၁၉ ဇူလိုင် ၂၀၂၆ | New Day Myanmar
အယ်လ်နီညိုဖြစ်စဉ် အားကောင်းလာနိုင်တဲ့ အခြေအနေနဲ့ မိုးရွာသွန်းမှုပုံစံ မမှန်ကန်တာတွေကြောင့် ရန်ကုန်မြို့အတွက် အရေးပါတဲ့ ငမိုးရိပ်ဆည်ရဲ့ ရေဝင်ရောက်မှုနဲ့ ရေလှောင်ထားနိုင်မှုအခြေအနေတွေကို အထူးဂရုပြု စောင့်ကြည့်စီမံနေတယ်လို့ ဆည်တာဝန်ရှိသူတွေက အသိပေးထားပါတယ်။
အယ်လ်နီညိုကြောင့် လာမယ့်ပွင့်လင်းရာသီမှာ အပူချိန်မြင့်တက်ပြီး သောက်သုံးရေရှားပါးလာမှာကို စိုးရိမ်နေသူတွေရှိသလို၊ မြန်မာပြက္ခဒိန်အရ ဝါထပ်နှစ်ဖြစ်တာကြောင့် မိုးများပြီး ရေကြီးရေလျှံမှုတွေ ဖြစ်လာနိုင်တယ်လို့ ယူဆနေသူတွေလည်းရှိကြောင်း ဆည်တာဝန်ရှိသူတွေက ဆိုပါတယ်။
ဒါပေမယ့် ဝါထပ်နှစ်ဖြစ်တာဟာ မိုးများခြင်း၊ ရေကြီးခြင်းတို့နဲ့ သိပ္ပံနည်းကျ တိုက်ရိုက်ဆက်စပ်မှုရှိတဲ့ မိုးလေဝသအညွှန်းတစ်ခု မဟုတ်ပါဘူး။ အယ်လ်နီညိုဖြစ်စဉ်ကလည်း ဒေသတိုင်းမှာ တူညီတဲ့ ရာသီဥတုအကျိုးသက်ရောက်မှု ဖြစ်ပေါ်စေတာမဟုတ်ဘဲ ဒေသတွင်းလေထု၊ ပင်လယ်ရေမျက်နှာပြင်အပူချိန်နဲ့ မုတ်သုံလေစနစ်အပါအဝင် အခြားအချက်တွေကိုပါ ပေါင်းစပ်စောင့်ကြည့်ဖို့ လိုအပ်ပါတယ်။
ကမ္ဘာ့မိုးလေဝသအဖွဲ့ WMO ကတော့ ၂၀၂၆ ခုနှစ် ဇူလိုင်ကနေ စက်တင်ဘာလအတွင်း အယ်လ်နီညိုဖြစ်စဉ် လျင်မြန်စွာ အားကောင်းလာနိုင်ပြီး အနည်းဆုံး အလယ်အလတ်အဆင့်ကနေ အားကောင်းတဲ့အဆင့်အထိ ရောက်ရှိနိုင်တယ်လို့ ခန့်မှန်းထားပါတယ်။ အယ်လ်နီညိုအခြေအနေဟာ နိုဝင်ဘာလအထိ ဆက်လက်တည်ရှိနိုင်ခြေ ၉၀ ရာခိုင်နှုန်းနဲ့အထက်ရှိတယ်လို့လည်း ဖော်ပြထားပါတယ်။ (World Meteorological Organization)
ရန်ကုန်မြို့နေ ပြည်သူတဦးက “အခု မိုးရွာနေပေမယ့် ရာသီဥတုက အိုက်စပ်နေတုန်းပါပဲ။ မိုးကုန်သွားရင် အယ်လ်နီညိုကြောင့် သောက်ရေ၊ သုံးရေရှားနိုင်တယ်ဆိုတဲ့ အသိပေးချက်တွေကြောင့် လာမယ့်ပွင့်လင်းရာသီမှာ အပူချိန်ဘယ်လောက်အထိ မြင့်တက်လာမလဲဆိုတာ လူတွေက စိုးရိမ်နေကြပါတယ်” လို့ ပြောပါတယ်။
