ငလျှင်ဘေးသင့်ပြည်သူတွေဆီ အကူအညီအညီတွေတိုက်ရိုက်ရောက်ရှိရေး ဆောင်ရွက်ပေးရန် နိုင်ငံတကာ အစိုးရတွေနဲ့ အကူအညီပေးရေးအဖွဲ့တွေကို ကရင်နီပြည်နယ်ကြားကာလ အုပ်ချုပ်ရေးကောင်စီ(IEC)က ဒီကနေ့မှာ မေတ္တာရပ်ခံလိုက်ပါတယ်။
လက်ရှိအခြေအနေအရ နိုင်ငံတကာအစိုးရတွေနဲ့ နိုင်ငံတကာအကူအညီပေးရေးအဖွဲ့တွေအနေနဲ့ စစ်ကိုင်းတိုင်း နဲ့ မန္တလေးတိုင်းတို့ အပါအဝင် နိုင်ငံတစ်ဝန်းလုံးက ငလျင်ဘေးဒဏ်ခံစားနေရတဲ့ ပြည်သူတွေအတွက် အရေးပေါ် လူသားချင်းစာနာထောက်ထားရေးဆိုင်ရာ အကူအညီတွေ ပံ့ပိုးပေးဖို့ IECက တိုက်တွန်းထား ပါတယ်။
လူသားချင်းစာနာထောက်ထားရေး အကူအညီတွေကို အမှန်တကယ်လိုအပ်နေတဲ့ အောက်ခြေ ပြည်သူတွေဆီ တိုက်ရိုက်ရောက်ရှိစေရေး ဒေသခံအရပ်ဖက်အဖွဲ့အစည်းတွေနဲ့ ပူးပေါင်းပြီး အလေးအနက်ထား ဆောင်ရွက် ပေးဖို့လည်း တောင်းဆိုထားပါတယ်။
ကရင်နီပြည်သည်လည်း ငလျင်လှုပ်ခတ်မှုဒဏ်ကို သက်ရောက်ခံစားခဲ့ရပြီး ထိခိုက် ပျက်စီးမှု အမြောက်အမြား မရှိခဲ့ပေမယ့် ပြည်သူတွေ တုန်လှုပ်ခြောက်ခြားနေကြကြောင်းနဲ့ ငလျင်ဒဏ်နောက်ဆက်တွဲအနေနဲ့ ပြည်သူတွေ အငတ်ဘေးပိုမိုကြုံလာရနိုင်ပြီး ဘေးထွက်ဆိုးကျိုးတွေရှိလာမှာကြောင့် သက်ဆိုင်ရာဒေသ အဖွဲ့အစည်း တွေ အနေနဲ့ သဘာဝဘေးအန္တရာယ်ဆိုင်ရာ ကြိုတင်ကာကွယ် ပြင်ဆင်မှုတွေ ပြုလုပ်ထားဖို့ လိုအပ်တယ်လို့လည်း IEC က တိုက်တွန်းထားပါတယ်။
ဆက်လက်ပြီး ငလျင်ဘေးအန္တရာယ်ကြောင့် ကရင်နီပြည်အတွင်း လာရောက်ခိုလှုံလိုတဲ့ ပြည်သူတွေရှိပါက ခိုလှုံနိုင်ကြောင်း နဲ့ အတတ်နိုင်ဆုံး ကြိုဆိုပံ့ပိုးပေးမယ်လို့လည်း ဖိတ်ခေါ်ထားပါတယ်။
တရားမဝင် အာဏာသိမ်းစစ်တပ်မှ ငလျင်ဘေးကို အကြောင်းပြုလျက် ပိုမိုဆိုးရွားတဲ့ ဖိနှိပ်ကန့်သတ် မှုတွေ လုပ်ဆောင်လာနိုင်တာကိုလည်း သတိကြီးစွာ တုံ့ပြန်ကြရန် အသိပေးထားပြီး ကရင်နီပြည် ကြားကာလအုပ် ချုပ်ရေးကောင်စီအနေနဲ့ ကရင်နီပြည်အတွင်း အင်အားစုတွေနဲ့ ပူးပေါင်းပြီး ငလျင်ဒဏ်ကြောင့် ထိခိုက်နစ်နာ ဆုံးရှုံးခဲ့ရတဲ့ ပြည်သူတွေအတွက် ပံ့ပိုးကူညီမှုတွေ လုပ်ဆောင်သွားမယ်လို့ ထုတ်ပြန်ထားပါတယ်။
ပုံစာ – (စစ်ကိုင်း မင်းကွန်း တိနိကျောင်း ရွှေရတု ငါးထပ်ဆောင်ပြိုကျထားမှု)
ဓာတ်ပုံ- လူမှုကွန်ရက်
