၁၅ မေ ၂၀၂၆ | New Day Myanmar
တရုတ်သမ္မတ ရှီကျင့်ဖျင်က တရုတ်နဲ့ အမေရိကန်ပြည်ထောင်စုတို့အကြား ဆက်ဆံရေးကို မဟာဗျူဟာတည်ငြိမ်မှုအပေါ် အခြေခံတဲ့ တည်ဆောက်မှုဆိုင်ရာ ဆက်ဆံရေးအဖြစ် ဖော်ဆောင်သင့်ကြောင်း တိုက်တွန်းပြောကြားလိုက်ပါတယ်။
တရုတ်နိုင်ငံကို နိုင်ငံတော်ခရီးစဉ် ရောက်ရှိနေတဲ့ အမေရိကန်သမ္မတ ဒေါ်နယ်လ်ထရမ့်နဲ့ တွေ့ဆုံဆွေးနွေးမှုအတွင်း ရှီကျင့်ဖျင်က တရုတ်နဲ့ အမေရိကန်ပြည်သူတွေဟာ နှစ်နိုင်ငံစလုံးအတွက် ကြီးမြတ်တဲ့ လူမျိုးတွေဖြစ်ကြောင်း ပြောကြားခဲ့ပါတယ်။
“တရုတ်နိုင်ငံရဲ့ အမျိုးသားပြန်လည်ထူထောင်ရေး ရည်မှန်းချက်နဲ့ အမေရိကန်ရဲ့ Make America Great Again မူဝါဒတို့ဟာ အပြိုင်အဆိုင်မဟုတ်ဘဲ အတူတကွ ရှေ့ဆက်နိုင်ပါတယ်” လို့ ရှီက ဆိုပါတယ်။
ဒါ့အပြင် နှစ်နိုင်ငံအနေနဲ့ တစ်ဖက်နဲ့တစ်ဖက် အောင်မြင်မှုကို ကူညီပေးနိုင်သလို ကမ္ဘာ့ပြည်သူတွေရဲ့ ကောင်းကျိုးချမ်းသာကိုလည်း အတူတကွ မြှင့်တင်နိုင်မယ်လို့ ပြောကြားခဲ့ပါတယ်။
ရှီကျင့်ဖျင်က သူနဲ့ ထရမ့်တို့အကြား တရုတ်-အမေရိကန် ဆက်ဆံရေးကို တည်ငြိမ်၊ ကျန်းမာပြီး ရေရှည်တည်တံ့တဲ့ လမ်းကြောင်းပေါ် တည်ဆောက်ဖို့ သဘောတူညီမှု ရရှိခဲ့ကြောင်းလည်း ထုတ်ဖော်ပြောဆိုခဲ့ပါတယ်။
အဲဒီသဘောတူညီချက်ဟာ ကမ္ဘာတစ်ဝန်း ငြိမ်းချမ်းရေး၊ စီးပွားရေးဖွံ့ဖြိုးတိုးတက်မှုနဲ့ တိုးတက်ပြောင်းလဲမှုတွေကို အထောက်အကူပြုနိုင်မယ်လို့ ရှီက အလေးပေးပြောကြားခဲ့ပါတယ်။
တရုတ်-အမေရိကန် ဆက်ဆံရေးဟာ နှစ်နိုင်ငံရှိ လူဦးရေ ၁.၇ ဘီလီယံကျော်ရဲ့ အကျိုးစီးပွားနဲ့ တိုက်ရိုက်သက်ဆိုင်နေသလို ကမ္ဘာလုံးဆိုင်ရာ လူဦးရေ ၈ ဘီလီယံကျော်အပေါ်လည်း သက်ရောက်မှုရှိတယ်လို့ ရှီကျင့်ဖျင်က ပြောပါတယ်။
“နှစ်ဖက်စလုံးအနေနဲ့ သမိုင်းဝင်တာဝန်ယူမှုကို နားလည်သဘောပေါက်ပြီး တရုတ်-အမေရိကန် ဆက်ဆံရေးဆိုတဲ့ ကြီးမားတဲ့ သင်္ဘောကြီးကို မှန်ကန်တဲ့ လမ်းကြောင်းပေါ်မှာ တည်ငြိမ်စွာ မောင်းနှင်သင့်ပါတယ်” လို့ ရှီက တိုက်တွန်းခဲ့ပါတယ်။
