၁၀ ဇွန် ၂၀၂၆ | New Day Myanmar
ဖိလစ်ပိုင်နိုင်ငံခြားရေးဝန်ကြီး မာထရီဆာ လာဇာရို (Ma. Theresa Lazaro) က မြန်မာနိုင်ငံရဲ့ လက်ရှိအခြေအနေကို ပိုမိုနားလည်သဘောပေါက်ပြီး ငြိမ်းချမ်းရေးဆိုင်ရာ အဖြေရှာနိုင်ရေးအတွက် မြန်မာတိုင်းရင်းသားအဖွဲ့အစည်းတချို့နဲ့ လာမယ့်ရက်ပိုင်းအတွင်း တွေ့ဆုံသွားဖို့ စီစဉ်ထားတယ်လို့ ပြောကြားလိုက်ပါတယ်။
ဇွန်လ ၁၀ ရက်နေ့က ဂျပန်နိုင်ငံ တိုကျိုမြို့မှာ Nikkei က ကျင်းပတဲ့ ဖိုရမ်တစ်ခုအတွင်း လာဇာရိုက “တိုင်းရင်းသားလက်နက်ကိုင်အဖွဲ့အစည်းတချို့နဲ့ တွေ့ဆုံပြီး မြန်မာနိုင်ငံရဲ့ လက်ရှိအခြေအနေကို သိရှိနားလည်ဖို့နဲ့ ဘယ်လိုကူညီနိုင်မလဲဆိုတာ လေ့လာသွားဖို့ ရည်ရွယ်ထားပါတယ်” လို့ ပြောကြားခဲ့တာ ဖြစ်ပါတယ်။
ဖိလစ်ပိုင်နိုင်ငံဟာ ၂၀၂၆ ခုနှစ်အတွက် အာဆီယံအလှည့်ကျ ဥက္ကဋ္ဌနိုင်ငံ ဖြစ်နေပြီး ဖိလစ်ပိုင်သမ္မတ ဖာဒီနန် မားကို့စ် ဂျူနီယာက လာဇာရိုကို မြန်မာနိုင်ငံဆိုင်ရာ အထူးကိုယ်စားလှယ်အဖြစ် တာဝန်ပေးအပ်ထားပါတယ်။
ဒါပေမယ့် လာဇာရိုက ဘယ်တိုင်းရင်းသားအဖွဲ့အစည်းတွေနဲ့ တွေ့ဆုံမယ်၊ ဘယ်နေရာမှာ တွေ့ဆုံမယ်ဆိုတဲ့ အသေးစိတ်အချက်အလက်တွေကိုတော့ ထုတ်ဖော်ပြောကြားတာ မရှိသေးပါဘူး။
“ဘယ်လို အဆင်ပြေမလဲဆိုတာ စောင့်ကြည့်ရမှာပါ” လို့ သူက သတင်းထောက်တွေကို ပြောကြားခဲ့ပါတယ်။
မြန်မာနိုင်ငံမှာ ၂၀၂၁ ခုနှစ် စစ်အာဏာသိမ်းမှုနောက်ပိုင်း စစ်တပ်ရဲ့ အကြမ်းဖက်နှိမ်နင်းမှုတွေကြောင့် နိုင်ငံတဝန်း လက်နက်ကိုင်ပဋိပက္ခတွေ ကျယ်ပြန့်လာခဲ့ပြီး တိုင်းရင်းသားတော်လှန်ရေးအဖွဲ့အစည်းတွေနဲ့ ပြည်သူ့ကာကွယ်ရေးတပ်ဖွဲ့ (PDF) တွေ ပူးပေါင်းကာ စစ်ကောင်စီကို တိုက်ခိုက်နေတဲ့ အခြေအနေ ဖြစ်ပေါ်နေပါတယ်။
အဲဒီနောက်ပိုင်း အာဆီယံက မြန်မာစစ်ခေါင်းဆောင်တွေကို ထိပ်သီးအစည်းအဝေးတွေ တက်ရောက်ခွင့် ပိတ်ပင်ထားခဲ့ပေမယ့် ၂၀၂၆ ခုနှစ် ဧပြီလမှာ အရပ်သားအစိုးရအသွင်နဲ့ အစိုးရသစ် ဖွဲ့စည်းခဲ့ပြီးနောက် မြန်မာနိုင်ငံနဲ့ ပြန်လည်ထိတွေ့ဆက်ဆံနိုင်မယ့် နည်းလမ်းတွေကို ရှာဖွေနေတယ်လို့ သုံးသပ်သူတွေက ဆိုပါတယ်။
မြန်မာစစ်ခေါင်းဆောင် သမ္မတ မင်းအောင်လှိုင်ကလည်း အစိုးရသစ်အနေနဲ့ အာဆီယံနဲ့ ဆက်ဆံရေး ပုံမှန်ပြန်ဖြစ်လာစေရေး ကြိုးပမ်းသွားမယ်လို့ ပြောကြားထားပါတယ်။
ယခုနှစ် ဇန်နဝါရီလအတွင်း ဖိလစ်ပိုင်နိုင်ငံ မနီလာမြို့မှာ “Stakeholders’ Meeting” အမည်နဲ့ တွေ့ဆုံဆွေးနွေးပွဲတစ်ရပ် ကျင်းပခဲ့ပြီး မြန်မာတိုင်းရင်းသားတော်လှန်ရေးအဖွဲ့အစည်း အများအပြားကို ဖိတ်ကြားကာ မြန်မာ့နိုင်ငံရေးအကျပ်အတည်းအတွက် ဖြစ်နိုင်ချေရှိတဲ့ အဖြေရှာနည်းတွေကို ဆွေးနွေးခဲ့ကြောင်း Reuters က ဖော်ပြထားပါတယ်။
လာဇာရိုရဲ့ အခုအစီအစဉ်ဟာ ဖိလစ်ပိုင်နိုင်ငံအနေနဲ့ အာဆီယံဥက္ကဋ္ဌတာဝန် ယူထားချိန်မှာ မြန်မာ့အရေးနဲ့ ပတ်သက်ပြီး ပိုမိုတက်ကြွစွာ ပါဝင်လာတဲ့ လှုပ်ရှားမှုတစ်ခုအဖြစ် ရှုမြင်နေကြပြီး မြန်မာနိုင်ငံအတွင်း သက်ဆိုင်သူအားလုံးနဲ့ ထိတွေ့ဆက်ဆံကာ ငြိမ်းချမ်းရေးလုပ်ငန်းစဉ်ကို ရှေ့ဆက်နိုင်ဖို့ ကြိုးပမ်းမှုတစ်ရပ်လည်း ဖြစ်တယ်လို့ သုံးသပ်မှုတွေ ထွက်ပေါ်နေပါတယ်။
