၂၁ အောက်တိုဘာ၊ ၂၀၂၄
အောက်တိုဘာ ၂၁ ရက် မနက်ပိုင်းမှာ စစ်ကောင်စီက TNLA တပ်တွေ ထိန်းချုပ်ထားတဲ့ နောင်ချိုမြို့နဲ့ နမ့်ဆန်မြို့တွေမှာ
စစ်ကောင်စီလေတပ်က ဂျက်ဖိုက်တာနဲ့ ပေါင် (၃၀၀) နှစ်လုံး အပါအဝင် ဗုံး(၈)လုံး လာရောက်ကြဲချတဲ့အတွက် ပြည်သူတစ်ဦး ထိခိုက်ဒဏ်ရာရခဲ့တယ်လို့ PSLF/TNLA က ထုတ်ပြန်ပါတယ်။
အောက်တိုဘာလ ၂၁ ရက် နံနက် (၁း၁၀)ဝန်းကျင်မှာ နောင်ချိုမြို့ သပြေရပ်ကွက်ကို ပေါင် (၃၀၀)ဗုံး (၂)လုံးနဲ့ ဗုံး(၆)လုံး လာရောက်ကြဲချတိုက်ခိုက်ခဲ့တဲ့အတွက် ဦးဂိုကာနတ်ရဲ့ နေအိမ်နဲ့ ပါဟတ်ရပ်ကွက်ရှိ ဆိုင်ခန်းအချို့ ထိခိုက်ပျက်စီးခဲ့ပြီး ပြည်သူတစ်ဦး ဒဏ်ရာရခဲ့တယ်လို့ ဖော်ပြပါတယ်။
အောက်တိုဘာလ ၂၁ ရက် (၈း၃၀)ဝန်းကျင်မှာ နမ်ဆန်မြို့နယ်၊ ကျောက်ဖြူလေးကျေးရွာကို စစ်ကောင်စီတပ်က ဂျက်ဖိုက်တာနဲ့ လာရောက်ဗုံးကြဲတိုက်ခိုက်ခဲ့တဲ့အတွက် ဘုန်းတော်ကြီးကျောင်းအတွင်းကျရောက်ပေါက်ကွဲခဲ့တယ်လို့ ဆိုပါတယ်။
အောက်တိုဘာလ ၁၉ ရက်မှာလည်း စစ်ကောင်စီတပ်က ဂျက်ဖိုက်တာနဲ့ ၂ ကြိမ် လာရောက်ဗုံးကြဲတိုက်ခိုက်ခဲ့တဲ့အတွက် ပြည်သူ (၄)ဦး သေဆုံးခဲ့ပြီး ၃ ဦး ထိခိုက်ဒဏ်ရာရခဲ့ပါတယ်။ သတင်းကျွတ်လပြည့်ညကလည်း စစ်ကောင်စီတပ်က နောင်ချိုမြို့ကို လေကြောင်းတိုက်ခိုက်မှုကြောင့် ဒေသခံပြည်သူ ၄ ဦး ထိခိုက်ဒဏ်ရာရရှိခဲ့ကြောင်း ထုတ်ပြန်ထားပါတယ်။
ပုံစာ – အောက်တိုဘာ ၂၁ မနက်ပိုင်း စစ်ကောင်စီ လေကြောင်းတိုက်ခိုက်မှုကြောင့် နောင်ချိုမြိုနဲ့ နမ့်ဆန်မြို့တို့မှာ ပျက်စီးမှုမြင်ကွင်းများ
Photo – PSLA/TNLA
