၆ ဇူလိုင် ၂၀၂၆ | New Day Myanmar
ဇူလိုင် ၅ ရက် ညနေပိုင်းကနေ ဇူလိုင် ၆ ရက် မွန်းလွဲပိုင်းအထိ ရရှိထားတဲ့ ကနဦးသတင်းတွေအရ ရန်ကုန်၊ ပဲခူး၊ ဧရာဝတီ၊ မွန်နဲ့ ရခိုင်တို့က မြို့နယ် ၉ ခုမှာ လေပြင်းနဲ့ လေဆင်နှာမောင်း တိုက်ခတ်ခဲ့ပြီး နေအိမ် ၂၀၉ လုံးထက်မနည်း ပျက်စီးခဲ့ပါတယ်။ အရပ်သား ၂ ဦးနဲ့ သံဃာတော် ၂ ပါးလည်း ဒဏ်ရာရခဲ့ပါတယ်။
မွန်ပြည်နယ်၊ ပေါင်မြို့နယ်၊ ကဒါရပ်ကွက်နဲ့ ကဒုံစီးရပ်ကွက်မှာ ဇူလိုင် ၅ ရက် ည ၇ နာရီခွဲဝန်းကျင်က လေဆင်နှာမောင်းတိုက်ခတ်ပြီး နေအိမ် ၇၀ ကျော် ပျက်စီးခဲ့ပါတယ်။
ဘုန်းကြီးကျောင်း၊ စာသင်ကျောင်း၊ လူဝင်မှုကြီးကြပ်ရေးရုံးနဲ့ တခြားဌာနဆိုင်ရာအဆောက်အအုံတချို့လည်း ပျက်စီးခဲ့ပြီး သံဃာတော် ၂ ပါး ဒဏ်ရာရခဲ့ပါတယ်။ အဲဒီအထဲက တပါးမှာ ဒဏ်ရာပြင်းထန်တယ်လို့ သိရပါတယ်။ သစ်ပင်တွေနဲ့ လျှပ်စစ်မီးတိုင်တွေလည်း လဲကျခဲ့ပါတယ်။
ပဲခူးတိုင်း၊ နတ်တလင်းမြို့နယ်၊ ကံသာယာကျေးရွာနဲ့ အနီးဝန်းကျင်ရွာတွေမှာ ည ၈ နာရီခွဲဝန်းကျင်က လေဆင်နှာမောင်းတိုက်ခတ်ပြီး နေအိမ် ၆၀ ကျော် ပျက်စီးခဲ့ပါတယ်။
နေအိမ်ပြိုကျမှုအတွင်း ပိတ်မိခဲ့တဲ့ ဇနီးမောင်နှံ ၂ ဦး ဒဏ်ရာပြင်းထန်ခဲ့ပြီး လျှပ်စစ်မီးတိုင်နဲ့ ဆက်သွယ်ရေးတာဝါတိုင်တွေ ပျက်စီးတာကြောင့် ဒေသတွင်း ဆက်သွယ်ရေးပြတ်တောက်မှုတွေလည်း ရှိနေပါတယ်။
သာယာဝတီမြို့နယ်၊ ငဖျူကလေးကျေးရွာမှာလည်း ည ၉ နာရီဝန်းကျင်က လေပြင်းတိုက်ခတ်ပြီး အခြေခံပညာအထက်တန်းကျောင်းခွဲ အဆောက်အအုံရဲ့ အမိုးလန်ပျက်စီးခဲ့ပါတယ်။
ရခိုင်ပြည်နယ်၊ သံတွဲမြို့နယ်၊ ပိန္နဲတောကြီးကျေးရွာမှာ ညနေ ၆ နာရီဝန်းကျင်က လေဆင်နှာမောင်းတိုက်ခတ်ပြီး နေအိမ် ၄၅ လုံး ပျက်စီးခဲ့ပါတယ်။
နေအိမ်ပျက်စီးမှုကြောင့် ဒေသခံ ၂၀၀ ကျော် နေစရာအခက်အခဲဖြစ်နေပြီး ဆွေမျိုးတွေရဲ့ နေအိမ်တွေ၊ ဘုန်းကြီးကျောင်းနဲ့ စာသင်ကျောင်းတွေမှာ ယာယီခိုလှုံနေရပါတယ်။ လူထိခိုက်ဒဏ်ရာရတာတော့ မရှိဘူးလို့ ကနဦးသိရပါတယ်။
ရန်ကုန်တိုင်း၊ တိုက်ကြီးမြို့နယ်၊ ဥက္ကံဘက်က ဘွက်ကုန်းကျေးရွာအုပ်စု၊ ဘိုသိုးကျေးရွာဘက်မှာ ည ၈ နာရီခွဲဝန်းကျင်က လေပြင်းတိုက်ခတ်ပြီး နေအိမ် အနည်းဆုံး ၃၀ လုံး ပျက်စီးခဲ့ပါတယ်။
အခင်းဖြစ်တဲ့ ကျေးရွာအမည်ကို သတင်းရင်းမြစ်တချို့မှာ ကွဲလွဲဖော်ပြထားပြီး လူထိခိုက်မှုအခြေအနေကိုတော့ အတည်မပြုနိုင်သေးပါဘူး။
ကွမ်းခြံကုန်းမြို့နယ်၊ သိုက်ကုန်းကျေးရွာမှာလည်း ညနေ ၆ နာရီဝန်းကျင်က လေပြင်းတိုက်ခတ်ပြီး နေအိမ် ၄ လုံး ပြိုကျပျက်စီးခဲ့ပါတယ်။ လူထိခိုက်တာမရှိပေမယ့် သစ်ပင်တွေနဲ့ လျှပ်စစ်မီးတိုင်တွေ လဲကျခဲ့ပါတယ်။
လက်ရှိအချိန်အထိ နေရာအလိုက် အရေအတွက်ရရှိထားတဲ့ ဖြစ်စဉ်တွေကို ပေါင်းတွက်ရင် နေအိမ် ၂၀၉ လုံးထက်မနည်း၊ စာသင်ကျောင်း ၂ ကျောင်းထက်မနည်း၊ ဘုန်းကြီးကျောင်းနဲ့ ဌာနဆိုင်ရာအဆောက်အအုံတချို့ ပျက်စီးခဲ့ပါတယ်။
ဧရာဝတီတိုင်းနဲ့ မော်လမြိုင်ဘက်မှာလည်း လေပြင်းကြောင့် ထိခိုက်ပျက်စီးမှုတွေ ရှိတယ်လို့ သတင်းတွေ ထွက်ပေါ်နေပေမယ့် မြို့နယ်၊ ကျေးရွာနဲ့ ပျက်စီးမှုအရေအတွက် အသေးစိတ် မရရှိသေးတာကြောင့် စုစုပေါင်းစာရင်းထဲ မထည့်သွင်းထားပါဘူး။
ဇူလိုင် ၆ ရက် မနက်ပိုင်းမှာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာကနေ အားအလွန်ကောင်းနေတယ်လို့ စစ်အုပ်စုရဲ့ မိုးလေဝသနဲ့ ဇလဗေဒဌာနက ထုတ်ပြန်ထားပါတယ်။
လက်ရှိစာရင်းဟာ ကနဦးရရှိထားတဲ့ အချက်အလက်တွေဖြစ်တာကြောင့် ထိခိုက်ပျက်စီးမှုအရေအတွက် ထပ်မံမြင့်တက်လာနိုင်ပါတယ်။
