စက်တင်ဘာ ၅၊ ၂၀၂၆ | New Day Myanmar
ရာသီဥတုဖောက်ပြန်မှု၊ စစ်ပွဲတွေနဲ့ ကုန်သွယ်ရေးလမ်းကြောင်း ပြတ်တောက်မှုတွေကြောင့် ကမ္ဘာ့စားနပ်ရိက္ခာဈေးနှုန်းဟာ ဩဂုတ်လမှာ ၂၀၂၂ ခုနှစ် နိုဝင်ဘာလနောက်ပိုင်း အမြင့်ဆုံးအဆင့်ကို ရောက်ရှိခဲ့တယ်လို့ ကုလသမဂ္ဂ စားနပ်ရိက္ခာနဲ့ စိုက်ပျိုးရေးအဖွဲ့ (FAO) က ထုတ်ပြန်ပါတယ်။
နိုင်ငံတကာဈေးကွက်မှာ ကုန်သွယ်နေတဲ့ အခြေခံစားသောက်ကုန်တွေရဲ့ ဈေးနှုန်းပြောင်းလဲမှုကို တိုင်းတာတဲ့ FAO စားနပ်ရိက္ခာဈေးနှုန်းညွှန်းကိန်းဟာ ဩဂုတ်လမှာ ၁၃၃.၃ မှတ်ရှိခဲ့ပါတယ်။ ဇူလိုင်လကထက် ၁.၉ ရာခိုင်နှုန်းနဲ့ ပြီးခဲ့တဲ့နှစ် အလားတူကာလထက် ၂.၅ ရာခိုင်နှုန်း မြင့်တက်လာတာဖြစ်ပါတယ်။
ဒါပေမဲ့ ယူကရိန်းကို ရုရှားက အပြည့်အဝကျူးကျော်တိုက်ခိုက်ပြီးနောက် ၂၀၂၂ ခုနှစ် မတ်လမှာ စံချိန်တင်ခဲ့တဲ့ အမြင့်ဆုံးအဆင့်နဲ့ နှိုင်းယှဉ်ရင်တော့ ၁၆.၈ ရာခိုင်နှုန်း နိမ့်နေသေးပါတယ်။
ဩဂုတ်လအတွင်း သကြား၊ နို့နဲ့ နို့ထွက်ပစ္စည်း၊ ကောက်နှံ၊ ဟင်းသီးဟင်းရွက်ဆီနဲ့ အသားဈေးနှုန်းတွေအားလုံး မြင့်တက်ခဲ့ပါတယ်။ အဲဒီအထဲမှာ သကြားဈေးနှုန်းက ၁၁.၉ ရာခိုင်နှုန်းနဲ့ အများဆုံး မြင့်တက်ပြီး ၂၀၂၅ ခုနှစ် ဇွန်လနောက်ပိုင်း အမြင့်ဆုံးဖြစ်လာပါတယ်။
ဥရောပက အပူချိန်မြင့်မားပြီး မိုးခေါင်မှုဖြစ်ပေါ်တာ၊ အာရှမှာ အယ်လ်နီညိုရာသီဥတုရဲ့ သက်ရောက်မှုတွေရှိလာနိုင်တာနဲ့ ဘရာဇီးနိုင်ငံရဲ့ သကြားထုတ်လုပ်မှုကျဆင်းတာတွေက ဈေးနှုန်းမြင့်တက်ရတဲ့ အဓိကအကြောင်းရင်းတွေဖြစ်ပါတယ်။
ကောက်နှံဈေးနှုန်းက ဇူလိုင်လကထက် ၂.၂ ရာခိုင်နှုန်း မြင့်တက်ပြီး ၂၀၂၄ ခုနှစ် မေလနောက်ပိုင်း အမြင့်ဆုံးရောက်ခဲ့ပါတယ်။ ဂျုံဈေးက ၂.၆ ရာခိုင်နှုန်း မြင့်တက်ခဲ့ပြီး ပြီးခဲ့တဲ့နှစ် အလားတူကာလထက် ၁၅ ရာခိုင်နှုန်းအထိ ပိုများလာပါတယ်။
ပင်လယ်နက်ဒေသမှာ တိုက်ခိုက်မှုတွေ ပြင်းထန်လာတာကြောင့် ရုရှားနဲ့ ယူကရိန်းက ကောက်နှံတင်ပို့မှု အနှောင့်အယှက်ဖြစ်နေသလို အီရန်နဲ့ ဆက်နွှယ်တဲ့ စစ်ရေးတင်းမာမှုတွေကြောင့်လည်း စိုက်ပျိုးရေးသုံးဓာတ်မြေဩဇာ သယ်ယူပို့ဆောင်မှု ထိခိုက်နေပါတယ်။
FAO က ၂၀၂၆ ခုနှစ် ကမ္ဘာ့ကောက်နှံထုတ်လုပ်မှုခန့်မှန်းချက်ကို တန်ချိန် ၂ ဒသမ ၉၈ ဘီလီယံအထိ လျှော့ချထားပြီး ၂၀၂၅ ခုနှစ်ကထက် ၂ ရာခိုင်နှုန်း ကျဆင်းနိုင်တယ်လို့ ခန့်မှန်းထားပါတယ်။ ဒါပေမဲ့ ဒီထုတ်လုပ်မှုပမာဏဟာ မှတ်တမ်းတင်ထားသမျှထဲ ဒုတိယအများဆုံးဖြစ်နေဦးမှာလို့ FAO က ဆိုပါတယ်။
ကမ္ဘာ့ဈေးကွက်မှာ စားအုန်းဆီ၊ ဂျုံ၊ နို့ထွက်ပစ္စည်းနဲ့ တခြားအခြေခံစားသောက်ကုန်တွေ ဈေးတက်လာတာက သွင်းကုန်အပေါ် မှီခိုရတဲ့ မြန်မာနိုင်ငံအပါအဝင် နိုင်ငံတွေမှာ စားသောက်ကုန်ကုန်ကျစရိတ် ပိုမိုမြင့်တက်လာနိုင်တဲ့ ဖိအားဖြစ်စေနိုင်ပါတယ်။ ဒါပေမဲ့ ပြည်တွင်းဈေးနှုန်းတွေဟာ ငွေလဲနှုန်း၊ သယ်ယူပို့ဆောင်ရေးနဲ့ ကုန်သွယ်ရေးကန့်သတ်ချက်တွေအပေါ်မှာလည်း မူတည်ပါတယ်။
#NewDayMyanmar #FoodPrices #FAO