ဩဂုတ် ၂၀၊ ၂၀၂၆ | New Day Myanmar

ထိုင်းနိုင်ငံကို တရားဝင်ခရီးစဉ် ရောက်ရှိနေတဲ့ မြန်မာစစ်တပ် ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦး ကို ထိုင်းတပ်မတော်က ဩဂုတ် ၁၉ ရက်မှာ သုံးတပ်ပေါင်း ဂုဏ်ပြုတပ်ဖွဲ့နဲ့ ကြိုဆိုခဲ့ပြီး နှစ်နိုင်ငံစစ်တပ်ကြား ပူးပေါင်းဆောင်ရွက်ရေးကို တိုးမြှင့်ဖို့ ဆွေးနွေးခဲ့ပါတယ်။

ရဲဝင်းဦးဟာ မြန်မာစစ်တပ် ကာကွယ်ရေးဦးစီးချုပ်အဖြစ် တာဝန်ယူပြီးနောက် ပထမဆုံး နိုင်ငံခြားခရီးစဉ်အဖြစ် ထိုင်းနိုင်ငံကို ရွေးချယ်ခဲ့တာ ဖြစ်ပြီး ထိုင်းတပ်မတော် ကာကွယ်ရေးဦးစီးချုပ် ဗိုလ်ချုပ်ကြီး အူကရစ် ဘွန်တနွန် နဲ့ ဘန်ကောက်က ထိုင်းတပ်မတော်ဌာနချုပ်မှာ တွေ့ဆုံခဲ့ပါတယ်။

တွေ့ဆုံမှုမှာ လုံခြုံရေး၊ စစ်ဘက်ပညာရေးနဲ့ လေ့ကျင့်ရေးအပြင် သဘာဝသယံဇာတ၊ ပတ်ဝန်းကျင်နဲ့ စွမ်းအင်ဆိုင်ရာ ပူးပေါင်းဆောင်ရွက်ရေးတွေကို ဆွေးနွေးခဲ့ပါတယ်။ ထိုင်းဘက်က မြန်မာစစ်တပ်အရာရှိတွေ ထိုင်းတပ်မတော်ရဲ့ စစ်ဘက်ပညာရေးအဖွဲ့အစည်းတွေမှာ ဆက်လက်တက်ရောက်သင်ကြားနေတာကို ကြိုဆိုပြီး နောင်ဖွင့်လှစ်မယ့် Joint Staff Course မှာ မြန်မာစစ်တပ်အရာရှိတွေအတွက် နေရာပေးဖို့လည်း အသင့်ရှိတယ်လို့ ပြောပါတယ်။

ဒါ့အပြင် မြန်မာစစ်တပ်ဝန်ထမ်းတွေအတွက် ဒီပလိုမာနဲ့ ဘွဲ့ကြိုအဆင့် ထိုင်းဘာသာစကားသင်တန်းတွေ ဖွင့်လှစ်ပေးနိုင်ရေး ကိုပါ နှစ်ဖက်ဆွေးနွေးခဲ့ပြီး စစ်တပ်နှစ်ရပ်ကြား နားလည်မှု ပိုမိုတိုးမြှင့်ဖို့ ရည်ရွယ်တယ်လို့ ထိုင်းဘက်က ဆိုပါတယ်။

နယ်စပ်လုံခြုံရေးကိစ္စမှာလည်း Township Border Committee (TBC) နဲ့ Regional Border Committee (RBC) လို လက်ရှိရှိနေတဲ့ စစ်ဘက်ယန္တရားတွေကို အသုံးပြုပြီး နယ်စပ်ပြဿနာတွေ ဖြေရှင်းဖို့ နှစ်ဖက်က အလေးထားပြောဆိုခဲ့ပါတယ်။ တောမီး၊ မီးခိုးမြူနဲ့ ရေကြီးမှုလို နှစ်နိုင်ငံပြည်သူတွေကို ထိခိုက်စေတဲ့ ပြဿနာတွေမှာလည်း ပူးပေါင်းဆောင်ရွက်ဖို့ ဆွေးနွေးခဲ့ပါတယ်။

ရဲဝင်းဦးကတော့ ထိုင်းနိုင်ငံကို ပထမဆုံးတရားဝင်ခရီးစဉ် လာရောက်ရတာကို ဂုဏ်ယူကြောင်းပြောပြီး ၉ ကြိမ်မြောက် ထိုင်း-မြန်မာ အဆင့်မြင့်ကော်မတီအစည်းအဝေး (High Level Committee – HLC) ကို တက်ရောက်ဖို့ ဖြစ်တယ်လို့ ဆိုပါတယ်။ Matichon ရဲ့ ဖော်ပြချက်အရ HLC အစည်းအဝေးကို ဩဂုတ် ၂၀ ရက်ကနေ ၂၁ ရက်အထိ ကျင်းပမှာ ဖြစ်ပါတယ်။

ထိုင်းအစိုးရရဲ့ ဩဂုတ် ၇ ရက် ပူးတွဲကြေညာချက်မှာတော့ ၉ ကြိမ်မြောက် HLC အစည်းအဝေးကို ဩဂုတ် ၁၉ ရက်ကနေ ၂၁ ရက်အထိ ဘန်ကောက်မှာ ကျင်းပမယ်လို့ ဖော်ပြထားတာကြောင့် ဖွင့်ပွဲနဲ့ အဓိကဆွေးနွေးပွဲရက် သတ်မှတ်ပုံမှာ သတင်းရင်းမြစ်နှစ်ခုကြား အနည်းငယ်ကွာခြားနေပါတယ်။

ထိုင်းနဲ့ မြန်မာတို့ဟာ ဩဂုတ် ၂၄ ရက်မှာ သံတမန်ဆက်ဆံရေး ထူထောင်တာ ၇၈ နှစ်ပြည့် မှာဖြစ်ပြီး ထိုင်းဘက်က အခုတွေ့ဆုံမှုကို နှစ်နိုင်ငံစစ်တပ်ကြား နီးကပ်တဲ့ဆက်ဆံရေး ဆက်လက်ခိုင်မာစေဖို့ အရေးပါတဲ့ အခွင့်အရေးအဖြစ် သတ်မှတ်ထားပါတယ်။

မြန်မာနိုင်ငံမှာ ၂၀၂၁ စစ်အာဏာသိမ်းမှုနောက်ပိုင်း စစ်အုပ်စုနဲ့ တော်လှန်ရေးအင်အားစုတွေကြား တိုက်ပွဲတွေ ဆက်လက်ဖြစ်ပွားနေချိန်မှာ ထိုင်းဘက်က မြန်မာစစ်တပ်အရာရှိတွေကို စစ်ဘက်ပညာရေးနဲ့ လေ့ကျင့်ရေးအခွင့်အလမ်းတွေ ဆက်ပေးဖို့ အခုလို ပြောဆိုလာတာ ဖြစ်ပါတယ်။