၂၁ ဇွန်၊ ၂၀၂၄
စစ်အာဏာရှင်များရဲ့ အကြောင်းမဲ့သတ်ဖြတ်ခြင်းကို ခံခဲ့ရတဲ့ ပဲခူးမြို့ ဝင်းနိမ္မတာရုံကျောင်းတိုက် ဆရာတော်ဘဒ္ဒန္တမုနိန္ဒာဘိဝံသရဲ့ တပည့် သံဃာတော်များ အမည်တပ်ထားတဲ့ ထုတ်ပြန်ချက်တစ်စောင် ထွက်လာပါတယ်။
ဒီထုတ်ပြန်ချက်မှာ ဆရာတော် ဘဒ္ဒန္တမုနိန္ဒာဘိဝံသရဲ့ သေဆုံးရခြင်း အကြောင်းရင်းကို ရှင်းပြထားပြီး ဆရာတော်ဘုရားကြီးကို စစ်တပ်က လက်လွတ်စပယ်ပစ်ခတ်သတ်ဖြတ်တဲ့နည်းတူ တစ်နိုင်ငံလုံးကို အကြောင်းမဲ့ ပစ်ခတ်သတ်ဖြတ်နေတာ ၊ ကျေးရွာနဲ့ မြို့တွေကို မီးရှို့တာ ၊ အရပ်သားပြည်သူတွေကို နေ့စဉ်လုယက်နေတာက တစ်နေ့တစ်ခြား ပိုပြီး ဆိုးရွားလာတယ်လို့ ဖော်ပြပါတယ်။
စစ်တပ်ရဲ့ အကြောင်းမဲ့ သတ်ဖြတ်မှုတွေဟာ ရဟန်းရှင်လူ ၊ ပြည်သူမရွေး ၊ ဘာသာမရွေး ၊ လူမျိုးမရွေး ၊ အဆင့်အတန်းမရွေး ဘယ်သူ့ကိုမဆို အချိန်မရွေးကျရောက်နေပြီဆိုတာ ဆရာတော်ရဲ့အဖြစ်အပျက်ကို ကြည့်ပြီး သိနိုင်ပါတယ်။ ဒါကြောင့် ရဟန်းသံဃာတွေအနေနဲ့ စစ်တပ်ရဲ့ လက်လွတ်စပယ်သတ်ဖြတ်ခြင်းကို ရပ်တန့်နိုင်ဖို့ ပရိကံဆောင်ခြင်း အမျိုးမျိုး တို့ကို ဝိနည်းနဲ့အညီ လုပ်ဆောင်ပြီး ပြည်သူတွေနဲ့ လက်တွဲဖို့ တိုက်တွန်းနှိုးဆော်တယ်ဆိုတဲ့ အကြောင်းအရာများ ထုတ်ပြန်ချက်ထဲမှာ ပါဝင်ပါတယ်။