အယ်လ်နီညိုဖြစ်စဉ်ကြောင့် ကမ္ဘာ့ဒေသအသီးသီးမှာ အပူချိန်နဲ့ မိုးရွာသွန်းမှုပုံစံတွေ ပြောင်းလဲနိုင်ပေမယ့် မြန်မာနိုင်ငံမှာ ဘယ်လောက်အထိ မိုးနည်းမယ်၊ အပူချိန်ဘယ်လောက်မြင့်မယ်ဆိုတာကိုတော့ ဒေသအလိုက် မိုးလေဝသခန့်မှန်းချက်တွေနဲ့ တွဲဖက်စောင့်ကြည့်ရမှာ ဖြစ်ပါတယ်။ အမေရိကန် အမျိုးသားသမုဒ္ဒရာနဲ့ လေထုဆိုင်ရာ စီမံခန့်ခွဲရေးအဖွဲ့ NOAA ကလည်း လက်ရှိအယ်လ်နီညို ဆက်လက်အားကောင်းလာနိုင်ပြီး ၂၀၂၇ ခုနှစ် အစောပိုင်းအထိ ဆက်လက်တည်ရှိနိုင်ခြေ မြင့်မားတယ်လို့ ခန့်မှန်းထားပါတယ်။ (NOAA)
ငမိုးရိပ်ဆည်တာဝန်ရှိသူတွေက ရာသီဥတုအခြေအနေ ခန့်မှန်းရခက်လာတာကြောင့် ဆည်အတွင်း ရေဝင်ရောက်မှုနဲ့ ရေလှောင်ပမာဏကို အမြဲမပြတ် စောင့်ကြည့်ပြီး ရေကို စနစ်တကျ စီမံခန့်ခွဲနေတယ်လို့ အသိပေးထားပါတယ်။
ဇူလိုင်နဲ့ သြဂုတ်လအတွင်း ဆည်ထဲဝင်ရောက်လာတဲ့ ရေတွေထဲက သောက်သုံးရေအတွက် လိုအပ်တဲ့ပမာဏကို အသုံးပြုပြီး ကျန်ရှိတဲ့ရေကို တတ်နိုင်သမျှ သိုလှောင်ထိန်းသိမ်းထားမယ်လို့ ဆိုပါတယ်။ စက်တင်ဘာနဲ့ အောက်တိုဘာလ မိုးနှောင်းကာလမှာတော့ မိုးရွာသွန်းမှုနဲ့ ရေဝင်ရောက်လာတဲ့ အခြေအနေတွေအပေါ် မူတည်ပြီး ဆက်လက်စီမံသွားမယ်လို့ သိရပါတယ်။
ပြီးခဲ့တဲ့ ၂၀၂၃ ခုနှစ် အယ်လ်နီညိုကာလမှာလည်း ရေလှောင်တမံတွေရဲ့ ရေအခြေအနေကို ကြိုတင်စောင့်ကြည့်ခဲ့ရပြီး မိုးရာသီနဲ့ မိုးလွန်ကာလအတွင်း ရေဝင်ရောက်မှုပြောင်းလဲတာတွေကို ရင်ဆိုင်ခဲ့ရတယ်လို့ ဆည်တာဝန်ရှိသူတွေက ပြန်လည်သတိပေးထားပါတယ်။
အခုလို အသိပေးတာဟာ ပြည်သူတွေကို အလွန်အမင်း စိုးရိမ်စေဖို့ မဟုတ်ဘဲ ရာသီဥတုပြောင်းလဲမှုကြောင့် ရေစီမံခန့်ခွဲရာမှာ ကြုံတွေ့လာနိုင်တဲ့ အခက်အခဲတွေကို ကြိုတင်သိရှိပြီး သတိရှိရှိ ပြင်ဆင်နိုင်ဖို့ ရည်ရွယ်တာဖြစ်တယ်လို့ ဆိုပါတယ်။
ပုံစာ – ယခုရက်ပိုင်းအတွင်း ငမိုးရိပ်ချောင်း ရေတိုးလာတဲ့မြင်ကွင်း
