၁၉ ဇွန် ၂၀၂၆ | New Day Myanmar
ဒေါ်အောင်ဆန်းစုကြည်အပါအဝင် မြန်မာနိုင်ငံမှာ မတရားဖမ်းဆီးထိန်းသိမ်းခံထားရသူအားလုံးကို ချက်ချင်းပြန်လွှတ်ပေးဖို့ ယူကေအစိုးရက တောင်းဆိုလိုက်ပါတယ်။
ဒေါ်အောင်ဆန်းစုကြည်ရဲ့ ၈၁ နှစ်ပြည့်မွေးနေ့ဖြစ်တဲ့ ဇွန်လ ၁၉ ရက်မှာ ယူကေရဲ့ အင်ဒို-ပစိဖိတ်ရေးရာဝန်ကြီး Seema Malhotra က မြန်မာနိုင်ငံအတွင်း ဆက်လက်ဖြစ်ပွားနေတဲ့ လူ့အခွင့်အရေးချိုးဖောက်မှုတွေအပေါ် ထောက်ပြပြောဆိုရင်း အခုလို တောင်းဆိုခဲ့တာ ဖြစ်ပါတယ်။
ဒေါ်အောင်ဆန်းစုကြည်ဟာ သူမရဲ့ ၈၁ နှစ်ပြည့်မွေးနေ့မှာပင် ပြင်ပလောကနဲ့ အဆက်အသွယ်ဖြတ်တောက်ခံထားရပြီး စစ်အုပ်စုရဲ့ ထိန်းသိမ်းမှုအောက်မှာ ဆက်လက်ရှိနေဆဲဖြစ်တယ်လို့ Seema Malhotra က ဆိုပါတယ်။
ယူကေအစိုးရအနေနဲ့ ဒေါ်အောင်ဆန်းစုကြည်နဲ့အတူ နိုင်ငံရေးအကြောင်းပြချက်တွေနဲ့ မတရားဖမ်းဆီးခံထားရသူအားလုံးကို ချက်ချင်းလွှတ်ပေးဖို့ တောင်းဆိုတယ်လို့လည်း ပြောထားပါတယ်။
ဒေါ်အောင်ဆန်းစုကြည်ဟာ ၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းတဲ့နေ့ကတည်းက ဖမ်းဆီးထိန်းသိမ်းခံထားရပြီး မိသားစုဝင်တွေ၊ ရှေ့နေတွေနဲ့ လွတ်လပ်တဲ့ ဆေးဘက်ဆိုင်ရာအဖွဲ့တွေကို ပုံမှန်တွေ့ဆုံခွင့် မရရှိသေးပါဘူး။
သူမရဲ့ လက်ရှိတည်နေရာ၊ ကျန်းမာရေးနဲ့ ဘေးကင်းကောင်းမွန်မှုအခြေအနေကိုလည်း လွတ်လပ်တဲ့အဖွဲ့အစည်းတွေက ယုံကြည်စိတ်ချရစွာ အတည်ပြုနိုင်ခြင်း မရှိသေးပါဘူး။
မြန်မာနိုင်ငံအတွင်း စစ်အုပ်စုရဲ့ ဖမ်းဆီးဖိနှိပ်မှုတွေကြောင့် နိုင်ငံရေးခေါင်းဆောင်တွေ၊ တက်ကြွလှုပ်ရှားသူတွေနဲ့ ပြည်သူအများအပြား ထိန်းသိမ်းခံနေရဆဲဖြစ်ပြီး နိုင်ငံတကာအစိုးရတွေနဲ့ အဖွဲ့အစည်းတွေက သူတို့ကို ပြန်လွှတ်ပေးဖို့ ဆက်တိုက်တောင်းဆိုနေကြပါတယ်။
