၂၀ ဩဂုတ်၊ ၂၀၂၄
မြန်မာနိုင်ငံကို လူသားချင်းစာနာထောက်ထားမှုအကူအညီတွေ ပိုပြီး ပေးနိုင်ဖို့အတွက် ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) အကြီးအကဲနဲ့ စစ်ကောင်စီ လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေး ဝန်ကြီးဌာန တို့ ဩဂုတ်လ ၁၉ ရက်မှာ တွေ့ဆုံခဲ့ပါတယ်။
လူသားချင်းစာနာထောက်ထားမှုအကူအညီတွေပေးဖို့အတွက် စစ်ကောင်စီက UNOCHA ရဲ့ ဝန်ထမ်းတွေကို ပြည်ဝင်ခွင့် Visa ပိတ်ထားတာဖွင့်ပေးဖို့ ၊ အကူအညီလိုအပ်နေတဲ့နေရာကို သွားတာကို ပိတ်တာပြန်ဖွင့်ပေးဖို့ နဲ့ စစ်ကောင်စီက NGO အဖွဲ့တွေအတွက် အသင်းမှတ်ပုံတင်ကိစ္စတွေမှာ ကန့်သတ်ချုပ်ချယ်ထားတာတွေ ပြန်ဖွင့်ပေးဖို့ UNOCHA က စစ်ကောင်စီကို တောင်းဆိုခဲ့တယ်လို့ သိရပါတယ်။
ဒါပေမယ့် အဲ့ဒီတောင်းဆိုချက်တွေကို စစ်ကောင်စီက လိုက်လျောသလားဆိုတာကိုတော့ နှစ်ဘက်စလုံးက ကြေညာခြင်းမရှိသေးပါဘူး။
စစ်ကောင်စီရဲ့ လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေး ဝန်ကြီးဌာန ဒုဝန်ကြီး ဦးစိုးကြည် ဟာ UNOCHA အကြီးအကဲ Mr. Sajjad Mohammad Sajid ၊ ကုလသမဂ္ဂ ယာယီဌာနေညှိနှိုင်းရေးမှူးနဲ့ လူသားချင်းစာနာမှုဆိုင်ရာ ယာယီညှိနှိုင်းရေးမှူး Mr. Marcoluigi Corsi တို့ကို နေပြည်တော်မှာ လက်ခံတွေ့ဆုံခဲ့တယ်လို့ စစ်ကောင်စီရဲ့ ဝါဒဖြန့် သတင်းစာတွေမှာဖော်ပြပါတယ်။
သြဂုတ်လ ၁၉ ရက်မှာ ကျရောက်တဲ့ ကမ္ဘာ့လူသားချင်းစာနာမှုနေ့မှာတော့ မြန်မာနိုင်ငံမှာ ကလေး ခြောက်သန်း အပါအဝင် လူ ၁၈ ဒသမ ၆ သန်းဝန်းကျင်ဟာ လူသားချင်းစာနာမှုဆိုင်ရာ အရေးပေါ် အကူအညီလိုအပ်နေတယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ထားပါတယ်။
ပုံစာ – NOCHA အကြီးအကဲ Mr. Sajjad Mohammad Sajid ၊ ကုလသမဂ္ဂ ယာယီဌာနေညှိနှိုင်းရေးမှူးနဲ့ လူသားချင်းစာနာမှုဆိုင်ရာ ယာယီညှိနှိုင်းရေးမှူး Mr. Marcoluigi Corsi နဲ့ စစ်ကောင်စီ လူကယ်ပြန်ဒုဝန်ကြီး ဦးစိုးကြည်တို့ တွေ့ဆုံဆွေးနွေးစဉ်
