၂၇ ဇွန် ၂၀၂၆ | New Day Myanmar
ရန်ကုန်တိုင်း၊ ဒလမြို့နယ်မှာ ဖြစ်ပွားခဲ့တဲ့ ကုန်စုံဆိုင်ပိုင်ရှင် ဇနီးမောင်နှံ ၂ ဦး အသတ်ခံရမှုနဲ့ ပတ်သက်ပြီး သံသယရှိသူအဖြစ် အဲဒီဆိုင်က ဝန်ထမ်းဟောင်း အမျိုးသား ၂ ဦးကို ရဲတပ်ဖွဲ့က ဖမ်းဆီးထိန်းသိမ်းထားတယ်လို့ သိရပါတယ်။
သေဆုံးသူတွေဟာ “ပြည့်ဝ” ကုန်စုံဆိုင်ပိုင်ရှင် ဦးအောင်ကျော်ကျော်နဲ့ ဇနီးဖြစ်သူ ဒေါ်နွယ်နွယ်ထွန်းတို့ ဖြစ်ပြီး သူတို့ကို နေအိမ်ရဲ့ ဒုတိယထပ် ဘုရားခန်းထဲမှာ ထိုးသွင်းဒဏ်ရာတွေနဲ့ သေဆုံးနေတာကို တွေ့ရှိခဲ့တာဖြစ်ပါတယ်။
အခင်းဖြစ်နေရာကနေ သွေးစွန်းနေတဲ့ ဓားတစ်ချောင်းနဲ့ စကေးဘာတစ်ချောင်းကိုလည်း သက်သေအဖြစ် သိမ်းဆည်းရမိခဲ့တယ်လို့ ရဲတပ်ဖွဲ့ရဲ့ အသိပေးချက်အရ သိရပါတယ်။
ဒီအမှုနဲ့ ပတ်သက်ပြီး လုံခြုံရေးကင်မရာ (CCTV) မှတ်တမ်းတွေကို ပြန်လည်စစ်ဆေးရာမှာ အရင်က အဲဒီဆိုင်မှာ အလုပ်လုပ်ခဲ့ပြီး အလုပ်ထွက်သွားတာ ၈ လခန့်ရှိပြီဖြစ်တဲ့ ဗိုလ်ထီး (ခ) မျိုးဇော်နဲ့ ငမျိုး (ခ) မျိုးဇော်အောင်တို့ ၂ ဦးဟာ အခင်းမဖြစ်ပွားခင် နေအိမ်ထဲကို ဝင်ရောက်သွားတာ တွေ့ရှိခဲ့ရတယ်လို့ ဒလမြို့ခံတစ်ဦးက ပြောပါတယ်။
“ကြားတာကတော့ အဲလိုကြားတာပါ။ ရဲတပ်ဖွဲ့ဘက်က ထွက်လာတဲ့ သတင်းကို တစ်ဆင့်စကားနဲ့ ပြန်သိကြရတာပေါ့။ သူတို့က အဲဒီဆိုင်က အလုပ်သမားဟောင်းတွေဆိုတာတော့ မှန်ပါတယ်။ ဆိုင်ရှင်တွေရဲ့ အခြေအနေကို ကောင်းကောင်းသိနေလို့ အခုလို သွေးအေးအေးနဲ့ လုပ်သွားကြတာဖြစ်မယ်” လို့ ဒလမြို့ခံတစ်ဦးက New Day Myanmar ကို ပြောပါတယ်။
အဆိုပါ သံသယရှိသူ ၂ ဦးကို ရဲတပ်ဖွဲ့က ခြေရာခံစုံစမ်းခဲ့ပြီး လှိုင်သာယာမြို့နယ်နဲ့ သာကေတမြို့နယ်တွေမှာ သီးခြားစီ ဖမ်းဆီးရမိခဲ့တာဖြစ်တယ်လို့ သိရပါတယ်။
ဒေသခံတချို့ရဲ့ ပြောပြချက်အရ အခင်းဖြစ်ပွားချိန်မှာ ပျူစောထီးအဖွဲ့ဝင်တွေကလည်း အဲဒီရပ်ကွက်ထဲမှာ လမ်းကင်းလှည့်နေခဲ့ကြတယ်လို့ သိရပြီး လက်ရှိမှာတော့ ဒီအမှုနဲ့ပတ်သက်တဲ့ အသေးစိတ်အချက်အလက်တွေကို သက်ဆိုင်ရာက ဆက်လက်စုံစမ်းစစ်ဆေးနေဆဲ ဖြစ်ပါတယ်။
ဒီဖြစ်စဉ်ဟာ ဇွန်လ ၂၅ ရက် ညပိုင်းမှာ ဖြစ်ပွားခဲ့တာဖြစ်ပြီး ဇွန်လ ၂၆ ရက်မှာ သေဆုံးနေတဲ့အခြေအနေကို သိရှိပြီးနောက် ရဲတပ်ဖွဲ့က စုံစမ်းဖော်ထုတ်ခဲ့တာ ဖြစ်ပါတယ်။
