၄ ဧပြီ၊ ၂၀၂၅
တရုတ်နိုင်ငံကြက်ခြေနီအသင်းက မြန်မာနိုင်ငံ ငလျင်ဘေးသင့်ပြည်သူတွေအတွက် ပေးပို့တဲ့ ထောက်ပံ့ရေး ပစ္စည်း ယာဉ်တန်း(၉)စီးကို စစ်တပ်က ပစ်ခက်ခဲ့တာနဲ့ပတ်သက်လို့ စစ်ကောင်စီက ဝန်ခံထားပေမယ့် တရုတ်ရုံးရဲ့ ထုတ်ပြန်ချက်မှာ ထည့်သွင်းဖော်ပြတာမရှိခဲ့တာကို တွေ့ရပါတယ်။
ဒီဖြစ်စဉ်အပေါ် တရုတ်သံရုံးကထုတ်ပြန်ထားရာမှာ “မြန်မာနိုင်ငံတွင် ငလျင်ဖြစ်ပွားပြီးနောက် တရုတ်နိုင်ငံမှ အရေးပေါ်တုံ့ပြန်မှုယန္တရားကို စတင်ခဲ့ပြီး ကယ်ဆယ် ရေးလုပ်ငန်းများကို အင်တိုက်အားတိုက် ဆောင်ရွက်ခဲ့ကြောင်း၊ တရုတ်နိုင်ငံကြက်ခြေနီအသင်းမှ မြန်မာနိုင်ငံသို့ ပံ့ပိုးပေးခဲ့သော သဘာဝဘေးကယ်ဆယ်ရေးပစ္စည်းများသည် မြန်မာနိုင်ငံသို့ ရောက်ရှိနေပြီး မန္တလေး ငလျင် ဘေးသင့်သူတွေဆီကို ပို့ဆောင်နေကြောင်းနဲ့ တရုတ်နိုင်ငံရဲ့ ကယ်ဆယ်ရေးအဖွဲ့ဝင်တွေနဲ့ ထောက်ပံ့ရေး ပစ္စည်းတွေ လုံခြုံရေး နဲ့ ကယ်ဆယ်ရေးပစ္စည်းတွေ ပို့ဆောင်ရေးလမ်းကြောင်း ခိုင်မာသောအာမခံမှုရှိစေဖို့ မြန်မာနိုင်ငံဘက်အသီးသီးအား အလေးအနက် တိုက်တွန်းအပ်ပါတယ်လို့ “တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun ပြောဆိုထားပါတယ်။
ဧပြီလ ၁ ရက်နေ့ ည(၉း၂၁)နာရီအချိန်မှာ တရုတ်နိုင်ငံကြက်ခြေနီအသင်းက မြန်မာနိုင်ငံ ငလျင်ဘေးသင့်ပြည်သူ တွေ အတွက် ပေးပို့တဲ့ ထောက်ပံ့ရေးပစ္စည်းတွေသယ်ဆောင်လာတဲ့ ယာဉ်တန်း(၉)စီးဟာ မန္တလေးမြို့ကို အသွား နောင်ချိုမြိုနယ် အုမ္မတီးကျေးရွာမှာ စစ်ကောင်စီ ပစ်ခတ်တာကို ခံခဲ့ရပါတယ်။
စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကပြောဆိုရာမှာတော့“အခုဖြစ်တဲ့အဖွဲ့အနေနဲ့ မြန်မာနိင်ငံကိုရော သက်ဆိုင်ရာသံရုံးကိုရောအကြောင်းကြားထားတာမရှိပါဘူး ဖြစ်စဉ်နေရာလည်းနောင်ချိုမြိုနယ် အုမ္မတီးကျေးရွာမှာဖြစ်တယ် အဲ့ဒီနေရာမှာ တပ်မတော်နဲ့ TNLA တို့ တိုက်ပွဲဖြစ်နေတာပါ တပ်မတော်လုံခြုံရေးအဖွဲ့အနေနဲ့ အဲ့ဒီယာဉ်တန်းကို မီတာ ၁၀၀ လောက်အကွာကနေ မီးထိုးပြီးတာဆီးရတယ် တားဆီးလို့မရပါဘူး ဒါကြောင့် မိုးပေါ်ထောင်းပြီး သေနက်သုံးချက် ဖောက်ပြီးထား ဆီးခဲ့ပါတယ် ဒါနဲ့အဲ့ဒီအဖွဲ့လည်း နောင်ချိုမြို့ကိုပြန်လှည်သွားတယ်လို့ “ပြောဆိုထားပါတယ်။
ထောက်ပံ့ရေးယာဉ်တန်းတွေ မန္တလေးမြို့ကို ခရီးဆက်သွားမယ့်အကြောင်း စစ်ကောင်စီကို သတင်းပေး ပို့ထားပေမယ့် လမ်းခရီးမှာ အသင့်စောင့်ဆိုင်းပစ်ခတ်တာ ကြုံရပြီး နောင်ချိုမြို့ကို ပြန်လည်ဆုတ် ခွာလာရ တယ်လို့ လည်း TNLA ကဆိုထားပါတယ်။
နောင်ချိုမြို့နယ်အတွင်းက ပြင်ဦးလွင်-လားရှိုးကားလမ်းမပေါ်ရှိ ကျေးရွာတွေဖြစ်တဲ့ ဘန့်ဘွေး၊ ရေဝင်၊ အုမ္မတီး၊ အုမ္မခါးကျေးရွာတွေအနီးစစ်ရေး ပြင်းထန်နေပြီး အုမ္မတီးရွာကို ဖေဖော်ဝါရီ နောက်ဆုံးပတ်က လေကြောင်းက ဗုံးကြဲထားသလို မတ်လ ပထမပတ်အထိ တိုက်ပွဲတွေဖြစ်ပွားထားပါတယ်။
