၂၁ ဇူလိုင် ၂၀၂၆ | New Day Myanmar
တောင်တရုတ်ပင်လယ်က နယ်မြေပိုင်ဆိုင်မှုအငြင်းပွားနေတဲ့ Second Thomas Shoal အနီးမှာ နှစ်နိုင်ငံတပ်ဖွဲ့ဝင်တွေ ထိပ်တိုက်တွေ့ခဲ့ပြီးနောက် တရုတ်နဲ့ ဖိလစ်ပိုင်တို့က တဖက်နိုင်ငံရဲ့ သံအမတ်တွေကို ဇူလိုင် ၂၁ ရက်မှာ အပြန်အလှန်ဆင့်ခေါ်ကန့်ကွက်ခဲ့ကြပါတယ်။
တရုတ်နိုင်ငံခြားရေးဝန်ကြီးဌာနက ဘေဂျင်းမှာရှိတဲ့ ဖိလစ်ပိုင်သံအမတ်ကို ဆင့်ခေါ်ပြီး ဇူလိုင် ၂၀ ရက် ဖြစ်စဉ်ကို ဖိလစ်ပိုင်ဘက်က စတင်ရန်စခဲ့တာဖြစ်တယ်လို့ ကန့်ကွက်ပြောဆိုခဲ့ပါတယ်။ ဖိလစ်ပိုင်ဘက်က အဖြစ်မှန်ကို ပြောင်းပြန်လှန်ပြီး တရုတ်နိုင်ငံကို ပြန်လည်စွပ်စွဲနေတယ်လို့လည်း ဆိုပါတယ်။
အဲဒီနောက် ဖိလစ်ပိုင်သမ္မတ ဖာဒီနန်မားကို့စ် ဂျူနီယာကလည်း မနီလာမှာရှိတဲ့ တရုတ်သံအမတ် Jing Quan ကို ဇူလိုင် ၂၁ ရက် ညနေ ၅ နာရီမှာ ဆင့်ခေါ်ခဲ့ကြောင်း သမ္မတဆက်သွယ်ရေးအရာရှိက အတည်ပြုပါတယ်။
ဖိလစ်ပိုင်ဘက်ကတော့ တရုတ်ကမ်းခြေစောင့်တပ်ဖွဲ့ဝင်တဦးဟာ ဖိလစ်ပိုင်ရေတပ်သားတဦးရဲ့ ဦးခေါင်းကို သစ်သားတုတ်နဲ့ အကြမ်းဖက်ရိုက်နှက်ခဲ့ပြီး ရော်ဘာလှေတစင်းလည်း ပျက်စီးခဲ့တယ်လို့ စွပ်စွဲထားပါတယ်။ ဒဏ်ရာရတဲ့ ရေတပ်သားကို Second Thomas Shoal မှာရှိတဲ့ ဖိလစ်ပိုင်စစ်စခန်းကနေ ပြန်လည်သယ်ဆောင်ခဲ့ရပါတယ်။
တရုတ်ကမ်းခြေစောင့်တပ်ကတော့ BRP Sierra Madre သင်္ဘောကနေ ထွက်လာတဲ့ ဖိလစ်ပိုင်ရော်ဘာလှေနှစ်စင်းက တရုတ်ကင်းလှည့်လှေကို ဝင်တိုက်ခဲ့ပြီး ဖိလစ်ပိုင်တပ်ဖွဲ့ဝင်တွေက လှော်တက်နဲ့ တုတ်ရှည်တွေသုံးကာ တရုတ်အရာရှိတွေကို စတင်တိုက်ခိုက်ခဲ့တယ်လို့ တုံ့ပြန်ထားပါတယ်။ ဒဏ်ရာရသူကို လွှဲပြောင်းသယ်ဆောင်ခွင့်ပေးခဲ့တာဟာ လူသားချင်းစာနာမှုအရဖြစ်တယ်လို့လည်း ဆိုပါတယ်။
ဖိလစ်ပိုင်စစ်တပ်က တရုတ်ဘက်ရဲ့ပြောဆိုချက်တွေဟာ မှားယွင်းပြီး အထင်အမြင်လွဲမှားစေတယ်လို့ ငြင်းဆိုထားပြီး မိမိတို့တပ်ဖွဲ့ဝင်တွေက ထိပ်တိုက်တွေ့မှုကို စတင်ခဲ့တာမဟုတ်ဘူးလို့ ပြောပါတယ်။ နှစ်ဖက်ပြောဆိုချက်တွေ ကွဲလွဲနေတာကြောင့် ဖြစ်စဉ်အစအဆုံးကို သီးခြားအတည်ပြုနိုင်ခြင်း မရှိသေးပါဘူး။
Second Thomas Shoal ကို ဖိလစ်ပိုင်က Ayungin Shoal၊ တရုတ်က Ren’ai Reef လို့ ခေါ်ဆိုကြပါတယ်။ ဖိလစ်ပိုင်က ၁၉၉၉ ခုနှစ်မှာ ရည်ရွယ်ချက်ရှိရှိ သောင်တင်ထားခဲ့တဲ့ BRP Sierra Madre စစ်သင်္ဘောပေါ်မှာ တပ်ဖွဲ့ဝင်တွေချထားပြီး နယ်မြေပိုင်ဆိုင်မှုကို ထိန်းသိမ်းထားပါတယ်။
တောင်တရုတ်ပင်လယ်တခုလုံးနီးပါးကို တရုတ်က ပိုင်ဆိုင်ကြောင်းဆိုထားပေမဲ့ ၂၀၁၆ ခုနှစ် နိုင်ငံတကာခုံသမာဓိအဖွဲ့ရဲ့ ဆုံးဖြတ်ချက်မှာ တရုတ်ရဲ့ကျယ်ပြန့်တဲ့ ပိုင်ဆိုင်မှုတောင်းဆိုချက်တွေအတွက် ဥပဒေအခြေခံမရှိဘူးလို့ ဆုံးဖြတ်ထားပါတယ်။ တရုတ်နိုင်ငံကတော့ အဲဒီဆုံးဖြတ်ချက်ကို အသိအမှတ်မပြုပါဘူး။
