ထိုင်းနိုင်ငံ ဘန်ကောက်မြို့လယ်က Bangkok Art and Culture Centre ရှေ့မှာ “နင့်ကို ငါတို့ မကြိုဆိုဘူး လူသတ်ကောင် မင်းအောင်လှိုင်”လို့ မြန်မာလို ရေးသားထားတဲ့ ဆိုင်းဘုတ်တွေကိုင်ပြီး ဧပြီ ၄ ရက် ညပိုင်းမှာ ထိုင်းလူငယ်တွေ ဆန္ဒပြခဲ့ကြတယ်လို့ သိရပါတယ်။
“Mik Luang Rim Nam and Fire Ram Thung” အဖွဲ့ရဲ့ ထိုင်းလူငယ်တွေက ဆန္ဒပြခဲ့ကြတာဖြစ်ပြီး သွေးစွန်းနေတဲ့အဖြူရောင်ဝတ်စုံများဝတ်ဆင်ထားတဲ့ လူငယ်တွေကလည်း လက်သုံးချောင်းထောင်ကာ ဆန္ဒပြခဲ့ကြတယ်လို့ဆိုကြပါတယ်။
ဧပြီ ၄ ရက်မနက်ပိုင်းမှာ မင်းအောင်လှိုင် တည်းခိုတဲ့ ဘန်ကောက်က ဟိုတယ်အနီး တံတားပေါ်မှာ စစ်ခေါင်း ဆောင် “လူသတ်သမားမင်းအောင်လှိုင် ငါတို့မကြိုဆို” ဆိုတဲ့ စာခတန်းချိတ်ဆွဲ ဆန္ဒပြခဲ့ကြပါတယ်။
ဒါ့ပြင် ညနေပိုင်းမှာလည်း ထိုင်းတက္ကသိုလ်ကျောင်းသား တဦးက BIMSTEC အစည်း စအဝေးကျင်းပရာ ရှန်ဂီလာဟိုတယ်အထိ လာရောက်ပြီး အပြစ်မဲ့ ပြည်သူ ၆၀၀၀ ကျော်ကို သတ်ဖြတ်ထားတဲ့ သွေးစွန်းနေတဲ့ မင်းအောင် လှိုင်ကို ထိုင်းဝန်ကြီးချုပ်က ကြိုဆိုတာ မရှက်ဘူးလား လို့ ပြောဆို ဆန္ဒပြခဲ့ပါတယ်။
ဝရမ်းထုတ်ခံထားရတဲ့ စစ်ခေါင်းဆောင် မင်းအောင်လှိုင်ဟာ ထိုင်းနိုင်ငံ ဘန်ကောက်မြို့မှာ ကျင်းပနေတဲ့ ၆ ကြိမ်မြောက် BIMSTEC အစည်းအဝေးကို ထိုင်းဝန်ကြီးချုပ်ရဲ့ ဖိတ်ကြားချက်အရ တက်ရောက်ခဲ့ပြီး အစည်းအဝေးပြီးတာနဲ့ မြန်မာနိုင်ငံကို ညတွင်းပြန်သွားခဲ့တယ်လို့ သိရပါတယ်။
