၂၄ ဒီဇင်ဘာ၊ ၂၀၂၄
ချင်းပြည်နယ်အတွင်း စစ်ကောင်စီ တပ်စခန်းတွေ ကင်းစင်ဖို့ အပြီးသတ်တိုက်ထုတ်နေတဲ့ ကာလမှာ မင်းတပ်မြို့နှင့် ကန်ပက်လက်မြို့တို့ကို သိမ်းပိုက်အောင်မြင်ခဲ့တဲ့ ချင်းညီနောင်နှင့် မဟာမိတ်တပ်ပေါင်းစုတွေရဲ့ အောင်ပွဲဆင်နိုင်မှုကို လေးမြတ်စွာ ဂုဏ်ပြုကြောင်း Chinland Council က ထုတ်ပြန်ပါတယ်။
ချင်းပြည် (Chinland) တဝှမ်းမှာ တော်လှန်ရေးတိုက်ပွဲဆင်နွဲနေကြတဲ့ သူရဲကောင်း စစ်သည်တွေနဲ့ အသက်သွေး ပေးဆပ်ခဲ့သူတွေကို ဦးညွတ်အလေးပြုကြောင်း လည်း ဂုဏ်ပြုစာမှာ ဖော်ပြထားပါတယ်။
ချင်းညီနောင် (CB) စစ်ဆင်ရေးဟာ ချင်းညီနောင်လှုပ်ရှားနယ်မြေထဲမှာ နောက်ထပ်သိမ်းပိုက်ဖို့ ဖလမ်းနဲ့ တီးတိန်မြို့တို့သာ ကျန်တော့ကြောင်း ချင်းညီနောင် စစ်ရေးတာဝန်ခံက ဧရာဝတီသတင်းဌာနနဲ့ အင်တာဗျူးတစ်ခုမှာ ဖြေထားပါတယ်။
ချင်းညီနောင်က ဖလမ်းမြို့သိမ်းစစ်ဆင်ရေးဖော်ဆောင်နေပြီး ဖလမ်းမြို့က နောက်ဆုံးလက်ကျန် ခြေလျင်တပ်ရင်းအမှတ် -၂၆၈(ခလရ-၂၆၈) တပ်ကုန်းကို သိမ်းပိုက်နိုင်ဖို့ ထိုးစစ်ဆင်နေတယ်လို့ ချင်းစစ်ရေးသတင်းရင်းမြစ်က အတည်ပြုထားပါတယ်။
Photo – Chinland Council
