မြန်မာစစ်ခေါင်းဆောင်မင်းအောင်လှိုင်ကို ဘင်္ဂလားပင်လယ်အော် ဒေသနိုင်ငံများ နည်းပညာနဲ့ စီးပွားရေး ပူးပေါင်းဆောင်ရွက်ရေးအဖွဲ့ BIMSTEC ၆ ကြိမ်မြောက်အစည်းအဝေးတက်ဖို့ ဖိတ်ကြားခဲ့တဲ့ကိစ္စနဲ့ပတ်သက်ပြီး ထိုင်းဝန်ကြီးချုပ် ပေထောင်တန်နာဝပ်ထရာ ဖြေရှင်းဖို့အတွက် ထိုင်းလွှတ်တော်အမတ် ကနာဝီက ပြောလိုက်ပါတယ်။
ဧပြီ ၃ ရက်က ထိုင်းလွှတ်တော်မှာပြုလုပ်တဲ့အစည်းအဝေးအတွင်း ထိုင်းလွှတ်တော်အမတ် ကနာဝီက ဝန်ကြီးချုပ် ပေထောင်တန်အနေနဲ့ ဒီလိုဖိတ်ကြားမှုအတွက် အကြောင်းပြချက် ကောင်းကောင်းပေးဖို့ ပြင်ဆင်ထားရမယ်လို့ ပြောလိုက်တာဖြစ်ပါတယ်။
“မြန်မာစစ်အာဏာရှင်ကို တရုတ်နဲ့ ရုရှားကလွဲလို့ ဘယ်နိုင်ငံကမှ အဖက်လုပ်ပြီး မဖိတ်ပါဘူး။ ထိုင်းနိုင်ငံဟာ နိုင်ငံတကာ စင်မြင့်မှာ အကဲဆတ်တာကို လုပ်လိုက်တာပဲ။ အခု စစ်အာဏာရှင်ခြေချတဲ့ တတိယနိုင်ငံဟာ ထိုင်းနိုင်ငံဖြစ်ပြီ။”လို့ သူက မစ္စတာ ကနာဝီကပြောပါတယ်။
“မြန်မာနိုင်ငံမှာ လျင်လှုပ်ပြီး ၂ မိနစ်အကြာ မှာပဲ ဗိုလ်ချုပ်မှူးကြီး မင်းအောင်လှိုင်က အရပ်သားတွေကို ဗုံးကျဲခဲ့တယ်။ ၂၈ ရက်နေ့က ၃၁ ရက်နေ့အထိ တိုက်ခိုက်မှု ၂၀ ဖြစ်ပွားခဲ့ပြီး ၁၂ ဦး သေဆုံးခဲ့ပါတယ်။ မနေ့ကအထိ ဆိုရင် တိုက်ခိုက်မှု ၄၈ ကြိမ်ရှိတယ်။”လို့သူကဆက်ပြောပါတယ်။
နိုင်ငံတကာ စင်မြင့်မှာ ထိုင်းနိုင်ငံက ဗိုလ်ချုပ်မှူးကြီး မင်းအောင်လှိုင်ကို ဘာလို့ တရားဝင်ဖိတ်ကြားတာလဲ ဆိုတာ ထိုင်းဝန်ကြီးချုပ်က ရှင်းပြဖို့ ပြင်ဆင်ထားပါလို့လည်း သူကပြောပါတယ်။
ဓါတ်ပုံ – matichonweekly
