၃၀ ဇူလိုင် ၂၀၂၆ | New Day Myanmar
ထိုင်းနိုင်ငံမှာ ၂၀၂၆ ခုနှစ်အတွင်း HIV နဲ့အတူ နေထိုင်သူ (People Living with HIV—PLHIV) စုစုပေါင်း ၅၅၇,၉၉၃ ဦးရှိမယ်လို့ ထိုင်းနိုင်ငံ ရောဂါထိန်းချုပ်ရေးဦးစီးဌာနရဲ့ အမျိုးသားအဆင့် ခန့်မှန်းချက်မှာ ဖော်ပြထားပါတယ်။
အဲဒီအရေအတွက်ဟာ ခရိုင် ၇၇ ခုက စစ်ဆေးတွေ့ရှိထားသူတွေကို ရိုးရိုးပေါင်းစည်းထားတဲ့ ကိန်းဂဏန်းမဟုတ်ဘဲ Thailand Spectrum-AEM ကူးစက်ရောဂါဆိုင်ရာ သင်္ချာပုံစံနဲ့ တွက်ချက်ထားတဲ့ ၂၀၂၆ ခုနှစ်အတွက် နိုင်ငံလုံးဆိုင်ရာ ခန့်မှန်းချက်ဖြစ်ပါတယ်။
ခန့်မှန်းထားတဲ့ HIV နဲ့အတူ နေထိုင်သူ ၅၅၇,၉၉၃ ဦးအနက် အမျိုးသမီး ၂၂၀,၇၈၃ ဦး၊ အရွယ်ရောက်ပြီးသူ ၅၅၇,၁၈၃ ဦးနဲ့ ကလေး ၈၁၀ ဦး ပါဝင်ပါတယ်။
ဒါ့အပြင် ၂၀၂၆ ခုနှစ်အတွင်း HIV ကူးစက်ခံရသူအသစ် ၇,၉၉၁ ဦးရှိနိုင်ပြီး အဲဒီအထဲမှာ အမျိုးသမီး ၁,၇၃၂ ဦး ပါဝင်မယ်လို့ ခန့်မှန်းထားပါတယ်။ HIV/AIDS နဲ့ဆက်နွှယ်ပြီး သေဆုံးသူ ၁၁,၅၅၂ ဦးခန့်ရှိနိုင်တယ်လို့လည်း ဖော်ပြထားပါတယ်။
ထိုင်းနိုင်ငံအတွင်း HIV နဲ့အတူ နေထိုင်သူအရေအတွက်ဟာ ၂၀၂၀ ပြည့်နှစ်မှာ ၅၈၇,၇၄၄ ဦးရှိခဲ့ရာကနေ ၂၀၂၆ ခုနှစ်မှာ ၅၅၇,၉၉၃ ဦးအထိ တဖြည်းဖြည်းလျော့ကျလာမယ်လို့ ခန့်မှန်းထားပေမယ့် ကူးစက်မှုအသစ်နဲ့ AIDS ဆက်နွှယ်သေဆုံးမှုတွေ ဆက်လက်ရှိနေဆဲဖြစ်ပါတယ်။
HIV ကူးစက်ခံထားရတာဟာ AIDS ရောဂါအဆင့်ရောက်နေပြီလို့ အဓိပ္ပာယ်မရပါဘူး။ HIV ရှိသူတွေဟာ ဗိုင်းရပ်စ်တားဆေးကို စနစ်တကျသောက်သုံးပြီး ဗိုင်းရပ်စ်ပမာဏကို စစ်ဆေးမတွေ့နိုင်တဲ့အဆင့်အထိ ထိန်းထားနိုင်ရင် ကျန်းမာစွာနေထိုင်နိုင်သလို လိင်ဆက်ဆံမှုကနေ တခြားသူဆီ ကူးစက်စေမှာမဟုတ်ဘူးလို့ ကျန်းမာရေးပညာရှင်တွေက အသိပေးထားပါတယ်။
