၁၁ ဖေဖော်ဝါရီ၊ ၂၀၂၅
အမ်းပဒန်းလမ်းမပေါ်က ငဖဲမြို့နယ် ဂုတ်စီးရိုးကျေးရွာတိုက်ပွဲမှာ နည်းဗျူဟာမှူး ဒုတိယဗိုလ်မှူးကြီးကျော်ကျော်သက်ကို AA နဲ့ ပူးပေါင်းတပ်တွေ ဖမ်းဆီးနိုင်ခဲ့တယ်လို့ စစ်ရေးသတင်းရင်းမြစ်တွေဆီက သိရပါတယ်။
ဂုတ်စီးရိုးကျေးရွာအနီးက တိုက်ပွဲမှာ စစ်ကောင်စီဘက်က သေဆုံးသူများပြားပြီး ရာချီရှိတယ်လို့ သိရပါတယ်။ ထွက်ပြေးသူတွေထဲ တပ်မ ၉၉ က ယာယီနည်းဗျူဟာမှူး ဒုဗိုလ်မှူးကြီးကျော်ကျော်သက်လည်း ပါဝင်ခဲ့ပြီး မလွတ်တော့တဲ့အတွက် လက်နက်ချတာ ဖြစ်တယ်လို့လည်း ဆိုပါတယ်။
တိုက်ပွဲအခြေအနေကို AA က တရားဝင်ထုတ်ပြန်ကြေညာတာမျိုး မရှိသေးဘဲ ဇန်နဝါရီလမှာ နောက်ဆုံးထုတ်ပြန်ထားတဲ့ အမ်းပဒန်းကားလမ်းမပေါ်က တိုက်ပွဲပြင်းထန်နေပြီး ထွက်ပြေးနေသူတွေကို AA က လိုက်လံ ရှင်းလင်းနေတယ်လို့ ပြောဆိုထားပါတယ်။
AA ဟာ ရခိုင်ပြည်နယ်မှာ နပခအပါအဝင် မြို့နယ် ၁၄ ခု၊ ချင်းပြည်နယ်မှာ ပလက်ဝမြို့တို့ကို သိမ်းပိုက်ထားပြီးအခုအခါ စစ်မျက်နှာပြင်ကို မကွေးတိုင်းနဲ့ ဧရာဝတီတိုင်းတို့ကို ဖြန့်ကျက်ထားတာ ဖြစ်ပါတယ်။
ပုံစာ – ဇန်နဝါရီ ၂၇ ရက်က ထုတ်ပြန်ခဲ့တဲ့ AA သတင်းထုတ်ပြန်ချက်
