Sky Villa Condo ကိုငလျင်ဒဏ်ခံနိုင်ဆိုပြီး လိမ်ရောင်းခဲ့တဲ့ I Myanmar House ကိုကျန်ရစ်ခဲ့တဲ့ အခန်းပိုင်ရှင်တွေကတရားစွဲဆိုသွားမယ်လို့ သိရပါတယ်။
အဆိုပါ Sky Villa ကို N.T.L construction group ကတည်ဆောက်ထားတာဖြစ်ပြီး I Myanmar House ကရောင်းချထားတာဖြစ်ပါတယ်။
ငလျင်ဒဏ်ခံ ဖောင်ဒေးရှင်းနဲ့ ဘိုးဘွားပိုင်မြေပေါ် ပိုင်ဆိုင်မှုအခိုင်အမာဆောက်လုပ်ထားလို့ နောင်ရေးအတွက်စိတ်အေးရတယ်ဆိုပြီး I Myanmar House ကရောင်းချထားတာပါ။
Sky villa condo ဟာ (လမ်း 60၊ 23-24 ကြား)မှာတည်ရှိပါတယ်။
ငလျင်ဒဏ်ခံနိုင်တယ်ဆိုပြီး ရောင်းချခဲ့တဲ့ Sky villa Condo ဟာ ၂၀၂၅ ခုနှစ် မတ် ၂၈ ရက်က လှုပ်ခတ်ခဲ့တဲ့ငလျင်ကြောင့် ဇုန် A ဟာ ၆ ထပ်ထိမြေကြီးထဲရောက်သွားခဲ့ပြီး ဇုန် B၊ C၊ D ဟာလုံးဝပြိုကျသွားခဲ့ကာ လူပေါင်းရာချီသေဆုံးခဲ့တာဖြစ်ပါတယ်။
“သူတို့ရောင်းတုန်းက ငလျင်ဒဏ်ခံနိုင်တယ်ဆိုပြီးရောင်းတာ။ အခုဖြစ်သွားတော့ ဘယ်သူ့သွားပြောရမလဲ။ အထဲမှာ အန်တီ့သားမိသားစုအကုန်ပါသွားတာ။ ခုချိန်ထိ Dead Body ပြန်မရဘူး” လို့ ဇုန် A ပြိုကျမှုမှာပါဝင်သွားတဲ့ မိသားစုဝင်တဦးက New Day Myanmar ကိုပြောပါတယ်။
Sky villa condo ဟာ ဖို့မြေပေါ်တည်ဆောက်ထားတာဖြစ်ပြီး ၇ ပေသာ မြေကြီးဖို့ထားတာဖြစ်လို့ မြေသားပျော့တဲ့အထဲပါတယ်လို့ အနီးအနားဘုန်းကြီးကျောင်းက တိုက်အုပ်ဆရာတော်က မိန့်ပါတယ်။
N.T.L construction group နဲ့ I Myanmar House ကို New Day Myanmar က ဖုန်းဆက်သွယ်ခဲ့ပေမယ့်မရရှိခဲ့ပါဘူး။
ပုံစာ – ငလျင်အပြီးပြိုကျပျက်စီးနေသော Sky Villa Condo
ဓါတ်ပုံ – လူမှုကွန်ရက်
