၁၇ မတ် ၊ ၂၀၂၅
စစ်ကောင်စီက စစ်ဆေးရေးဂိတ်တွေမှာ PSMS နည်းပညာအသုံးပြုပြီး ပြည်သူတွေရဲ့ အချက်အလက်တွေကို စစ်ဆေး ဖမ်းဆီးတာတွေ ပိုမိုလုပ်ဆောင်လာတယ်လို့ သိရပါတယ်။
PSMS (Person Scrutinization and Monitoring System )ဆိုတာဟာ လူပုဂ္ဂိုလ်တစ်ဦးချင်းစီကိုစောင့်ကြည့်နိုင်တဲ့အဆင့်မြင့်နည်းပညာတစ်ခုဖြစ်ပြီး AI, Facial Recognition, CCTV Analysis, Biometric Data နည်းပညာတို့နဲ့ တည်ဆောက်ထားတာဖြစ်ပါတယ်။
“အဲဒီနည်းပညာကမြင့်တယ်။ ဂိတ်တွေကိုဖြတ်ရင် မှတ်ပုံတင်ပေးရတယ်မလား။ အဲဒီမှတ်ပုံတင်တွေကို ဂိတ်တွေမှာတပ်ဆင်ထားတဲ့ နည်းပညာနဲ့ ဖတ်တယ်။ မသင်္ကာသူဆိုရင် အချက်ပြတယ်။ ဖုန်းကိုယူစစ်လိုက်တယ်။ အဲဒီနည်းပညာကို ဂိတ်တွေအကုန်လုံးမှာ တပ်နေတယ်။ ပြီးသလောက်ရှိတော့မယ်။ စစ်ဆေးဂိတ်တွေမှာက ရဲနဲ့စစ်သားအပြင် လဝကလည်းပါတယ်။ အဖွဲ့ပေါင်းစုံပါတယ်။ အဲဒီနည်းပညာနဲ့အကျွမ်းတဝင်ရှိဖို့ သီးသန့်သင်တန်းပေးထားတာ” လို့ စစ်ကောင်စီတပ်ဖွဲ့နဲ့ နီးစပ်သူတဦးက ရှင်းပြထားပါတယ်။
စစ်ကောင်စီအနေနဲ့ မြို့တမြို့နဲ့တမြို့ အဝင်အထွက်တွေမှာ လုံခြုံရေးဂိတ်တွေကို အခိုင်အမာတည်ဆောက်ထားပြီး မှတ်ပုံတင်နဲ့တကွလူကို တိုက်ပြီးစစ်ဆေးနေတာဖြစ်တာကြောင့်
စစ်ဆေးရေးဂိတ်တွေရောက်ရင် လက်ကိုင်ဖုန်း လုံးဝအသုံးမပြုရန် ခရီးသည်တင်ယာဉ်လိုင်းတွေက သတိပေးလေ့ရှိပါတယ်။
စစ်ကောင်စီအနေနဲ့ ယခင်ထက် စစ်ဆေးရေးဂိတ်တွေကို အဆင့်မြှင့်တင်တည်ဆောက်ထားကြသလို အထူသဖြင့် ရန်ကုန် – မန္တလေး အမြန်လမ်းကို အထူးစောင့်ကြည့်စစ်ဆေးနေတာဖြစ်တယ်လို့ သိရပါတယ်။
” အတတ်နိုင်ဆုံးခရီးမထွက်တာကောင်းတယ်။ သူတို့ရဲ့ဂိတ်တွေကိုဖြတ်ရင် ဘုရားတရတယ်။ ပြီးတော့မလုံခြုံသလိုခံစားရတယ်။ ပြီးရင်ဘယ်သွားမှာလဲ၊ ဘာကြောင့်သွားတာလဲ အကုန်မေးတယ်။ အထစ်အထစ်ဆိုရင်သွားပြီ” လို့ ခရီးသွားလာသူတဦးကပြောပါတယ်။
ပုံစာ – အမြန်လမ်းတွင်း စစ်ကောင်စီတပ်ဖွဲ့တွေက ပြည်သူများအားစစ်ဆေးနေစဉ်
ဓါတ်ပုံ – စစ်ကောင်စီ
