စစ်ကောင်စီက အကျဉ်းထောင်/အချုပ်ထောင်အသီးသီးမှာ ပြစ်ဒဏ်ကျခံနေတဲ့ အကျဉ်းသား/အကျဉ်းသူ ၄၈၀၀ ကျော်ကို ဧပြီ ၁၇ (မြန်မာနှစ်ဆန်းတစ်ရက်နေ့) မှာ လွတ်ငြိမ်းခွင့်ပြုလိုက်ပါတယ်။
စစ်ကောင်စီဥက္ကဌအနေနဲ့ မြန်မာနှစ်သစ်အခါသမယ အထိမ်းအမှတ် အားဖြင့်လည်းကောင်း၊ နိုင်ငံတော်၏ တည်ဆောက်ရေးလုပ်ငန်းများတွင် ပါဝင်ဆောင်ရွက်နိုင်ရန် လည်းကောင်း၊ ပြည်သူလူထုနှလုံး စိတ်ဝမ်းအေး ချမ်းစေရေးနဲ့ လူမှုရေးအရငဲ့ညှာသောအားဖြင့် လည်းကောင်း ရည်ရွယ်၍ လွတ်ငြိမ်းခွင့်ပြုတယ်လို့ ဆိုပါတယ်။
ထို့ကြောင့် အကျဉ်းထောင်/အချုပ်ထောင်အသီးသီးမှာ ပြစ်ဒဏ်ကျခံနေတဲ့ အကျဉ်းသား/အကျဉ်းသူ ၄၈၉၃ ဦး ကို ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ “နောက်တစ်ကြိမ်ပြစ်မှု ထပ်မံကျူးလွန်ပါက ၎င်းပြစ် ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံ ပါမည်” ဟူသော စည်းကမ်း သတ်မှတ် ချက်နဲ့ ယင်းတို့ကျခံရန်ကျန်ရှိသော ပြစ်ဒဏ်များအပေါ် လျှော့ပေါ့၍ ပြစ်ဒဏ် လွတ်ငြိမ်းခွင့် ပြုလိုက်တယ်လို့ သိရပါတယ်။
