၂ မတ်၊ ၂၀၂၅
ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်တဲ့မြို့နယ်တွေမှာ ဖေဖော်ဝါရီလ တလအတွင်း မိုင်းကြောင့် ကလေးငယ်အပါအဝင် (၆)ဦး သေဆုံး၊ (၈)ဦး ပြင်းထန်ဒဏ်ရာရရှိခဲ့တယ်လို့ TNLA က သတင်းထုတ်ပြန်ပါတယ်။
ကွတ်ခိုင်မြို့နယ်၊ နမ့်ဆိုင်ကျေးရွာမှာ ဖေဖော်ဝါရီလ ၂ ရက်က ကလေးငယ် (၄)ဦးဟာ ရေချောင်းမှာ ငါးသွားဖမ်းချိန် လက်လုပ်မိုင်းကိုနင်းမိိိိပြီး (၂)ဦး သေဆုံးခဲ့ပြီး (၂)ဦး ဒဏ်ရာရရှိခဲ့တယ်လို့ ဆိုပါတယ်။
ဖေဖော်ဝါရီလ ၅ ရက်က လည်း နမ့်ခမ်းမြို့နယ်၊ ဟိုဆိုင်းကျေးရွာမှာ အသက် (၆၁)နှစ်အရွယ် အမျိုးသား တဦး ကြံခင်းအတွင်း မိုင်းကို ခုတ်မိတာကြောင့် ပေါက်ကွဲပြီး ခန္ဓာကိုယ်တစ်ခုလုံးနှင့် မျက်နှာတွင် ထိခိုက်ဒဏ်ရာရရှိခဲ့တယ်လို့သိရပါတယ်။
သီပေါမြို့မှာလည်း ဖေဖော်ဝါရီလ ၆ ရက်က ဒေသခံအမျိုးသားတဦးက စစ်ကောင်စီတပ်စခန်းချဖူးခဲ့တဲ့ မြရွှေဂူဘုန်းကြီးကျောင်းဘေးမှာ လက်ကျန်မိုင်းကိုတွေ့ရှိပြီး ကောက်ယူဆော့မိရာက ပေါက်ကွဲမှုဖြစ်ကာ (၁)ဦး သေဆုံးခဲ့ပြီး (၁)ဦး ဒဏ်ရာရရှိခဲ့တယ်လို့ ဆိုပါတယ်။
အလားတူ မုံးစီးမြို့နယ် ဆိုင်ခေါင်ကျေးရွာလည်း ကလေးငယ် (၂)ဦးက လက်ပစ်ဗုံးတစ်လုံးကို ကောက်ယူဆော့ရာမှပေါက်ကွဲကာ (၁)ဦး သေဆုံးခဲ့ပြီး (၁)ဦး ထိခိုက်ဒဏ်ရာရရှိခဲ့သလိုဖေဖော်ဝါရီလ ၁၁ရက်က လည်း သီပေါမြို့နယ် ကုန်းစုံကျေးရွာမှာ မြေမြှုပ်မိုင်းကို နင်းမိပြီး ကလေးငယ် (၂)ဦး ပြင်းထန်ဒဏ်ရာရရှိခဲ့တယ်လို့ ထုတ်ပြန်ပါတယ်။
အဲ့ဒီကျေးရွာမှာပဲ ပြီးခဲ့သည့် ဖေဖော်ဝါရီလ ၂၁ရက်မှာ မိသားစုက ကောက်လာတဲ့ ဗုံးတစ်လုံးကို နေအိမ်အတွင်း ဆော့ကစားရာက ပေါက်ကွဲကာ (၂)ဦး သေဆုံးခဲ့ပြီး (၁)ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
