ထိုင်းနိုင်ငံမှာ ကျင်းပမယ့် ဘင်္ဂလားပင်လယ်အော် ဒေသနိုင်ငံများ နည်းပညာနဲ့ စီးပွားရေး ပူးပေါင်းဆောင်ရွက်ရေးအဖွဲ့ BIMSTEC ၆ ကြိမ်မြောက်အစည်းအဝေးမှာ စစ်ကောင်စီတက်ရောက်ဖို့ ဖိတ်ကြားခဲ့တဲ့ကိစ္စကို လူ့အခွင့်အရေးဆိုင်ရာ အာဆီယံလွှတ်တော်အမတ်များအဖွဲ့ APHR က ပြင်းပြင်းထန်ထန်ကန့်ကွက် ရှုတ်ချလိုက်ပါတယ်။
ထိုင်းနိုင်ငံမှာ ကျင်းပမယ့် BIMSTEC အစည်းအဝေးကို ထိုင်းဝန်ကြီးချုပ် Paetongtarn Shinawatra က သဘာပတိအဖြစ် တာဝန်ယူကျင်းပမှာဖြစ်ပြီ စစ်ခေါင်းဆောင်မင်းအောင်လှိုင်ကို ဖိတ်ကြားခဲ့တာဖြစ်ပါတယ်။ ဒီအစည်းအဝေးကို BIMSTEC အဖွဲ့ဝင်နိုင်ငံတွေ ဖြစ်တဲ့ အိန္ဒိယ၊ သီရိလင်္ကာ၊ ဘင်္ဂလားဒေ့ရှ်၊ ဘူတန်၊ မြန်မာ၊ နီပေါနဲ့ ထိုင်းနိုင်ငံတို့ ပါဝင်တက်ရောက်ကြမှာဖြစ်ပါတယ်။
ဧပြီ ၃ ရက်မှာတော့ စစ်ခေါင်းဆောင် မင်းအောင်လှိုင်ဟာ ထိုင်းနိုင်ငံကို ရောက်ရှိနေပြီဖြစ်တယ်လို့ သတင်းတွေမှာဖော်ပြကြပါတယ်။
လူ့အခွင့်အရေးဆိုင်ရာ အာဆီယံလွှတ်တော်အမတ်များအဖွဲ့ APHR ကတော့ ဒီအစည်းအဝေးမှာ မြန်မာစစ်ကောင်စီရဲ့ ပါဝင်မှုကို ငြင်းပယ်ရမှာဖြစ်တယ်လို့ ဧပြီ ၂ ရက်ကြေညာချက်မှာဖော်ပြထားပါတယ်။
ဒီလို ဖိတ်ကြားမှုဟာ စစ်ကောင်စီရဲ့ ရက်စက်ကြမ်းကြုတ်မှုတွေကို တရားဝင်စေတဲ့ အပြုအမှုဖြစ်ပြီး ငြိမ်းချမ်းရေးဆိုင်ရာ ကတိကဝတ်တွေကို လျစ်လျူရာရောက်တယ်လို့ လည်း ဆိုပါတယ်။
၂၀၂၁ ခုနှစ် အာဏာသိမ်းပြီးချိန်ကစလို့ အရပ်သားတွေကို နေစဉ်ရက်ဆက် လေကြောင်းက တိုက်ခိုက်တာ၊ အရပ်သား ထောင်ပေါင်းများစွာကိုသတ်ဖြတ်တာ၊ လူ့အခွင့်အရေချိုးဖောက်မှုတွေအဆိုးရွားဆုံး ကျူးလွန်နေတာကြောင့် အသိအမှတ်ပြုသလိုဖြစ်မှာကို ကန့်ကွက်တယ်လို့ ဆိုပါတယ်။
ဓါတ်ပုံ – APHR
