ဩဂုတ် ၁၈၊ ၂၀၂၆ | New Day Myanmar
စစ်အုပ်စုခေါင်းဆောင်ကနေ သမ္မတရာထူး ရယူထားတဲ့ မင်းအောင်လှိုင်ဟာ စက်တင်ဘာလအစောပိုင်းမှာ ကမ္ဘောဒီးယားနိုင်ငံကို တရားဝင်ခရီးစဉ် သွားရောက်ဖို့ စီစဉ်ထားတယ်လို့ ကမ္ဘောဒီးယားဘက် သတင်းတွေမှာ ဖော်ပြပါတယ်။
ခရီးစဉ်ရက်အတိအကျနဲ့ တွေ့ဆုံမယ့် ကမ္ဘောဒီးယားခေါင်းဆောင်တွေ၊ ဆွေးနွေးမယ့် အကြောင်းအရာအသေးစိတ်ကိုတော့ ဩဂုတ် ၁၈ ရက်အထိ တရားဝင်အပြည့်အစုံ မထုတ်ပြန်သေးပါဘူး။
ဒါပေမယ့် ကမ္ဘောဒီးယားတာဝန်ရှိသူတွေကို ကိုးကားထားတဲ့ သတင်းတွေမှာ မင်းအောင်လှိုင်ဟာ စက်တင်ဘာအစောပိုင်းမှာ နိုင်ငံတော်အဆင့် ခရီးစဉ်လာရောက်ဖို့ မျှော်လင့်ထားတယ်လို့ ဖော်ပြထားပါတယ်။
မင်းအောင်လှိုင်ဟာ လတ်တလောမှာ ရုရှားနိုင်ငံကို သွားရောက်နေပြီး ရုရှားသမ္မတ ဗလာဒီမာ ပူတင်အပါအဝင် ထိပ်တန်းတာဝန်ရှိသူတွေနဲ့ နှစ်နိုင်ငံဆက်ဆံရေး၊ စီးပွားရေး၊ လုံခြုံရေးနဲ့ လူမှုရေးကဏ္ဍတွေ ဆွေးနွေးဖို့ ရှိနေပါတယ်။
၂၀၂၆ ခုနှစ် ဧပြီလမှာ သမ္မတရာထူး ရယူပြီးနောက် မင်းအောင်လှိုင်ဟာ နိုင်ငံတကာခရီးစဉ်တွေ သိသိသာသာ တိုးလုပ်လာပြီး အိန္ဒိယ၊ တရုတ်၊ လာအိုနဲ့ ထိုင်းနိုင်ငံတို့ကို သွားရောက်ခဲ့ပါတယ်။ ဇွန်လမှာ တရုတ်နိုင်ငံကို ငါးရက်ကြာ သွားရောက်ပြီး ရှီကျင့်ဖျင်နဲ့ တွေ့ဆုံခဲ့သလို ဇူလိုင်လမှာ လာအိုနိုင်ငံကို သွားရောက်ခဲ့ပါတယ်။
ဩဂုတ် ၆ ရက်နဲ့ ၇ ရက်မှာတော့ ထိုင်းနိုင်ငံကို သွားရောက်ပြီး ဝန်ကြီးချုပ် အနုတင် ချန်ဝီရာကွန်နဲ့ တွေ့ဆုံကာ နယ်စပ်ပြဿနာ၊ ကုန်သွယ်ရေးနဲ့ မြန်မာနိုင်ငံကို အာဆီယံနဲ့ ပြန်လည်ထိတွေ့ဆက်ဆံရေးဆိုင်ရာ အကြောင်းအရာတွေ ဆွေးနွေးခဲ့ပါတယ်။ အဲဒီခရီးစဉ်ကို မင်းအောင်လှိုင်ရဲ့ နိုင်ငံတကာအသိအမှတ်ပြုမှု ရရှိရေးကြိုးပမ်းချက်တစ်ခုအဖြစ် ဝေဖန်သူတွေနဲ့ လေ့လာသူတချို့က သုံးသပ်ခဲ့ပါတယ်။
လာမယ့် ကမ္ဘောဒီးယားခရီးစဉ်ဟာလည်း မင်းအောင်လှိုင်အတွက် အာဆီယံအဖွဲ့ဝင်နိုင်ငံတစ်နိုင်ငံနဲ့ တိုက်ရိုက်ဆက်ဆံရေး ထပ်မံတိုးမြှင့်နိုင်မယ့် အခွင့်အရေး ဖြစ်လာမှာပါ။ ၂၀၂၁ စစ်အာဏာသိမ်းပြီးနောက် အာဆီယံက မြန်မာစစ်အုပ်စုရဲ့ ထိပ်တန်းခေါင်းဆောင်တွေကို အဆင့်မြင့်အစည်းအဝေးတွေ တက်ရောက်ခွင့် ကန့်သတ်ထားခဲ့ပေမယ့် ၂၀၂၆ ခုနှစ်မှာတော့ အဖွဲ့ဝင်နိုင်ငံတချို့နဲ့ နှစ်နိုင်ငံအဆင့် ဆက်ဆံရေးတွေ ပြန်တိုးလာနေတာ တွေ့ရပါတယ်။
အိန္ဒိယ၊ တရုတ်၊ လာအို၊ ထိုင်း၊ ရုရှားနဲ့ အခု ကမ္ဘောဒီးယားအထိ ဆက်တိုက်သွားရောက်လာတဲ့ မင်းအောင်လှိုင်ရဲ့ နိုင်ငံခြားခရီးစဉ်တွေကို စစ်အုပ်စုဦးဆောင်တဲ့ အစိုးရအတွက် နိုင်ငံတကာတရားဝင်မှုနဲ့ ဒေသတွင်းအသိအမှတ်ပြုမှု ပိုမိုရရှိရေး ကြိုးပမ်းမှုတစ်စိတ်တစ်ပိုင်းအဖြစ် သုံးသပ်မှုတွေ ရှိနေပါတယ်။
ပုံစာ – ၂၀၂၂ ခုနှစ်၊ ဇန်နဝါရီ ၇ ရက်က နေပြည်တော်တွင် ကျင်းပခဲ့သော ညစာစားပွဲတစ်ခုအတွင်း ကမ္ဘောဒီးယားဝန်ကြီးချုပ် ဟွန်ဆန် (ညာ) နှင့် မြန်မာစစ်တပ်ခေါင်းဆောင် မင်းအောင်လှိုင်တို့ လက်ဆွဲနှုတ်ဆက်နေစဉ်။ (ကမ္ဘောဒီးယား အမျိုးသားရုပ်မြင်သံကြား (TVK) / AFP)