၂၇ မတ်၊၂၀၂၅
ဆေးတာဝန်ခံ CDM သူနာပြု အမျိုးသမီးရဲဘော်တစ်ဦးကို တပ်ရင်းမှူးက ဥပဒေမဲ့ဖိနှိပ်မှု နဲ့ အကြမ်းဖက်ခြိမ်း ခြောက်မှုတွေရှိနေကြောင်း Shield အမျိုးသမီးအဖွဲ့အနေနဲ့ သိရရှိတာကြောင့် ယင်းကိစ္စရပ်ပေါ် အမြန်ဆုံး အရေးယူဆောင်ရွက်ဖို့ NUG ကာကွယ်ရေးဝန်ကြီးဌာနအနေနဲ့ စုံစမ်းစစ်ဆေးအရေးပေးဖို့ အိတ်ဖွင့်ပေးစာ ပေး ပို့ပြီး တောင်းဆိုထားပါတယ်။
ဒီစာထုတ်ပြီး တောင်းဆိုတာနဲ့ ပတ်သက်ပြီး ကိစ္စတွေ ဖြေရှင်းပြီးရင် Shield အမျိုးသမီးအဖွဲ့အနေနဲ့ တာဝန်ယူရမယ်လို့ ကျောက်ဆည်ခရိုင် တပ်ရင်း ၃ ရဲ့ တပ်ရင်းမှူး ဒေါက်တာ လုံးလုံးက ပြောဆိုခဲ့ကြောင်း Shield အမျိုးသမီးအဖွဲ့ ကသိရပါတယ်။
“ကျွန်မတို့ ခုလိုစာထုတ်တဲ့ ကိစ္စနဲ့ပတ်သက်ပြီး ဒါတွေ ဖြေရှင်းပြီးရင် တာဝန်ယူရမယ်လို့ ပြောပါတယ်။”လို့ Shield အဖွဲ့ရဲ့ ဥက္ကဋ္ဌ မထိပ်ထားက New Day Myanmar ကိုပြောပါတယ်။
“အမျိုးသမီးရဲဘော် တယောက်ကို အပြစ်ပေးတဲ့ သူက အမျိုးသားရဲဘော်ဖြစ်တယ်ပေါ့နော်။ အမျိုးသား တယောက် အားနဲ့ ဒီလို ကြိမ်ဒဏ်တွေ ဘာတွေကို ရိုက်တယ်ဆိုတာ အပြစ်ပေးတာနဲ့ မတူဘဲနဲ့ နှိပ်စက်တာနဲ့ တူနေတယ်။”တပ်ရဲ့ စည်းကမ်းတွေကို မလေးစားတာမဟုတ်ဘူး။ ဒါပေမယ့် အမျိုးသမီးတွေ အတွက် က သတ်မှတ်ထားတဲ့ လူ့အခွင့်အရေး စံနှုန်းတွေနဲ့ သွားပေါ့နော်။ ဒီဟာကြီးက အရမ်းရုပ်ဆိုးတယ် လူ့အဖွဲ့အစည်းအတွက်ပေါ့နော်။”လို့ သူက ဆက်ပြောပါတယ်။
မိုးမိတ်ပြည်သူ့ဆေးရုံ၊ CDM သူနာပြု ရဲဘော် ယဉ်မွန်အောင်ဟာ တာဝန်ထမ်းဆောင်လိုချင်းမရှိတာကြောင့် နှုတ်ထွက်စာတင်ခဲ့တဲ့အပေါ် တပ်ရင်းမှူးဆိုသူက ဥပဒေမဲ့ ဖမ်းဆီးနှိပ်ဆက်တာတွေ (၃)ရက်တိုင် လုပ်ဆောင် ခဲ့တယ်လို့ ဆိုပါတယ်။
ရဲဘော် ယဉ်မွန်အောင် ဟာ ၂၀၂၁ ခုနှစ်တွင် CDM ပြုလုပ်လာသူဖြစ်ပြီး ၂၀၂၂ ခုနှစ် ၁ လပိုင်းက စတင်ကာ စစ်ဒေသ(၁)၊အမှတ် (၅၁၅)တပ်ရင်းမှာ တာဝန်ထမ်းဆောင်ခဲ့တဲ့ ဆေးတပ်ဖွဲ့ဝင်တစ်ယောက်ဖြစ်တယ်လို့ ဆိုပါတယ်။
လက်ရှိမှာ တပ်ရင်းမှူး ဒေါက်တာလုံးလုံးရဲ့ ညွှန်ကြားချက်နဲ့ ကျောက်ဆည်ခရိုင် တပ်ရင်း(၃)မှာ ပြောင်းရွေ့ တာဝန် ထမ်းဆောင်ခဲ့ကြောင်း ၊တပ်ရင်းမှူးထံ နှုတ်ထွက်ခွင့်(၃) ကြိမ်တင်ပြခဲ့ပေမယ့် အကြောင်း မပြန်တာ ကြောင့် စစ်ရေးချုပ်ထံတိုက်ရိုက်တင်ပြခဲ့တယ်လို့ ဆိုပါတယ်။
အဲ့ဒီနောက် တပ်ရင်းမှူးဆိုသူက ဝန်ကြီးဌာနရဲ့ နှုတ်မိန့်အရလို့ ပြောဆိုကာ ရဲဘော် ယဉ်မွန်အောင်ကို ဖမ်းဆီး ထိမ်းသိမ်းတာ၊ခြောက်ပေါက်ချုပ်ဖြင့် သုံးရက်တိုင်တိုင်ချုပ်နှောင်တာနဲ့ အပြစ်ပေးရိုက်နက်ခဲ့ ကြောင်း Shield အမျိုးသမီးအဖွဲ့ထံ တိုင်ကြားလာတယ်လို့ ဆိုပါတယ်။
ဓာတ်ပုံ – Shield အဖွဲ့
