၈ ဇူလိုင် ၂၀၂၆ | New Day Myanmar

ရန်ကုန်မြစ်မှာ လာမယ့် ဇူလိုင် ၁၄ ရက်ကနေ ၁၈ ရက်အထိ သာမန်ထက် ထူးကဲဒီရေ တက်နိုင်တာကြောင့် မြစ်ကမ်းနားဒေသအနီး နေထိုင်သူတွေအနေနဲ့ ကြိုတင်ပြင်ဆင်ထားကြဖို့ မြန်မာ့ဆိပ်ကမ်းအာဏာပိုင်က သတိပေးချက် ထုတ်ပြန်ထားပါတယ်။

အဲဒီကာလအတွင်း ရန်ကုန်မြစ်ရဲ့ ဒီရေဟာ အခြေခံရေစစ်မျဉ်းအထက် ၂၀ ဒသမ ၀၁ ပေကနေ ၂၀ ဒသမ ၇၀ ပေအထိ မြင့်တက်နိုင်တယ်လို့ ထုတ်ပြန်ချက်မှာ ဖော်ပြထားပါတယ်။

မြန်မာ့ဆိပ်ကမ်းအာဏာပိုင်ကတော့ ၂၀၁၄–၂၀၁၅ ခုနှစ်တွေမှာလည်း ရန်ကုန်မြစ်ရေဟာ အခြေခံရေစစ်မျဉ်းအထက် ၂၂ ပေခန့်အထိ တက်ခဲ့ဖူးတာကြောင့် အခုခန့်မှန်းဒီရေအမြင့်အပေါ် စိုးရိမ်ဖွယ်မရှိဘူးလို့ ပြောထားပါတယ်။

ဒါပေမဲ့ ရန်ကုန်မြစ်ရဲ့ ခန့်မှန်းဒီရေအမြင့်ဟာ အခြေခံရေစစ်မျဉ်းအထက် ပေ ၂၀ ကျော်လွန်နိုင်တဲ့အခြေအနေဖြစ်တာကြောင့် မြစ်ကမ်းနားဒေသတွေမှာ နေထိုင်ကြတဲ့ ပြည်သူတွေ၊ ဆိပ်ကမ်းလုပ်သားတွေ၊ လှေဆိပ်နဲ့ ကမ်းနားလုပ်ငန်းလုပ်ကိုင်သူတွေအနေနဲ့ ပစ္စည်းရွှေ့ပြောင်းတာ၊ လှေယာဉ်တွေ လုံခြုံစွာချည်နှောင်ထားတာနဲ့ ရေနိမ့်နေရာတွေမှာ ကြိုတင်သတိထားတာတွေ ဆောင်ရွက်ထားနိုင်ဖို့ သတိပေးထားတာ ဖြစ်ပါတယ်။

ရန်ကုန်မြစ်ဟာ ဒီရေလှုပ်ရှားမှုအပြောင်းအလဲ မြင့်မားတဲ့ မြစ်ဝကျွန်းပေါ်မြစ်တခုဖြစ်ပြီး ထူးကဲဒီရေတက်ချိန်တွေမှာ ကမ်းနားနိမ့်ပိုင်းနေရာတွေ၊ ဆိပ်ကမ်းဝန်းကျင်၊ လှေဆိပ်တွေ၊ ကုန်တင်ကုန်ချနေရာတွေနဲ့ မြစ်ကမ်းအနီးနေအိမ်တွေမှာ ရေဝင်ရောက်နိုင်တဲ့အန္တရာယ် ရှိနိုင်ပါတယ်။

ဒါကြောင့် ဇူလိုင် ၁၄ ရက်ကနေ ၁၈ ရက်အတွင်း ရန်ကုန်မြစ်ကမ်းနားတလျှောက် နေထိုင်သူတွေအနေနဲ့ သက်ဆိုင်ရာအဖွဲ့အစည်းတွေရဲ့ ထပ်မံထုတ်ပြန်ချက်တွေကို စောင့်ကြည့်ပြီး လိုအပ်တဲ့ ကြိုတင်ကာကွယ်မှုတွေ ဆောင်ရွက်ထားကြဖို့ လိုအပ်နေပါတယ်။