတွေကို ဆက်လက်ရှာဖွေနေတာကြောင့် သေဆုံးသူအရေအတွက် ထပ်မံမြင့်တက်လာနိုင်တယ်လို့ ခန့်မှန်းထားပါတယ်။
ဇွန်လ ၂၄ ရက်မှာ ပြင်းအား ၇ ဒသမ ၂ အဆင့်နဲ့ ၇ ဒသမ ၅ အဆင့်ရှိတဲ့ ငလျင်နှစ်ကြိမ်ဟာ အချိန်စက္ကန့်ပိုင်းသာခြားပြီး လှုပ်ခတ်ခဲ့တာဖြစ်ပါတယ်။ ငလျင်ဗဟိုချက်ဟာ မြို့တော် ကာရာကတ်စ်အနောက်ဘက် ယူမာရေမြို့အနီးမှာရှိပြီး ကမ်းရိုးတန်း လာဂွိုင်ရာပြည်နယ်က ထိခိုက်ပျက်စီးမှု အဆိုးရွားဆုံးဖြစ်ခဲ့ပါတယ်။
ငလျင်ကြောင့် အထပ်မြင့်အဆောက်အအုံတွေအပါအဝင် အဆောက်အအုံအများအပြား ပြိုကျခဲ့ပြီး နေအိမ်တွေ၊ ဆေးရုံတွေနဲ့ အခြေခံအဆောက်အအုံတွေ အကြီးအကျယ်ပျက်စီးခဲ့ပါတယ်။ ငလျင်လှုပ်ခတ်ပြီး ၁၁ ရက်ကျော်အကြာမှာ နိုင်ငံတကာကယ်ဆယ်ရေးအဖွဲ့တချို့ ရှာဖွေကယ်ဆယ်ရေးလုပ်ငန်းတွေ အဆုံးသတ်လာပေမယ့် ဒေသခံတွေက ပျောက်ဆုံးနေတဲ့ မိသားစုဝင်တွေကို အပျက်အစီးတွေအောက်မှာ ဆက်လက်ရှာဖွေနေကြပါတယ်။
ရုပ်အလောင်းတွေ များပြားလာတာကြောင့် ဆေးရုံရင်ခွဲရုံတွေနဲ့ ယာယီရုပ်အလောင်းထားရှိရာနေရာတွေမှာ နေရာမလုံလောက်တဲ့အခက်အခဲ ကြုံနေရပြီး အမည်မသိရသေးတဲ့ ရုပ်အလောင်းတွေကို ဖော်ထုတ်နိုင်ဖို့ မှုခင်းဆေးပညာအဖွဲ့တွေက အဝတ်အစား၊ အမာရွတ်နဲ့ တက်တူးတွေကို အခြေခံပြီး စစ်ဆေးနေကြပါတယ်။
ဗင်နီဇွဲလား ယာယီသမ္မတ ဒယ်လ်စီ ရိုဒရီဂွက်ဇ်က အစိုးရရဲ့ ကယ်ဆယ်ရေးတုံ့ပြန်မှု နှောင့်နှေးပြီး မလုံလောက်ဘူးဆိုတဲ့ ဝေဖန်မှုတွေကို ငြင်းဆိုခဲ့ပြီး ငလျင်လှုပ်ခတ်ပြီးချိန်ကစလို့ လုံခြုံရေးတပ်ဖွဲ့တွေကို ချက်ချင်းစေလွှတ်ခဲ့တယ်လို့ ပြောပါတယ်။ သဘာဝဘေးအန္တရာယ်နဲ့ အရေးပေါ်အခြေအနေတွေကို တုံ့ပြန်ဖို့ စစ်ဘက်ဆိုင်ရာတပ်ဖွဲ့အသစ်တခု ဖွဲ့စည်းမယ်လို့လည်း ကြေညာထားပါတယ်။
