၁၇ ဇွန် ၂၀၂၆ | New Day Myanmar
ရန်ကုန်မြို့မှာ YBS လိုင်းကားစီးရင်း အိပ်ပျော်သွားပြီး ဒဂုံမြို့သစ်အရှေ့ပိုင်း ဂိတ်ဆုံးအထိ ပါသွားခဲ့တဲ့ အမျိုးသားတစ်ဦး မိသားစုနဲ့ အဆက်အသွယ်ပြတ်တောက်ကာ ပျောက်ဆုံးနေတယ်လို့ မိသားစုဝင်တွေဆီက သိရပါတယ်။
ပျောက်ဆုံးနေသူဟာ ကိုအောင်သက်ဝင်းဆိုသူဖြစ်ပြီး ဇွန်လ ၁၆ ရက် ညပိုင်းမှာ YBS အမှတ် ၈၇ လိုင်းကားကို စီးနင်းခဲ့စဉ် ကားပေါ်မှာ အိပ်ပျော်သွားခဲ့တာ ဖြစ်ပါတယ်။
အဲဒီနောက် ဒဂုံမြို့သစ်အရှေ့ပိုင်းရှိ ဂိတ်ဆုံးကို ရောက်ရှိသွားခဲ့ပြီး လိုင်းကားတွေ မရှိတော့တာကြောင့် လမ်းလျှောက်ထွက်လာရင်း မိသားစုဝင်တွေကို လာရောက်ခေါ်ဆောင်ပေးဖို့ ဖုန်းဆက်ခဲ့တယ်လို့ ဆိုပါတယ်။
မိသားစုဝင်တွေက သွားရောက်ခေါ်ဆောင်ဖို့ ပြင်ဆင်ပြီး ည ၉ နာရီ ၂၅ မိနစ်ခန့်မှာ ကိုအောင်သက်ဝင်းရဲ့ ဖုန်းကို ပြန်ခေါ်ခဲ့ပေမယ့် ဖုန်းပိတ်သွားခဲ့ပြီးနောက် ဇွန်လ ၁၇ ရက်အထိ အဆက်အသွယ်မရတော့ဘူးလို့ မိသားစုဝင်တစ်ဦးက လူမှုကွန်ရက်မှာ ရေးသားထားပါတယ်။
ကိုအောင်သက်ဝင်း ဘယ်နေရာမှာ ပျောက်ဆုံးသွားတယ်ဆိုတာနဲ့ ပျောက်ဆုံးမှုနောက်ကွယ်က အကြောင်းရင်းကို လက်ရှိအချိန်အထိ မသိရသေးပါဘူး။
မိသားစုဝင်တွေက ကိုအောင်သက်ဝင်းကို တွေ့ရှိသူ ဒါမှမဟုတ် သတင်းအချက်အလက်ရရှိသူတွေအနေနဲ့ မိသားစုထံ အမြန်ဆုံး ဆက်သွယ်အကြောင်းကြားပေးဖို့ အကူအညီတောင်းခံထားပါတယ်။
လတ်တလော ရန်ကုန်မြို့မှာ ညပိုင်းသွားလာသူတွေနဲ့ ပစ္စည်းအရောင်းအဝယ်လုပ်သူတွေကို ပစ်မှတ်ထားတဲ့ လုယက်မှု၊ ချုပ်နှောင်မှုနဲ့ ပျောက်ဆုံးမှုဖြစ်စဉ်တွေ ရှိနေတာကြောင့် ညအချိန် တစ်ဦးတည်းသွားလာရာမှာ သတိထားကြဖို့လည်း ဒေသခံတွေက တိုက်တွန်းနေကြပါတယ်။
ပုံစာ — YBS လိုင်းကားစီးရင်း အိပ်ပျော်သွားပြီး ဂိတ်ဆုံးက ပြန်လာစဉ် ပျောက်ဆုံးနေတဲ့ ကိုအောင်သက်ဝင်း။
