၁၄ ဇူလိုင် ၂၀၂၆ | New Day Myanmar
မြန်မာနိုင်ငံတဝန်း မိုးသည်းထန်စွာ ရွာသွန်းပြီး မြစ်ရေမြင့်တက်မှုတွေ ဖြစ်ပေါ်နေတာနဲ့ တပြိုင်နက် စစ်အုပ်စုရဲ့ လေကြောင်းတိုက်ခိုက်မှုတွေ ဆက်လက်ဖြစ်ပွားနေတဲ့အတွက် လူထောင်ချီ နေရပ်စွန့်ခွာနေရပြီး လူသားချင်းစာနာထောက်ထားမှု အကျပ်အတည်း ပိုမိုဆိုးရွားလာနေတယ်လို့ ကက်သလစ်သတင်းဌာန UCA News က ဖော်ပြပါတယ်။
မွန်ပြည်နယ်မှာ ဘီးလင်းမြစ်ရေမြင့်တက်မှုကြောင့် ဇူလိုင် ၁၃ ရက်အထိ အိမ်ထောင်စု ၂၂၆ စုက လူဦးရေ ၁,၀၀၀ နီးပါး ဘေးလွတ်ရာကို ရွှေ့ပြောင်းခဲ့ရပါတယ်။ ဒေသခံတွေဟာ ဘုန်းကြီးကျောင်း၊ စာသင်ကျောင်းနဲ့ ယာယီကယ်ဆယ်ရေးစခန်းတွေမှာ ခိုလှုံနေရပြီး ရေကြီးမှုကြောင့် စိုက်ပျိုးမြေတွေနဲ့ လမ်းပန်းဆက်သွယ်ရေးတွေလည်း ထိခိုက်ခဲ့ပါတယ်။
ကရင်ပြည်နယ်၊ ကယားပြည်နယ်၊ ပဲခူးတိုင်းနဲ့ တနင်္သာရီတိုင်းတို့မှာလည်း မိုးအဆက်မပြတ်ရွာသွန်းမှုကြောင့် ရေကြီးရေလျှံတာတွေ ဖြစ်ပေါ်နေပြီး နေရပ်စွန့်ခွာရသူ အရေအတွက် ဆက်လက်တိုးလာနေတယ်လို့ သိရပါတယ်။
တဖက်မှာလည်း စစ်အုပ်စုရဲ့ လေကြောင်းတိုက်ခိုက်မှုတွေ ဆက်တိုက်ပြုလုပ်နေတာကြောင့် ရေဘေးကနေ ထွက်ပြေးတိမ်းရှောင်နေသူတွေအတွက် ဘေးကင်းလုံခြုံတဲ့ နေရာရှာဖွေရေး ပိုမိုခက်ခဲလာနေတယ်လို့ လူသားချင်းစာနာထောက်ထားရေးအဖွဲ့တွေက ပြောပါတယ်။
ကုလသမဂ္ဂရဲ့ နောက်ဆုံးခန့်မှန်းချက်အရ မြန်မာနိုင်ငံမှာ လက်နက်ကိုင်ပဋိပက္ခ၊ သဘာဝဘေးနဲ့ စီးပွားရေးအကျပ်အတည်းတွေကြောင့် လူပေါင်း သန်းနဲ့ချီ လူသားချင်းစာနာထောက်ထားမှု အကူအညီလိုအပ်နေပြီး နေရပ်စွန့်ခွာရသူ အရေအတွက်လည်း ဆက်လက်မြင့်တက်နေပါတယ်။
လူသားချင်းစာနာထောက်ထားရေးအဖွဲ့တွေကတော့ ရေဘေးသင့်ဒေသတွေမှာ အစားအစာ၊ သောက်သုံးရေ၊ ဆေးဝါးနဲ့ ယာယီအမိုးအကာတွေ အရေးပေါ်လိုအပ်နေသလို လက်နက်ကိုင်ပဋိပက္ခတွေကြောင့် ကူညီကယ်ဆယ်ရေးလုပ်ငန်းတွေကိုလည်း အခက်အခဲတွေနဲ့ ရင်ဆိုင်နေရတယ်လို့ သတိပေးထားပါတယ်။
