ဩဂုတ် ၁၇၊ ၂၀၂၆ | New Day Myanmar
ထိုင်းနိုင်ငံ ဖူးခက်ခရိုင်မှာ နိုင်ငံခြားအလုပ်သမားတွေက အစိုးရဆေးရုံတွေမှာ ကလေးမွေးဖွားတာ များလာပြီး ကျန်းမာရေးဝန်ဆောင်မှုနဲ့ ဘတ်ဂျက်အပေါ် ဝန်ထုပ်ဝန်ပိုးဖြစ်လာတယ်လို့ဆိုကာ နိုင်ငံခြားအလုပ်သမားတွေ ထိုင်းနိုင်ငံအတွင်း ကလေးမွေးဖွားခွင့်ကို ကန့်သတ်ဖို့ ဖူးခက်ခရိုင်အုပ်ချုပ်ရေးအဖွဲ့ (Phuket Provincial Administrative Organization – PAO) ဥက္ကဋ္ဌ ရေဝတ် အာရီရော့ဘ် က အလုပ်သမားဝန်ကြီးထံ စာပေးပို့တောင်းဆိုလိုက်ပါတယ်။
ဩဂုတ် ၁၇ ရက်မှာ ပေးပို့ခဲ့တဲ့ စာထဲမှာ ဖူးခက်ကို နိုင်ငံခြားအလုပ်သမား အများအပြား ဝင်ရောက်အလုပ်လုပ်နေပြီး အစိုးရဆေးရုံနဲ့ ပြည်သူ့ကျန်းမာရေးဝန်ဆောင်မှုတွေမှာ လူနာများပြားကာ လူစည်ကားမှုတွေ ဖြစ်ပေါ်နေတယ်လို့ ရေဝတ်က ပြောထားပါတယ်။ အထူးသဖြင့် နိုင်ငံခြားအလုပ်သမားတွေ အစိုးရဆေးရုံတွေမှာ ကလေးမွေးဖွားတာကြောင့် ဆေးရုံကုတင်နဲ့ ကျန်းမာရေးဝန်ထမ်း မလုံလောက်မှုတွေ ဖြစ်လာသလို ဒေသခံတွေအတွက် ကျန်းမာရေးဝန်ဆောင်မှုရရှိရေးလည်း ထိခိုက်နေတယ်လို့ သူက ဆိုပါတယ်။
ဒါပေမဲ့ အဲဒီအချက်တွေဟာ ဖူးခက် PAO ဥက္ကဋ္ဌရဲ့ ပြောဆိုချက်တွေဖြစ်ပြီး နိုင်ငံခြားအလုပ်သမားတွေ ကလေးမွေးဖွားမှုကြောင့် ဆေးရုံတွေမှာ ဘယ်လောက်အထိ ဝန်ပိလာတယ်ဆိုတဲ့ ကိန်းဂဏန်းအသေးစိတ်ကို သတင်းမှာ မဖော်ပြထားပါဘူး။
ရေဝတ်က အရေးပေါ်ဆောင်ရွက်ဖို့ အဓိက အချက်နှစ်ချက် တောင်းဆိုထားပါတယ်။ ပထမအချက်အနေနဲ့ နိုင်ငံခြားအလုပ်သမားတွေရဲ့ ကျန်းမာရေးအာမခံစနစ်ကို ပြန်လည်သုံးသပ်ပြီး တင်းကျပ်ဖို့နဲ့ ကလေးမွေးဖွားမှုဆိုင်ရာ ကျန်းမာရေးအကျိုးခံစားခွင့်ကို ဖယ်ရှားဖို့ တောင်းဆိုထားပါတယ်။ ဒါ့အပြင် နိုင်ငံခြားအလုပ်သမားတွေ ထိုင်းနိုင်ငံအတွင်း ကလေးမွေးဖွားခွင့်မရအောင် ဥပဒေပြင်ဆင်ဖို့အထိ အဆိုပြုထားပါတယ်။
နိုင်ငံခြားအလုပ်သမားတွေနဲ့အတူ နေထိုင်တဲ့ မိသားစုဝင်တွေနဲ့ ကလေးတွေကိုလည်း ကျန်းမာရေးအာမခံစနစ်ထဲ အပြည့်အဝ ဝင်ရောက်စေဖို့ တောင်းဆိုထားပြီး ဒါက ဒေသတွင်းဆေးရုံတွေရဲ့ ဆေးကုသမှုကုန်ကျစရိတ် ဝန်ထုပ်ဝန်ပိုး လျော့ချနိုင်မယ်လို့ သူက ဆိုပါတယ်။
ဒုတိယအချက်အနေနဲ့ တရားမဝင် ဝင်ရောက်အလုပ်လုပ်သူတွေနဲ့ ထိုင်းနိုင်ငံသားတွေအတွက်သာ သတ်မှတ်ထားတဲ့ အလုပ်အကိုင်တွေမှာ ဝင်ရောက်လုပ်ကိုင်နေတဲ့ နိုင်ငံခြားအလုပ်သမားတွေကို စစ်ဆေးပြီး ဥပဒေအရ အရေးယူမှု ပိုမိုတင်းကျပ်ဖို့လည်း တောင်းဆိုထားပါတယ်။
ရေဝတ်က နိုင်ငံခြားအလုပ်သမားတချို့ဟာ ထိုင်းနိုင်ငံသားတွေရဲ့ အလုပ်အကိုင်တွေကို ဝင်ရောက်လုပ်ကိုင်နေတယ်၊ လူနေထူထပ်တဲ့ အသိုက်အဝန်းတွေ ဖြစ်ပေါ်လာတယ်၊ ဒေသခံတွေရဲ့ လုံခြုံရေးနဲ့ လူနေမှုပုံစံအပေါ် သက်ရောက်မှုရှိနေတယ်လို့လည်း စွပ်စွဲထားပါတယ်။ ဒီပြောဆိုချက်တွေအတွက်လည်း သက်သေအထောက်အထား ဒါမှမဟုတ် ဖြစ်ပွားမှုကိန်းဂဏန်းတွေကို သတင်းမှာ ဖော်ပြထားခြင်း မရှိပါဘူး။
လက်ရှိအချိန်အထိတော့ ရေဝတ်ရဲ့ တောင်းဆိုချက်ဟာ အဆိုပြုချက်အဆင့်သာ ရှိသေးပြီး နိုင်ငံခြားအလုပ်သမားတွေ ထိုင်းနိုင်ငံမှာ ကလေးမွေးဖွားခွင့်ကို တားမြစ်လိုက်ပြီဆိုတာ မဟုတ်ပါဘူး။ ထိုင်းအလုပ်သမားဝန်ကြီးဌာနဘက်က ဒီတောင်းဆိုချက်အပေါ် ဘယ်လိုဆုံးဖြတ်မလဲဆိုတာလည်း မထုတ်ပြန်သေးပါဘူး။