၁၉ ဩဂုတ်၊ ၂၀၂၄
ပဲခူးတိုင်း၊ ညောင်လေးပင်ခရိုင်(ခလယ်လွီထူးခရိုင်) အတွင်းက ရေဘေးကြုံနေတဲ့ မုန်းမြို့နယ်(မူးမြို့နယ်) နဲ့ ကျောက်ကြီးမြို့နယ်(လယ်ဒိုမြို့နယ်) တွေကို စစ်ကောင်စီတပ်တွေက အရပ်သားတွေကို ပစ်မှတ်ထားပြီး လက်နက်ကြီး ၊ ဒရုန်းတို့နဲ့ပစ်ခတ်တိုက်ခိုက်တဲ့အတွက် အရပ်သားပြည်သူ ၅ ဦး ထိခိုက်ဒဏ်ရာရခဲ့တယ်လို့ Karen National Union – KNU က သတင်းထုတ်ပြန်ပါတယ်။
ဩဂုတ်လ ၁၅ ရက်မှာ အုတ်ဖျက်တပ်စခန်းက စစ်ကောင်စီတပ်တွေက ကြက်တက်ညောင်ပင်ရွာကို ဒရုန်းနဲ့ဗုံးကြဲတဲ့အတွက် လူ ၂ ဦး ဒဏ်ရာရပါတယ်။ ၁၅ ရက်နေ့မှာပဲ ခမရ- ၃၀၇ တပ်ရင်းက တလိုင်းခင်ကျေး ရွာကို ၁၂၂ မမ လက်နက်ကြီးတစ်လုံး၊ ခလရ – ၂၆၄ တပ်ရင်း ၁၂၂ မမနဲ့ ၁၂၀ မမ လက်နက်ကြီး နှစ်လုံးကို ယောက်သွားကုန်းကျေးရွာ၊ ငဇယ်အင်းနဲ့ ကညှင်ကြိုးကျေးရွာတို့ကို ကျရောက်ပေါက်ကွဲခဲ့ပြီး လူ ၃ ဦး ဒဏ် ရာရခဲ့ပါတယ်။
ဩဂုတ် ၁၆ ရက် ညပိုင်းမှာ ခလရ ၂၆၄ တပ်ရင်းက ဒရုန်းသုံးပြီး ယောက်သွားကုန်းကျေးရွာကို ထပ်ပြီး ဗုံးကြဲတိုက်ခိုက်ခဲ့တယ်လို့ KNU က ဩဂုတ် ၁၉ ရက်မှာ တရားဝင် သတင်းထုတ်ပြန်ကြေညာပါတယ်။
စစ်ကောင်စီရဲ့ အရပ်သားပြည်သူတွေကို တိုက်ခိုက်မှုကို ခံနေရတဲ့အပြင် ရေကြီးနေတဲ့အတွက် ရေဘေး ပါကြုံနေရပြီး အရေးပေါ်အကူအညီတွေ လိုအပ်နေတယ်လို့ လယ်ဒိုနဲ့မူးမြို့နယ်တို့က ကရင်အရေးပေါ် ကူညီကယ်ဆယ်ရေးကော်မတီကလည်း ထုတ်ပြန်ထားပါတယ်။
Photo-KNU
ပုံစာ – ( KNU က ထုတ်ပြန်တဲ့ သတင်းဓာတ်ပုံများ)
