၁၃ သြဂုတ်၊ ၂၀၂၄
ရှမ်းပြည်နယ်မြောက်ပိုင်း၊ နမ့်ဆန်မြို့နယ်မှာ မနေ့က သြဂုတ်လ ၁၂ ရက်နေ့ ညအချိန်မှာ စစ်ကောင်စီတပ်က လေကြောင်းသုံး ဗုံးကြဲတိုက်ခိုက်မှုပြုလုပ်ခဲ့တာကြောင့် အရပ်သား (၁)ဦးသေဆုံးပြီး (၁)ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
ဩဂုတ်လ ၁၂ ရက်ည (၁၁း၃၁)မိနစ်မှာ ၁ကြိမ်၊ (၁၁း၄၅)မိနစ်မှာ ၁ ကြိမ်၊ (၁၁း၅၁)မိနစ်မှာ ၁ ကြိမ် စုစုပေါင်း(၃)ကြိမ်လာရောက်ပြီး ဗုံး(၆)လုံးကြဲချတိုက်ခိုက်ခဲ့တယ်လို့ TNLA က သတင်းထုတ်ပြန်ပါတယ်။
အဲ့ဒီ ဗုံးကြဲတိုက်ခိုက်မှုကြောင့် နမ့်ဆန်မြို့၊ မြို့လယ်ရပ်ကွက်မှာရှိတဲ့ EPC ရုံးအတွင်းကို ကျရောက်ပေါက်ကွဲခဲ့ပြီး အဲ့ဒီရုံးက အသက်(၃၀)အရွယ် ဒေသခံ(၁)ဦး သေဆုံးသွားပြီး (၁)ဦးထိခိုက်ဒဏ်ရာရရှိခဲ့တယ်လို့ ဆိုပါတယ်။
ဒါ့အပြင် ရုံးဝန်းအတွင်းက ထရန်စဖော်မာ စက်တွေထိခိုက်ပျက်စီးသွားပြီး အနီးဝန်းကျင်က မြို့မဂိုဏ်ချုပ်ကျောင်းနဲ့ ဒေသခံနေအိမ်အဆောက်အဦး(၅)လုံး ထိခိုက်ပျက်စီးသွားခဲ့တယ်လို့ သိရပါတယ်။
သြဂုတ်လ (၆) ရက်နေ့ကလည်း PSLF/TNLA ထိန်းချုပ်ထားတဲ့ ကွတ်ခိုင်မြို့ကို စစ်ကောင်စီတပ်က လေကြောင်းဗုံးကြဲတိုက်ခိုက်မှုပြုလုပ်ခဲ့ပြီး ဒေသခံ (၆)ဦး သေဆုံးကာ၊ (၁၀)ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။ အဲ့ဒီတိုက်ခိုက်မှုကြောင့် အိမ်နှင့် ဆိုင်ခန်းပေါင်း(၄၀၀)ကျော်လည်း မီးလောင်ပျက်စီးသွားခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
