၁၃ စက်တင်ဘာ၊ ၂၀၂၄
အမျိုးသားညီညွတ်ရေးအစိုးရ (NUG) နဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) တို့အကြား နားလည်မှုစာချွန်လွှာ ချုပ်ဆိုမှုကို စက်တင်ဘာလ ၁၂ရက်မှာ ပြုလုပ်ခဲ့တယ်လို့ NUG က သတင်းထုတ်ပြန်ပါတယ်။
နားလည်မှုစာချွန်လွှာကို အပြန်အလှန် နားလည်မှု၊ နိုင်ငံရေးဂုဏ်သိက္ခာ၊ အပြန်အလှန်အသိအမှတ် ပြုမှုတို့ကို အခြေခံပြီး နှစ်ဖက်အဖွဲ့အစည်း နှစ်ခုကြား ခိုင်မာအားကောင်းတဲ့ ဆက်ဆံမှုတည်ဆောက်ရေး ၊ စစ်အာဏာရှင် စနစ် ပပျောက်ရေး နဲ့ အနာဂတ် ဖက်ဒရယ် ဒီမိုကရက်တစ် ပြည်ထောင်စု ပေါ်ထွန်းရေးလုပ်ငန်းတွေမှာ အတူတကွလက်တွဲ တိုက်ပွဲဝင် ပူးပေါင်းဆောင်ရွက်ရေးဖို့ ရည်ရွယ်တယ်လို့ NUG က ဆိုပါတယ်။
ဒီစာချုပ်အရ အမျိုးသားညီညွတ်ရေးအစိုးရ နဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့ကြားမှာ နိုင်ငံရေး ၊ လူထုစည်းရုံးရေး ၊ စစ်ရေး နဲ့ ဘဏ္ဍာရေး ကဏ္ဍရပ်တွေမှာ ပူးပေါင်းဆောင်ရွက် သွားမှာ ဖြစ်ပါတယ်။
အွန်လိုင်းက ချုပ်ဆိုတဲ့ နားလည်မှု စာချွန်လွှာ ချုပ်ဆိုသည့်အခမ်းအနားကို အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလ ၊ ပြည်ထောင်စုဝန်ကြီးချုပ် မန်းဝင်းခိုင်သန်း ၊ ကာကွယ်ရေးဝန်ကြီး ဦးရည်မွန် ၊ ပြည်ထဲရေးနဲ့လူဝင်မှုကြီးကြပ်ရေးဝန်ကြီး ဦးလွင်ကိုလတ်အပါအဝင် တာဝန်ရှိသူတွေ တက်ရောက်ခဲ့ပါတယ်။
မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) ဘက်က ဥက္ကဌ ရဲဘော်သံခဲ၊ ဒုဥက္ကဌ ရဲဘော် လဆိုင်း၊ အထွေထွေအတွင်းရေးမှုး ရဲဘော်ဆန်နီ၊ တွဲဖက်အထွေထွေအတွင်းရေးမှုး ၁ ရဲဘော်ကျော် လင်း၊ တွဲဖက်အထွေထွေအတွင်းရေးမှုး ၂ ရဲဘော် ရဲထွတ် (ခ) လှဌေး ဦးဆောင်တဲ့ ဗဟိုကော်မတီဝင်များ၊ ဗဟိုအလုပ်အမှုဆောင်ကော်မတီဝင်များနဲ့အတူ နယ်မြေအသီးသီးက တာဝန်ခံခေါင်းဆောင်တွေ တက်ရောက်ခဲ့တယ်လို့ NUG က ထုတ်ပြန်ပါတယ်။
ပုံစာ – အမျိုးသားညီညွတ်ရေးအစိုးရ (NUG) နဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) တို့ နားလည်မှုစာချွန်လွှာ လက်မှတ်ထိုးပွဲအခမ်းအနား
Photo – NUG
