၁၇ ဧပြီ ၂၀၂၆ | New Day Myanmar
လေဘနွန်၊ အီရန်နဲ့ အမေရိကန်ပြည်ထောင်စုတို့အကြား အပစ်အခတ်ရပ်စဲရေး သဘောတူညီမှု ရရှိပြီးနောက် ဟော်မုဇ်ရေလက်ကြားကို ကုန်သွယ်ရေးသင်္ဘောတွေ အားလုံးအတွက် ပြန်ဖွင့်လိုက်ပြီဖြစ်တယ်လို့ သောကြာနေ့မှာ နှစ်ဖက်လုံးက ပြောကြားခဲ့ပါတယ်။
အဲဒီကြေညာချက်ထွက်ပေါ်ပြီးနောက် ကမ္ဘာ့ရေနံဈေးတွေ ချက်ချင်းကျဆင်းသွားခဲ့ပါတယ်။ ဒါပေမယ့် သင်္ဘောတွေဟာ ညှိနှိုင်းသတ်မှတ်ထားတဲ့ လမ်းကြောင်း အတိုင်းသာ သွားလာရမယ်လို့ အီရန်ဘက်က သတ်မှတ်ထားပါတယ်။ အဆိုပါ လမ်းကြောင်းဟာ အီရန်ကမ်းရိုးတန်းနဲ့ နီးကပ်တဲ့ လမ်းကြောင်းဖြစ်နိုင်တယ်လို့ သင်္ဘောသွားလာမှု ကျွမ်းကျင်သူတွေက သုံးသပ်ကြပါတယ်။
အီရန်ရဲ့ ကြေညာချက်ထွက်ပြီး မကြာခင်မှာပဲ အမေရိကန်သမ္မတ ဒေါ်နယ်လ်ထရမ့်က ဟော်မုဇ်ရေလက်ကြား အပြည့်အဝ ပြန်ဖွင့်လိုက်ပြီဖြစ်ပြီး သင်္ဘောသွားလာမှု အဆင်သင့်ဖြစ်နေပြီလို့ လူမှုကွန်ရက်မှာ ရေးသားခဲ့ပါတယ်။
ဒါပေမယ့် နောက်ပိုင်းမှာတော့ အီရန်သင်္ဘောတွေ ထွက်ခွာမယ့်အပေါ် အမေရိကန်ဘက်က စတင်ထားတဲ့ ပိတ်ဆို့မှုတွေ ဆက်ရှိနေဦးမယ်လို့ ထရမ့်က ပြောကြားခဲ့ပါတယ်။ အီရန်ဘက်ကလည်း အဲဒီပိတ်ဆို့မှုတွေကို လက်တုံ့ပြန်သွားမယ်လို့ သတိပေးထားပါတယ်။
ရေလမ်းကြောင်း ပြန်လည်ဖွင့်လိုက်တဲ့ သတင်းကြောင့် ပါရှန်းပင်လယ်ကွေ့ကနေ ရေနံနဲ့ သဘာဝဓာတ်ငွေ့ ထုတ်လုပ်တင်ပို့မှုတွေ ပြန်တက်လာမယ်လို့ ဈေးကွက်ထဲမှာ မျှော်လင့်ချက်တွေ မြင့်တက်လာပါတယ်။
ကမ္ဘာ့ရေနံဈေးညွှန်းကိန်း ဘရန့် (Brent) ရေနံစိမ်းဈေးဟာ ၁၀ ရာခိုင်နှုန်းကျော် ကျဆင်းပြီး တစ်စည်ကို ၉၀ ဒေါ်လာအောက်ကို ကျဆင်းသွားခဲ့ပြီး တစ်လကျော်အတွင်း အနိမ့်ဆုံးအဆင့်ကို ရောက်ရှိလာပါတယ်။ အမေရိကန် ရေနံညွှန်းကိန်း WTI ကလည်း ၁၀ ရာခိုင်နှုန်းကျော် ကျဆင်းပြီး တစ်စည်ကို ၈၄ ဒေါ်လာအောက်အထိ ကျဆင်းသွားခဲ့ပါတယ်။
ဒါပေမယ့် ရေနံဈေးတွေဟာ စစ်ပွဲမစတင်မီအခြေအနေထက် များစွာ မြင့်နေဆဲဖြစ်တယ်လို့ သိရပါတယ်။
