၁၈ မတ်၊ ၂၀၂၅
၂၀၂၅ ခုနှစ် မတ်လ ၂၀ ရက်မှာ ကျရောက်မယ့် ၃၇ နှစ်ပြည့် ချင်းတော်လှန်ရေးနေ့မှာ အကျဉ်းသား ၇၂ ဦးကို လွတ်ငြိမ်းချမ်းသာခွင့်ပေးလိုက်တယ်လို့ ချင်းအမျိုးသားတပ်ဦးက သတင်းထုတ်ပြန်ပါတယ်။
၂၀၂၅ ခုနှစ် မတ်လ ၂၀ ရက်ဟာ အာဏာရှင်စနစ်မှန်သမျှ အမြစ်ပြတ်ချေမှုန်းပြီး အမျိုးသား ကိုယ်ပိုင်ပြဌာန်းခွင့်နဲ့အမျိုးသားတန်းတူရေး အာမခံချက်ရှိတဲ့ ဖက်ဒရယ်ပြည်ထောင်စု တည် ဆောက်ရေးအတွက် လက်နက်ကိုင်တိုက်ပွဲဝင်လာခဲ့တဲ့ ၃၇ နှစ်ပြည့် ချင်းတော်လှန်ရေးနေ့ဖြစ်တယ်လို့ ဆိုပါတယ်။
တော်လှန်ရေးမှာ အသက်ပေးလှူသွားကြတဲ့ အာဇာနည်တွေကို ဦးညွတ် ဂါရဝပြုသလို ကိုယ်အင်္ဂါတစိတ်တပိုင်း ပေးလှူသွားကြတဲ့ သူရဲကောင်းတွေနဲ့ စွန့်လွှတ်ပေးဆပ်အနစ်နာခံခဲ့တဲ့ ပြည်သူတွေကို လေးစားဂုဏ်ပြုတယ်လို့ ထုတ်ပြန်ချက်မှာ ဖော်ပြထားပါတယ်။
ချင်းလဲန်းအတွင်း စစ်ကောင်စီကင်းစင်ရေးနဲ့ ၂၀၀၈ ဖွဲ့စည်းပုံအခြေခံဥပဒေ ဩဇာအာဏာ သက် ရောက်မှုမှန်သမျှအဆုံးသတ်ရေး၊ စစ်မှန်သော ဖက်ဒရယ်ပြည်ထောင်စုတည်ဆောက်ရေးအတွက် ညီနောင်တိုင်းရင်းသား လက်နက်ကိုင်အဖွဲ့အစည်းတွေ ပြည်သူ့ကာကွယ်ရေးတပ်ဖွဲ့တွေနဲ့ လက်တွဲပြီး အဆုံးထိ တိုက်ပွဲဝင်သွားမယ်လို့ ဆိုပါတယ်။
ဒါ့အပြင် ချင်းအမျိုးသားတပ်ဦးအနေနဲ့ ၂၀၂၅ ခုနှစ်အတွင်း နိုင်ငံရေး၊ စစ်ရေး၊ သံရေးတမန်ရေး လှုပ်ရှားမှု အရှိန်ကို တိုးမြှင့်ဆောင်ရွက်သွားမည်ဖြစ်သလို အာဏာသိမ်း စစ်အုပ်စုရဲ့ အကြမ်းဖက်မှုကြောင့် ပြည်သူများဆုံးရှုံးခဲ့တဲ့ လူမှုဘဝ ပြန်လည် ထူ ထောင်ရေးအတွက် နိုင်ငံတကာအစိုးရ၊ အဖွဲ့အစည်းများ၊ စေတနာရှင်တွေက ပံ့ပိုးကူညီကြဖို့လည်း တိုက်တွန်းထားပါတယ်။
ချင်းအမျိုးသားတပ်မတော်နဲ့ ဒေသန္တာရကာကွယ်ရေးတပ်ဖွဲ့ဟာ ၂၀၂၅ ခုနှစ်၊ နှစ်လတာ တွင်း စစ်ကောင်စီရဲ့ စခန်းတချို့ကို သိမ်းပိုက်နိုင်ခဲ့ရာ စစ်ကောင်စီတပ်သား ၃၀ ခန့်ကို ရှင်းလင်းနိုင်ခဲ့ တဲ့ အပြင် စစ်သုံ့ပန်း ၂၀ ဦး ဖမ်းဆီးနိုင်ခဲ့ပြီး ရန်သူ့လက်နက် ၈၀ ခန့် သိမ်းဆည်းနိုင်ခဲ့တယ်လို့ သိရပါတယ်။
ပုံစာ – စစ်ကောင်စီစခန်းတခုကို သိမ်းပိုက်နိုင်ခဲ့သော ချင်းအမျိုးသားတပ်ဦး တပ်ဖွဲ့ဝင်များ
ဓါတ်ပုံ – CNF
