၂၈ အောက်တိုဘာ၊ ၂၀၂၄
အောက်တိုဘာ ၂၇ ညပိုင်းက ရှမ်းပြည်နယ်မြောက်ပိုင်းက MNDAA ထိန်းချုပ်နယ်မြေ သိန္နီမြို့၊ TNLA ထိန်းချုပ်ထားတဲ့ နောင်ချိုမြို့နဲ့ KIA တပ်မဟာ ၁ တပ်ရင်း ၂ အပိုင်ထဲမှာရှိတဲ့ ပြိန်းလုံရွာတို့ကို စစ်ကောင်စီလေတပ်က ဗုံးကြဲတိုက်ခိုက်ခဲ့တယ်လို့ ဒေသတွင်းသတင်းတွေက ဖော်ပြပါတယ်။
အောက်တိုဘာလ ၂၇ ရက် ည ၉ နာရီ ၅၀ မိနစ်နဲ့ ည ၉ နာရီ ၅၃ မိနစ်အချိန်တွေမှာ စစ်ကောင်စီလေတပ်က သိန္နီမြို့ကို ဗုံးကြဲတိုက်ခိုက်ခဲ့ပြီး သိန္နီ မြို့ က KBC ခရစ်ယာန် ဘုရားကျောင်း၊ အမှတ် ၃ ရပ်ကွက်က အထွေထွေအုပ်ချုပ်ရေးမှူးရုံးနဲ့ လူနေအိမ်အများအပြား ပျက်စီးခဲ့တယ်လို့ သိရပါတယ်။ ဘုရားကျောင်း၊ ထွေ/အုပ်ရုံးနဲ့ လူနေအိမ်တွေ ပျက်စီးတာကို အတည်ပြုပြီး လူထိခိုက်မှု ရှိမရှိဆက်ပြီး စုံစမ်းနေတယ်လို့ ရှမ်းမြောက်ဒေသခံတစ်ဦးက ဆိုပါတယ်။
အောက်တိုဘာ ၂၇ ရက် ည၇ နာရီခွဲဝန်းကျင်မှာ နောင်ချိုမြို့နယ်၊ သပြေရေရပ်ကွက်နဲ့ တခြားလူနေအိမ်တွေကို စစ်ကောင်စီက လေကြောင်းက ဗုံးကြဲချပြီး လူထိခိုက်သေဆုံးမှုတွေ ရှိတယ်လို့ သိရပါတယ်။ နောင်ချို သပြေရေရပ်ကွက်ကို ပထမတကြိမ် ဗုံး ၂ လုံးတွဲနဲ့ ဒုတိယတကြိမ်မှာ ဗုံး ၈ လုံးတွဲ ကျဲချခဲ့တယ်လို့ ဆိုပါတယ်။ လူနေရပ်ကွက်တွေထဲ ကျတဲ့အတွက် လူသေဆုံးထိခိုက်မှုများနိုင်ပြီး အသေးစိတ်မသိရသေးဘူးလို့ ဒေသခံတွေက ဆိုပါတယ်။
အောက်တိုဘာ ၂၈ မနက် ၂ နာရီခွဲဝန်းကျင်က KIA တပ်မဟာ(၁၀) တပ်ရင်း(၂) နယ်မြေထဲမှာ ရှိတဲ့ ပြိန်းလုံကျေးရွာအနီး ရေပူစမ်းနေရာမှာလည်း စစ်ကောင်စီလေတပ်က ဂျက်လေယာဉ်နဲ့ နှစ်ကြိမ် ဗုံးကြဲခဲ့တယ်လို့ သိရပါတယ်။
စစ်ကောင်စီဟာ ၁၀၂၇ နှစ်ပတ်လည်အဖြစ် လောက်ကိုင်နဲ့ နမ့်ခမ်းမြို့တွေကိုလည်း လေကြောင်းက တိုက်ခိုက်ခဲ့ပါတယ်။ လောက်ကိုင်မြို့ကို ဗုံးကြဲတိုက်ခိုက်တဲ့အတွက် လူ ၄ ဦးထိခိုက်ဒဏ်ရာရပြီး ဟိုတယ်နဲ့လူနေအိမ်တွေ ထိခိုက်ပျက်စီးဆုံးရှုံးခဲ့ရပါတယ်။
ပုံစာ – စစ်ကောင်စီ လေကြောင်းတိုက်ခိုက်ခဲ့တဲ့ သိန္နီမြို့က KBC ခရစ်ယာန်ဘုရားရှိခိုးကျောင်းကို မြင်တွေ့ရစဉ်
Photo – T Awng
